تۇركىستان قالاسىندا تاياۋ ارادا سالىنۋعا ءتيىس نىساندار كوپ. شاھاردىڭ جاڭا اكىمشىلىك-ىسكەرلىك ورتالىعىندا اكىمدىك عيماراتى, باسقارمالار مەن دەپارتامەنتتەر ءۇيى, دراما تەاترى, كونگرەسس-حولل, فيلارمونيا, كىتاپحانا, مادەنيەت سارايى, سپورت كەشەنى, ستاديون, ءجۇزۋ باسسەينى, نازارباەۆ زياتكەرلىك مەكتەبى, ساياباقتار, كوپقاباتتى تۇرعىن ۇيلەر, مەكتەپتەر, بالاباقشالار, كورمە ورتالىعى, مۇراجاي, وپەرا جانە بالەت تەاترى, دەنساۋلىق ساقتاۋ جانە باسقا دا الەۋمەتتىك-مادەني نىساندار قۇرىلىستارىن جۇرگىزۋ, ولارعا قاجەتتى ينفراقۇرىلىمدار تارتۋ ءبىرىنشى كەزەكتە قولعا الىناتىن ءىس.
ارينە, بۇل كوپ قارجىنى, ۋاقىت پەن تىنىمسىز ەڭبەكتى قاجەت ەتەتىن شارۋا. وسى ورايدا تۇركىستان وبلىسىنىڭ اكىمى جانسەيىت تۇيمەباەۆ وبلىستىق, اۋداندىق, قالالىق ءماسليحات دەپۋتاتتارىمەن جانە كاسىپكەرلەرمەن كەزدەسىپ, جوسپارلانعان جۇمىستاردى جۇزەگە اسىرۋعا قولداۋ كورسەتۋگە شاقىردى. ىسكەر ازاماتتاردى قالانى كوركەيتۋ ءۇشىن ءتۇرلى الەۋمەتتىك نىساندار مەن ويىن-ساۋىق ورتالىقتارى سىندى حالىققا قاجەتتى عيماراتتار سالۋعا ۇندەدى. «تۇركىستاندى تۇلەتۋگە ەرەكشە نازار اۋدارعان ەلباسى وعان رەسپۋبليكالىق بيۋدجەتتەن بولەك, ەلىمىزدىڭ وزگە وڭىرلەرىن, ۇلتتىق كومپانيالار مەن بيزنەس وكىلدەرىن اتسالىسۋعا شاقىرعان بولاتىن. تۇركىستان قالاسىنىڭ تۋريستىك الەۋەتى وتە جوعارى. وتكەن جىلى 1 ميلليوننان استام تۋريست كەلگەن بولسا, الداعى ۋاقىتتا ولاردىڭ سانىن كوبەيتۋ كوزدەلىپ وتىر. وسى ماقساتتا قالاعا جاڭا اۋەجاي, تەمىر جول ۆوكزالى مەن اۆتوۆوكزال, سەرۆيستىك قىزمەت كورسەتەتىن الەۋمەتتىك مادەني نىساندار سالىپ, ولارعا قاجەتتى ينجەنەرلىك ينفراقۇرىلىمدى جۇرگىزۋ جوسپارلانۋدا», دەدى ج.تۇيمەباەۆ.
كەزدەسۋ بارىسىندا ءبىر اڭعارعانىمىز, كاسىپكەرلەر تاراپىنان كومەكتەسۋگە دايىندىعىن بىلدىرگەندەر بايقالا قويمادى. كەرىسىنشە «بىزگە جوبالاردى جۇزەگە اسىرۋعا قارجى بولىنسە» دەگەندى ايتىپ, بەرگىسى ەمەس, العىسى كەلەتىنىن ەمەۋرىنمەن تانىتقاندار تابىلدى.
