نيۋ-يوركتە ءوتىپ جاتقان اقش-تىڭ اشىق بىرىنشىلىگىندە جارتىلاي فينالعا شىققان تەننيسشىلەر تولىقتاي بەلگىلى بولدى. جۇلدە قورى 25 282 400 دوللاردى قۇراعان «ۇلكەن دۋلىعا» ساناتىنداعى ايتۋلى جارىس 8 قىركۇيەكتە مارەگە جەتەدى.
ەرلەر اراسىنداعى جارىستىڭ شيرەك فينالىندا يسپانيالىق رافاەل نادال مەن ارگەنتينالىق حۋان مارتين دەل پوترو كۇش سىناسادى. قازىرگى كەزدە الەمنىڭ ءبىرىنشى راكەتكاسى اتانىپ وتىرعان پيرەنەي تۇبەگىنىڭ تۇلەگى شيرەك فينالدا اۆستريالىق دومەنيك ءتيمدى تۇزە بۇكتىرسە, اتر تىزىمىندە ءۇشىنشى ورىندا تۇرعان وڭتۇستىك امەريكانىڭ وعلانى امەريكالىق دجون يزنەردى جەڭدى.
كەلەسى جارتىلاي فينالدا جاپونيالىق كەي نيشيكوري مەن سەربيالىق نوۆاك دجوكوۆيچ كەزدەسەدى. وسىنىڭ الدىنداعى باسەكەدە ۇزدىكتەر رەيتينگىندە 19 ساتىعا جايعاسقان كۇن شىعىس ەلىنىڭ قىرانى حورۆاتيالىق مارتين چيليچتەن ايلاسىن اسىرسا, الەمنىڭ التىنشى راكەتكاسى دەگەن اتاعى بار قارت قۇرلىق وكىلىنىڭ اۆستراليالىق دجون ميللماننان مەرەيى ۇستەم بولدى.
ايەلدەر اراسىنداعى جارتىلاي فينالدىق مەجەدە امەريكالىق سەرەنا ۋيليامس پەن لاتۆيالىق اناستاسيا سەۆاستوۆا شەبەرلىك بايقاسادى. ۇزاق جىلدار بويى الەمدىك كوشتى باستاعان اقش اتاقتى تەننيسشىسى بۇل كۇندەرى نەبارى 26 ورىندى يەلەنۋدە. ال WTA تىزىمىندە 18 ورىندا تۇرعان بالتىق جاعالاۋىنان كەلگەن ويىنشى ءۇشىن وسى مەجەگە جەتۋدىڭ ءوزى ونىڭ سپورتتىق كارەراسىنداعى ەڭ زور تابىس.
كەلەسى جارتىلاي فينالدا امەريكالىق مەديسون كيز بەن جاپونيالىق ناومي وساكا كۇش سىناسادى. الەمدىك رەيتينگتە اقش-تىڭ مىقتىسى 14 ساتىعا تابان تىرەسە, جاپونيانىڭ جۇلدىزى 19 ورىندا تۇر. بىلتىر كيز وسى ءتۋرنيردىڭ اقتىق سىنىندا ويناسا, وساكا ءۇشىنشى كەزەڭدە سۇرەنگەن ەدى. ولاردىڭ ەكەۋى دە ءالى كۇنگە دەيىن «ۇلكەن دۋىلعا» تۋرنيرلەرىندە توپ جارىپ كورمەگەن.
عالىم سۇلەيمەن,
«ەگەمەن قازاقستان»