بيىل اقىن سارا تاستانبەكقىزىنىڭ تۋىلعانىنا 165 جىل تولدى. ايتىس ونەرىنىڭ اقتاڭگەرى اتانعان حالىقتىڭ قادىرلى قىزىنا دەگەن قۇرمەت ەش كەمىگەن ەمەس.
اقىننىڭ كىندىك قانى تامعان اقسۋ ءوڭىرى سارانىڭ تويىن «رۋحاني جاڭعىرۋ» باعدارلاماسى اياسىندا اتاپ ءوتۋدى باستادى. كۇنى كەشە جانسۇگىروۆ كەنتىندە «جەتىسۋدىڭ ساراسى – بار قازاقتىڭ داراسى» اتتى رەسپۋبليكالىق ايتىس ءوتتى. ايتىسقا بالعىنبەك يماشەۆ, اينۇر تۇرسىنباەۆ, سارا توقتامىسوۆا, جانداربەك بۇلعاقوۆ سياقتى سۋىرىپ سالما ونەردىڭ وكىلدەرى كەلىپ, اقسۋ اسپانىن اۋەزدى اۋەن, ۇتىمدى ۇيقاسقا بولەدى.
ءسوز سايىسىنىڭ ناتيجەسىندە باس جۇلدە ءدۇلدىل اقىن جانداربەك بۇلعاقوۆقا بۇيىرىپ, ول 1 500 000 تەڭگە اقشالاي سىياقىنى قانجىعاسىنا بايلادى. ال سارا توقتامىسوۆا ءبىرىنشى, بالعىنبەك يماشەۆ ەكىنشى, سىرىم اۋەزحان مەن مۇرادىم ميرلانوۆ ءۇشىنشى جۇلدەلى ورىنداردى يەلەندى. اقسۋ اۋدانى اكىمىنىڭ ارنايى جۇلدەسىنە جەتىسۋدىڭ جاس اقىنى جالعاس سادىر ۇلى لايىقتى بولدى. سونداي-اق, اينۇر تۇرسىنباەۆا, قۋانىش شارمونوۆ, نۇريسلام ءابدىل, جارقىنبەك ناۋشابەكوۆتەر دە ايتىستان قۇراۋىز قايتپاي, ىنتالاندىرۋ جۇلدەلەرىن الىپ قايتتى.
- بيىل ايتىستىڭ دارا ءدۇلدىلى سارا تاستانبەكقىزىنىڭ 165 جىلدىعى وبلىس كولەمىندە اتالىپ وتۋدە. بۇگىنگى جانسۇگىروۆ كەنتىندە وتكەن «جەتىسۋدىڭ ساراسى – بار قازاقتىڭ داراسى» اتتى رەسپۋبليكالىق ايتىس سونىڭ ءبىر كورىنىسى. بۇعان دەيىن اقىننىڭ ماسكەۋدەن تابىلعان سۋرەتتەرى, جەكە زاتتارى ەلگە اكەلىنگەن بولاتىن. اقىن ساراعا دەگەن ەل قۇرمەتى ارتا بەرەدى, - دەيدى الماتى وبلىسى اكىمىنىڭ ورىنباسارى اقان ابدۋاليەۆ.
ايتپاقشى, اۋدان ورتالىعىندا وتكەن شارادا ء«بىرجان - سارا» وپەراسىنان تەاترلاندىرىلعان ءۇزىندى قويىلىلىپ, باستى رولدەردى قازاقستان رەسپۋبليكاسىنىڭ ەڭبەك سىڭىرگەن قايراتكەرى, اكتەر ساعات جىلكەلديەۆ پەن قازاقستاننىڭ مادەنيەت قايراتكەرى, ءانشى گۇلمايدان سۇندەتوۆا سومدادى.
قالماحانبەت مۇقامەتقالي,
«ەگەمەن قازاقستان»
الماتى وبلىسى