استانادا 5-7 قىركۇيەك ارالىعىندا قازاقستاننىڭ بارلىق ءوڭىرى مەن ليتۆالىق كوماندالاردىڭ قاتىسۋىمەن جەدەل مەديتسينالىق جاردەم بريگادالارىنىڭ III رەسپۋبليكالىق جارىسى ءوتتى. ءىس-شارانىڭ نەگىزگى ماقساتى – ۇلتتىق جانە حالىقارالىق ستاندارتتاردى ەسكەرە وتىرىپ, حالىققا شۇعىل مەديتسينالىق كومەك كورسەتۋ داعدىلارىن دامىتۋ.
جارىس بارىسىندا قاتىسۋشىلار انافيلاكتيكالىق شوك, نارەستەنى رەانيماتسيالاۋ, جاراقات الۋ كەزىندەگى سيتۋاتسيالىق تاپسىرمالاردى ورىنداپ, «وقيعا» ورنىندا مانەكەندەر جانە ستاندارتتالعان پاتسيەنتتەر پايدالانىلدى. اۋقىمدى شارا اياسىندا سارسەنبى كۇنى قالالىق جەدەل مەديتسينالىق جاردەم ستانساسىنىڭ كونفەرەنتس-زالىندا شۇعىل جاعدايلار بويىنشا «استانا» كلينيكالىق ورتالىعىنىڭ جەتەكشى ماماندارىنىڭ قاتىسۋىمەن رەسەي, يزرايل, قحر, مالايزيا جانە باسقا ەلدەر وكىلدەرىنىڭ شەبەرلىك سىنىپتارى ۇيىمداستىرىلدى. جيىننىڭ اشىلۋىنا قاتىسقان دەنساۋلىق ساقتاۋ ءمينيسترى جەدەل جاردەم بريگادالارىنىڭ جارىسىن وتكىزۋ تاجىريبە الماسۋعا, ءبىلىم مەن بىلىكتى شىڭداۋعا ىقپال ەتەتىن ماڭىزدى شارا ەكەنىن اتاپ ءوتتى.
«وسىمەن 3 جىل قاتارىنان ۇيىمداستىرىلىپ وتىرعان وسىناۋ جارىسقا بىلتىر ەلىمىزدىڭ 6 وڭىرىنەن عانا كوماندالار قاتىسقان بولاتىن. بيىل ولاردىڭ سانى ارتىپ, 17 كومانداعا جەتكەنىنە قۋانىشتىمىز. جارىستى وتكىزۋدەگى باستى ماقساتتىڭ ءبىرى – جەدەل جاردەم جۇمىسىنىڭ ساپاسىن كوتەرۋ, حالىقارالىق ستاندارتتارعا كوشۋ. وتكەن جىلى دەنساۋلىق ساقتاۋ مينيسترلىگىنىڭ تاراپىنان جەدەل جاردەم جۇمىسىن جەتىلدىرۋگە, ەمحانالار قىزمەتىن ودان ءارى دامىتۋ جونىندە بۇيرىق شىعارعان بولاتىنبىز. ويتكەنى بۇل سالا اسا ماڭىزدى. ەلىمىزدەگى ورىن الىپ جاتقان ءولىم سانىنىڭ ءوسۋى كوبىنەسە وسى جەدەل مەديتسينالىق كومەكتىڭ دەر كەزىندە جەتپەۋى جاعدايلارىنان تۋىنداۋدا. سول سەبەپتى مەديتسينالىق قىزمەت ساپاسىن ارتتىرۋ ماقساتىندا وسى شارانى قولعا الدىق», دەدى ە.ءبىرتانوۆ.
دەنساۋلىق ساقتاۋ مينيسترلىگى جانە استانا قالاسى اكىمدىگىنىڭ قولداۋىمەن دەنساۋلىق ساقتاۋ مينيسترلىگىنىڭ قوعامدىق دەنساۋلىق ساقتاۋ ۇلتتىق ورتالىعى, استانا قالاسى قوعامدىق دەنساۋلىق ساقتاۋ باسقارماسى جانە «استانا» وقۋ-كلينيكالىق ورتالىعىنىڭ ۇيىتقى بولۋىمەن ۇيىمداستىرىلعان جەدەل جاردەم بريگادالارىنىڭ بيىلعى جارىسى 6-7 قىركۇيەك كۇندەرى «جەرۇيىق» ساياباعىندا ءوتتى.
سونىمەن قاتار توتەنشە جاعدايلارعا قاتىساتىن جەدەل مەديتسينالىق جاردەم بريگادالارىنا سانيتارلىق اۆتوكولىك جانە مەديتسينالىق جابدىقتار تابىستالىپ, كوماندالار ترياج جۇيەسىندە جۇمىس ىستەۋ داعدىلارى مەن كوماندالىق جۇمىستى كورسەتتى. مۇنىمەن قوسا, جارىس شەڭبەرىندە وتاندىق وندىرۋشىلەردىڭ مەديتسينالىق تەحنيكاسىنىڭ, دارىلىك زاتتارىنىڭ كورمەسى ۇيىمداستىرىلدى.
جارىس ناتيجەسىندە ەلىمىزدىڭ ەڭ ۇزدىك جەدەل جاردەم بريگاداسى بولىپ, اقمولا وبلىسىنىڭ كومانداسى تانىلدى. ال ەكىنشى ورىندى جامبىل وبلىسىنان كەلگەن بريگادا ەنشىلەسە, ءۇشىنشى ورىنعا استانالىق جەدەل جاردەم قىزمەتكەرلەرى يە بولدى.
راۋان قايدار,
«ەگەمەن قازاقستان»