بۇگىن قىتاي حالىق رەسپۋبليكاسىنىڭ شىعىسىندا ورنالاسقان جۋدۋن قالاسىندا «موتورعا گاز» اتتى تابيعي گازبەن جۇرەتىن تەحنيكانىڭ ەڭ ۇزاق حالىقارالىق اۆتوشەرۋى باستالدى. ءىس-شارا قىتايدىڭ, قازاقستان مەن رەسەيدىڭ ءىرى ەنەرگەتيكالىق كومپانيالارى– «سNPC», «قازمۇنايگاز» ۇك اق جانە «گازپروم» ااق-نىڭ قاتىسۋىمەن ۇيىمداستىرىلدى.
بۇل, گازدى-موتورلى وتىنمەن جۇرەتىن كولىكتەردىڭ اۆتوجارىسى تاريحىنداعى ەڭ ۇلكەن جارىس, ۇزىندىعى 9 881 شاقىرىمدى قۇرايدى. بۇعان قوسا ونىڭ ەلەۋلى بولىگى «باتىس ەۋروپا – باتىس قىتاي» جاڭا حالىقارالىق كولىك ءدالىزى باعىتى بويىنشا قازاقستان رەسپۋبليكاسىنىڭ اۋماعى ارقىلى وتەدى. قىتاي, قازاقستان جانە رەسەي اۋماعىنداعى اۆتوشەرۋ باعىتى: جۋدۋن, سۋتسيان, چجەنچجوۋ, سيان, دينسي, ۋۆەي, تسزيايۋيگۋان, حامي, تۇرفان, ۋسۋ, قورعاس (قىتاي), الماتى, تاراز, تۇركىستان, قىزىلوردا, ارال, اقتوبە (قازاقستان), ورىنبور, المەتەۆسك, قازان, نيجني نوۆگورود, ۆلاديمير, تورجوك جانە سانكت-پەتەربۋرگ (رەسەي) قالالارى ارقىلى وتەدى.
جارىستىڭ قازاقستاندىق بولىگىندە كولىكتەرگە گاز تولتىرۋدى ۇلتتىق گاز وپەراتورى «قازترانسگاز» اق قامتاماسىز ەتەتىن بولادى. جارىسقا قاتىسۋشىلار 4 قازاندا VIII پەتەربۋرگ حالىقارالىق گاز فورۋمىنىڭ اشىلۋى شەڭبەرىندە سانكت-پەتەربۋرگ قالاسىندا مارەگە جەتۋدى جوسپارلادى.
جارىستىڭ سالتاناتتى اشىلۋ راسىمىندە ءسوز سويلەگەن «قازترانسگاز» اق باس ديرەكتورى رۋستام سۋلەيمانوۆ, وسى اۆتوشەرۋدى وتكىزۋ تابيعي گازدى ەكولوگيالىق تازا جانە ۇنەمدى موتورلىق وتىن رەتىندە پايدالانۋدى ناسيحاتتاۋ ءۇشىن شىنايى مۇمكىندىك ەكەندىگىن ايتتى.
«قازىر قازاقستاندا كولىكتىك سەكتوردى جاڭعىرتۋ جانە ونى ديزەلدى وتىننان تابيعي گازعا اۋىستىرۋ ماسەلەسى پىسىقتالۋدا» - دەدى رۋستام سۋلەيمانوۆ. - 2022 جىلعا كولىكتىك سەكتوردىڭ تابيعي گازدى تۇتىنۋىن ون ەسەگە ۇلعايتۋ بولجانىپ وتىر. بۇل ءۇشىن اۆتوماتتى جانە كريوگەندى گاز تولتىرۋ ستانتسيالارى جەلىلەرىن كەڭەيتۋ جوبالارى ىسكە اسىرىلاتىن بولادى. وسى كورسەتكىشتەرگە قول جەتكىزۋ زياندى شىعارىندىلاردىڭ ازايۋىنا, جۇمىس ورىندارىنىڭ ۇلعايۋىنا جانە وتىن شىعىنداۋدى وراسان ۇنەمدەۋگە ەلەۋلى اسەر ەتەدى».
اۆتوجارىس كولونناسى سۇيىتىلعان جانە سىعىمدالعان تابيعي گازبەن جۇمىس ىستەيتىن 17 جۇك جانە جەڭىل اۆتوموبيلدەر مەن اۆتوبۋستاردان تۇرادى. «قازترانسگاز» اق وسى ءىس-شارا شەڭبەرىندە «باتىس ەۋروپا – باتىس قىتاي» تارنسكونتينەنتالدىق كولىك باعىتىنىڭ قازاقستاندىق ۋچاسكەسىندە پەرسپەكتيۆالى گاز تولتىرۋ ينفراقۇرىلىمىنىڭ لوكاتسياسىن ايقىنداۋ مىندەتىن قويىپ وتىر. بۇدان بولەك, اۆتوجارىس تابيعي گازدى ءداستۇرلى وتىن تۇرلەرى اراسىندا موتورلى وتىن رەتىندە پايدالانۋ ارتىقشىلىعىن كورسەتۋدى كوزدەيدى.
ەلىمىزدە گازدى موتور وتىنى رەتىندە قولدانۋدى دامىتۋ جانە اۆتوگاز قۇيۋ بەكەتتەرىن سالۋ ىسىمەن «قازترانسگاز» اق ەنشىلەس كاسىپورنى «كازترانسگاز ونىمدەرى» جشس اينالىسۋدا.
"قازترانسگاز" اق – قازاقستاننىڭ گاز جانە گازبەن جابدىقتاۋ سالاسىنداعى ۇلتتىق وپەراتورى. «قازترانسگاز» اق كومپانيالار توبىنىڭ قۇرامىنا گاز جانە ونى وڭدەۋ ونىمدەرىن وندىرەتىن, تاسىمالدايتىن جانە وتكىزەتىن كاسىپورىندار مەن ۇيىمدار كىرەدى.