اسا قۇلشىنىس بىلدىرگەندەر بولماعان سوڭ, وبلىستىق ءماسليحات حاتشىسى قايرات بالابيەۆ مەملەكەت باسشىسىنىڭ 26 جىل بويى كاسىپكەرلەرگە جاردەم كورسەتىپ كەلگەنىن, ەندىگى كەزەكتە ىسكەر ازاماتتار ەلگە, مەملەكەتكە قىزمەت ەتەتىن ۋاقىت جەتكەنىن ايتىپ قامشىلاعانداي دا بولدى. سونداي-اق حاتشى كاسىپكەر ۇلىنىڭ سپورتتىق كەشەن – فيتنەس ورتالىعىن سالۋدى ۇيعارىپ قويعانىن جەتكىزدى. وبلىس اكىمى دە كاسىپكەرلەردىڭ مەملەكەتتەن العان كومەكتەرىن ۇمىتپاعانىن قالايتىنىن ءبىلدىردى. «كىم نە العانىن وزدەرى جاقسى بىلەدى. ەندى سونى قايتاراتىن كەز كەلدى», دەدى ج.تۇيمەباەۆ.
دەگەنمەن, جاڭا وبلىس ورتالىعىن دامىتۋعا كومەك كورسەتە باستاعان كاسىپكەرلەر دە جوق ەمەس. ماسەلەن, ەسىمى ەلگە ءمالىم بيزنەسمەن, وبلىستىق ءماسليحات دەپۋتاتى سەرىكجان سەيىتجانوۆ قوناقۇي سالۋدى باستاپ كەتسە, تۇرىكتىڭ ءبىر ىسكەر ازاماتى دا بەس جۇلدىزدى ەكىنشى قوناقۇيدى تۇرعىزۋدىڭ جوباسىن جاساپ قويىپتى.
يگى ىسكە شىمكەنت قالاسىنىڭ اكىمدىگى دە اتسالىسپاق. وسى ورايدا تۇركىستان وبلىسى مەن شىمكەنت قالاسى əكىمدىكتەرىنىڭ اراسىندا مەموراندۋم جاسالدى. «ەلباسى پارلامەنت پالاتالارىنىڭ بىرلەسكەن وتىرىسىندا تۇركىستان مەن شىمكەنتتى دامىتۋ مəسەلەسىنە ەرەكشە توقتالىپ ءوتتى. قىرعىزستاندا وتكەن تۇركى مەملەكەتتەرى باسشىلارىنىڭ كەڭەسىندە دە تۇركىستاننىڭ ماڭىزدىلىعىنا ءمان بەردى. شىمكەنت – تۇركىستان وبلىسىنا ەڭ جاقىن قالا. سوندىقتان ءوڭىردىڭ دامۋىنا ءبىرىنشى كەزەكتە شىمكەنت قالاسىنىڭ قوسار ۇلەسى زور. ءبىز ءبىر-ءبىرىمىزدى قولداي وتىرىپ, وبلىس پەن قالانى, سول ارقىلى رەسپۋبليكامىزدى دامىتا بەرۋىمىز كەرەك», دەدى جانسەيىت قانسەيىت ۇلى.
سونداي-اق وبلىس اكىمى قالانىڭ ەرتەڭگى كەلبەتىنە قاتىستى بىرقاتار ۇسىنىسىن جەتكىزدى. مىسالى قالاداعى ۇيلەردىڭ بيىكتىگىن 5 قاباتتان اسىرماي, سايالى ەتۋ, كولىك قوزعالىسىن ازايتۋ ءۇشىن كوشەلەردىڭ ەنىن كەڭەيتپەۋ قاجەتتىگىن ايتتى.
تۇركىستاندا 66 تويحانا بار ەكەن, ولاردى باسقا ماقساتتا پايدالانۋ جولىن قاراستىرۋ دا ماڭىزدى. ال شىمكەنت قالاسىنىڭ əكىمى عابيدوللا ءƏبدىراحىموۆ باس جوسپار بەكىتىلگەن سوڭ, تۇركىستانعا ەڭ ءبىرىنشى بولىپ ۇلكەن عيمارات سالىپ بەرۋگە ءۇشىنشى مەگاپوليس ءازىر ەكەندىگىن مالىمدەدى.
جيىنعا قاتىسۋشىلار تۇركىستان قالاسىن دامىتۋ ماقساتىندا جاسالعان جوبالارمەن تانىستى.
عالىمجان ەلشىباي,
«ەگەمەن قازاقستان»
تۇركىستان وبلىسى