استانادا قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى مەن گوي بەيبىتشىلىك قورى (جاپونيا) ىنتىماقتاستىق تۋرالى مەموراندۋمعا قول قويدى.
سالتاناتتى راسىمگە قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ ديرەكتورى, سەنات دەپۋتاتى داريعا نازارباەۆا مەن گوي بەيبىتشىلىك قورىنىڭ پرەزيدەنتى حيروو سايوندجي قاتىستى.
ءىس-شارا بارىسىندا ءسوز سويلەگەن د.نازارباەۆا قول قويىلعان مەموراندۋم ورتاق ماقساتتى جۇزەگە اسىرۋعا مول ۇلەس قوساتىنىنا سەنىم ءبىلدىرىپ, ەكى قوردىڭ اراسىنداعى قارىم-قاتىناس دامي تۇسەتىنىن اتاپ ءوتتى.
«ەلباسى ءبىزدىڭ ەلدەرىمىزدىڭ اراسىنداعى مادەني-گۋمانيتارلىق قاتىناستارعا ەرەكشە نازار اۋدارادى. قوردىڭ قىزمەتىنىڭ نەگىزگى ماقساتى – دارىندى جاستارعا قولداۋ كورسەتۋ, ءبىلىم بەرۋ, الەۋمەتتىك ساياسات جانە جاڭا تەحنولوگيالار سالاسىنداعى جاڭاشىل يدەيالاردى ىسكە اسىرۋ, ءتيىمدى قايىرىمدىلىق كومەك كورسەتۋ جانە باسەكەگە قابىلەتتى ساراپتامالىق-تالداۋ ورتالىعىن دامىتۋ. بۇگىن ءبىز مەموراندۋمعا قول قويا وتىرىپ, قورلار اراسىندا سەنىمدى جانە مىقتى قارىم-قاتىناستىڭ بەرىك ىرگەتاسىن قالاپ وتىرعانىمىزعا قۋانىشتىمىز», دەدى د.نازارباەۆا.
سونىمەن قاتار ول ەلباسى قورى گوي قورىمەن بىرلەسىپ, جاس تالانتتاردى قولداۋ ءۇشىن عىلىم, مادەنيەت سالالارىنداعى جوبالاردى جۇزەگە اسىرۋعا, ساراپشىلاردىڭ دوڭگەلەك ۇستەلدەرىن وتكىزۋگە دايىن ەكەندىگىن باسا ايتتى.
ءوز كەزەگىندە حيررو سايوندجي الەۋمەتتىك ماڭىزى بار باستامالاردى جۇزەگە اسىرۋ بارىسىندا ءوزارا تاجىريبە الماسۋى قاجەتتىگىنە توقتالدى. سونىمەن قاتار بىرلەسكەن شارالاردى ۇيىمداستىرۋعا جانە وتكىزۋگە دايىن ەكەندىگىن جەتكىزدى.
مەموراندۋم قازاقستان مەن جاپونيا حالىقتارى اراسىنداعى ءداستۇرلى دوستىقتى ودان ءارى نىعايتۋعا, جاستار باستامالارىن ىلگەرىلەتۋگە, جان-جاقتى ستراتەگيالىق ارىپتەستىكتى نىعايتۋعا باعىتتالعان.
مەموراندۋمعا قول قويۋ ءراسىمى اياقتالعاننان كەيىن قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ اتقارۋشى ديرەكتورى قانات جۇماباەۆ گوي بەيبىتشىلىك قورىنا قازاقستاننىڭ نىشانى, ۇلى دالا ەلىنىڭ مادەني مۇراسى سانالاتىن «التىن ادامنىڭ» كوشىرمەسىن سىيعا تارتتى.
گوي بەيبىتشىلىك قورىنىڭ پرەزيدەنتى حيروو سايوندجي نازارباەۆ ورتالىعىندا ەلباسىنىڭ يادرولىق قارۋعا قارسى باستامالار زالىمەن تانىستى. سونىمەن قاتار ۇلتتىق مۋزەي جانە «بەيبىتشىلىك قابىرعاسى» مونۋمەنتىنە جانە باسقا مادەني نىساندارعا باردى.
يادرولىق قارۋعا قارسى قوزعالىستاعى قازاقستاننىڭ نەگىزگى شەتەلدىك ارىپتەستەرىنىڭ ءبىرى سانالاتىن جاپونيالىق قوناقتىڭ ەلىمىزگە كەلۋى كەزدەيسوق ەمەس. جاپونيا دا يادرولىق قارۋدىڭ زاردابىن كوپ تارتقان مەملەكەت. سوندىقتان «كۇنشىعىس ەلى» حالىقارالىق قوعامداستىقتى يادرولىق قارۋدى تاراتپاۋعا جانە جاپپاي قىرىپ-جويۋ قارۋلارىنا قارسى باعدارلامالاردى قولداۋعا ءاردايىم شاقىرادى.
اباي اسانكەلدى ۇلى, «ەگەمەن قازاقستان»