ءبىر اپتاعا سوزىلعان III دۇنيەجۇزىلىك كوشپەندىلەر ويىندارى 8 قىركۇيەكتە شولپاناتا قالاسىندا سالتاناتتى تۇردە جابىلدى.
راسىمگە قاتىسقان قىرعىز رەسپۋبليكاسىنىڭ پرەمەر-ءمينيسترى مۇحاممەدقالىي ابىلعازيەۆ كوشپەندىلەر ويىندارىنىڭ رامىزدەرى – كووكوردى (سابا) جانە كوشپەندىلەر ويىندارىنىڭ تۋىن 2020 جىلعى ءتورتىنشى ويىنداردىڭ يەسى تۇركيا رەسپۋبليكاسىنا تاپسىردى. رامىزدەردى تۇركيانىڭ جاcتار جانە سپورت بويىنشا ءمينيستردىڭ ورىنباسارى حامزا ەرليكايا قابىل الدى.
سالتاناتتا ءسوز سويلەگەن ۇكىمەت باسشىسى كوشپەندىلەر ويىندارى دۇنيەدە بولىپ جاتقان كيكىلجىڭدەرگە قاراماستان پلانەتامىزداعى حالىقتاردى ىنتىماققا جانە جاسامپازدىققا شاقىرعان ۇلكەن وقيعا بولعانىن باسا بەلگىلەدى.
ءراسىم قىرعىزستاننىڭ جانە شەتەلدىك ونەر شەبەرلەرىنىڭ كونتسەرتىمەن اياقتالدى. قازاقستاننان قر ەڭبەك سىڭىرگەن قايراتكەرى جانار دۇعالوۆا قاتىستى.
ال V دۇنيەجۇزىلىك كوشپەندىلەر ويىندارى 2022 جىلى ءازىربايجان رەسپۋبليكاسىندا وتەتىن بولدى.
نازاربەك بايجىگىتوۆ,
قىرعىز رەسپۋبليكاسى, شولپاناتا قالاسى