قۇرلىقتىق حوككەي ليگاسىندا (قحل) كۇش سىناسىپ جۇرگەن «بارىس» كەزەكتى تۋردى ءوز مۇز ايدىنىندا وتكىزىپ, ومبىنىڭ «اۆانگارد» كلۋبىنان 3:4 ەسەبىمەن ۇتىلدى.
كەزدەسۋدى قوناقتار وتە قارقىندى باستادى. العاشقى كەزەڭدى ولار ءبىزدىڭ قاقپامىزعا قاتارىنان ءۇش شايبا سالىپ, جەرگىلىكتى حوككەيشىلەردى ءبىراز ابىگەرگە سالدى – 0:3. ەگەر ويىن وسىلاي جالعاسا بەرەتىن بولسا, ابىرويدان جۇرداي بولاتىندارىن تۇسىنگەن «بارىستىڭ» باس باپكەرى اندرەي سكابەلكا قاقپاشى دومينيك گراحوۆينانى سەرگەي كۋدرياۆتسەۆپەن الماستىردى. ونىڭ بۇل شەشىمى وڭدى بولدى. ۇزىلىستەن كەيىن استانالىقتاردىڭ ويىنى ءجۇردى. اندرە پەتەرسسون مەن برەندون بوچەنسكي ەسەپ ايىرماشىلىعىن قىسقارتتى – 2:3. ءۇشىنشى كەزەڭدە رومان ستارچەنكو تارازى باسىن تەڭەستىردى – 3:3. قوسىمشا ۋاقىتتا قوس كوماندا قانشا جانتالاسقانىمەن, تابلوداعى ەسەپ وزگەرگەن جوق. ال بۋلليت سوعۋ بارىسىندا «اۆانگارد» ويىنشىلارىنىڭ باعى جاندى. قورىتىندى ەسەپ – 3:4.
وسى كۇنگە دەيىن 7 كەزدەسۋ وتكىزىپ, 9 ۇپايدى قورجىنعا سالعان «بارىس» قازىرگى كەزدە كحل-دىڭ تۇراقتى بىرىنشىلىگىنىڭ تۋرنير كەستەسىندە 11 ورىنعا تابان تىرەپ تۇر. ەندى جەرلەستەرىمىز وزدەرىنىڭ كەلەسى كەزدەسۋىن 22 قىركۇيەكتە ۋفادا «سالاۆات يۋلاەۆقا» قارسى وتكىزەدى.
عالىم سۇلەيمەن,
«ەگەمەن قازاقستان»