فيزيكا-ماتەماتيكا عىلىمدارىنىڭ كانديداتى, عالىم, ۇستاز توبىل داۋلەتباەۆتىڭ ەسىمىن ەستە قالدىرۋ ءۇشىن كوزى تىرىسىندە قىزمەت ەتكەن قوستاناي مەملەكەتتىك پەداگوگيكالىق ۋنيۆەرسيتەتىندە عالىم اتىنداعى اۋديتوريا اشىلدى. شاراعا وقىتۋشىلار مەن ستۋدەنتتەر, توبىل ەسلامعالي ۇلىنىڭ ارىپتەستەرى مەن دوستارى, تۋىستارى جينالدى.
«پروفەسسور توبىل داۋلەتباەۆ دارىندى عالىم, ۇستاز عانا ەمەس, ادىلەتتى, ادامگەرشىلىگى مول, اينالاسىنا قامقور كىسى ەدى. جۇزدەگەن شاكىرت, مامان تاربيەلەدى. ونىڭ ءومىرى مەن قىزمەتى, جاستارعا بەرگەن ۇلگىسى كەيىنگىلەرگە ءار كەز ونەگە بولادى» دەدى قوستاناي مەملەكەتتىك پەداگوگيكا ۋنيۆەرسيتەتىنىڭ رەكتورى, پروفەسسور ەركىن ءابىل.
توبىل داۋلەتباەۆ 1979 جىلى كانديداتتىق ديسسەرتاتسياسىن قورعاپ, فيزيكا-ماتەماتيكا عىلىمدارىنىڭ كانديداتى عىلىمي دارەجەسىن الادى. ودان كەيىنگى جىلدارى ۇستازدىق ەتە ءجۇرىپ, عىلىمي ىزدەنىستەرىن توقتاتقان جوق. ارقالىق پەداگوگيكا ينستيتۋتىندا, ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىندە, قوستاناي مەملەكەتتىك پەداگوگيكا ينستيتۋتىندا قىزمەت ىستەدى, جوعارى ماتەماتيكا كافەدراسىن باسقاردى. عالىم ماتەماتيكانى وقىتۋدى جەتىلدىرۋ باعىتىندا تىڭعىلىقتى ەڭبەك ەتتى, مۇعالىمدەرگە ارناپ ەكى وقۋ قۇرالىن, 6 ادىستەمەلىك قۇرالدار جازدى. كافەدرا مەڭگەرۋشىسى بولعان جىلدارى وقىتۋشىلاردىڭ ەكەۋى عىلىم دوكتورى, 20-سى عىلىم كانديداتى اتاعىن الدى.
اۋديتوريانىڭ اشىلۋ سالتاناتىندا ءسوز سويلەگەندەر توبىل داۋلەتباەۆتىڭ وبلىستىڭ عانا ەمەس, رەسپۋبليكانىڭ ماتەماتيكالىق ءبىلىم بەرۋ ءىسىن دامىتۋعا اتسالىسقانىن ايتتى. پروفەسسورلار امانجول كۇزەمباي ۇلى, كارىبوز جاپاروۆ, جەڭىسنۇر قۇجىكەەۆ توبىل ەسلامعالي ۇلىنىڭ تالانتتى ماتەماتيك جانە ۇستازدىعىن, جاستارعا ءبىلىمدى ومىرمەن بايلانىستىرا ءبىلۋدى ۇيرەتكەن كاسىبيلىگىن ەرەكشە ءبولىپ ايتتى.
«ونىڭ ادامگەرشىلىگى اينالاسىنا ساۋلە شاشىپ تۇرعانداي بولاتىن. فيزيكا-ماتەماتيكا پاندەرىنە بالالاردىڭ, جاستاردىڭ ىنتاسىن وياتۋدىڭ ءوزى پەداگوگيكالىق كاسىبيلىككە كەلەتىن قاسيەت. توبىل ەسلامعالي ۇلى وڭىردەگى كوپتەگەن ماتەماتيكتەردىڭ ناعىز ۇستازى بولا ءبىلدى», - دەدى ونىڭ ارىپتەس ءىنىسى جەڭىسنۇر قۇجىكەەۆ.
عالىم-ۇستاز اتىنداعى اۋديتوريانىڭ اشىلۋ سالتاناتىنا جينالعاندار توبىل داۋلەتباەۆتىڭ عىلىمي جۇمىستارى مەن ومىرىنەن دايىندالعان فوتوسۋرەتتەر كورمەسىن تاماشالادى.
ءنازيرا جارىمبەت,
«ەگەمەن قازاقستان»
قوستاناي