قازاقستان رەسپۋبليكاسىنىڭ سىرتقى ىستەر ءمينيسترى قايرات ءابدىراحمانوۆ تۇركىتىلدەس مەملەكەتتەردىڭ ىنتىماقتاستىعى كەڭەسى (تمىك, تۇركى كەڭەسى) سىرتقى ىستەر مينيسترلەرى كەڭەسىنىڭ وتىرىسىنا قاتىستى. وتىرىس 3 قىركۇيەكتە شولپان-اتا قالاسىندا وتەتىن تمىك VI ءسامميتى قارساڭىندا وتكىزىلدى, دەپ حابارلايدى مينيسترلىكتىڭ ءباسپاسوز قىزمەتى.
اتالعان مينيسترلىك كەزدەسۋلەر تۇركى كەڭەسى باسشىلارى وتىرىستارىنىڭ مازمۇندىق جانە ۇيىمداستىرۋشىلىق سۇراقتارىن, سونداي-اق ولارمەن قابىلداناتىن شەشىمدەردى تالقىلاۋ ماقساتىندا جىل سايىن وتكىزىلەدى. كەزدەسۋ بارىسىندا مينيسترلەر باسشىلار كەڭەسى وتىرىسىنىڭ كۇن ءتارتىبى مەن كول قويۋعا جوسپارلانعان قۇجاتتاردىڭ جوبالارىن ماقۇلدادى.
بىشكەكتەگى كەزدەسۋدىڭ قورىتىندىسى بويىنشا 2012 جىلى قازاقستان جانە ازەربايجان پرەزيدەنتتەرىنىڭ باستامالارىمەن قۇرىلعان تۇركى اكادەمياسى مەن تۇركى مادەنيەتى جانە مۇراسى قورىنا قاتىستى بىرقاتار كەلىسىمدەرگە جانە قۇجاتتارعا قول قويىلدى. اتالعان قۇجاتتار جاڭا تۇركى ينستيتۋتتاردىڭ ۇيىمداستىرۋشىلىق جانە قارجىلىق قىزمەتىن رەتتەي وتىرىپ, تۇركى الەمى مەملەكەتتەرى مەن حالىقتارىنىڭ يگىلىگى ءۇشىن ولاردىڭ تابىستى قىزمەتىنە ودان ءارى زور ىقپالىن تيگىزەدى.
تۇركى كەڭەسىنە مۇشە مەملەكەتتەردىڭ سىرتقى ىستەر مينيسترلەرىنىڭ ارنايى شەشىمىمەن ماجارستان تۇركى اكادەمياسى جانىندا باقىلاۋشى مارتەبەسىنە يە بولدى.
تۇركىتىلدەس مەملەكەتتەردىڭ ىنتىماقتاستىعى كەڭەسى 2009 جىلى قازاقستان رەسپۋبليكاسى پرەزيدەنتىنىڭ باستاماسىمەن ناحچىۆان قالاسىندا (ازەربايجان) قۇرىلدى. قازىرگى ۋاقىتتا كەڭەستىڭ قۇرامىنا ازەربايجان, قازاقستان, قىرعىزستان جانە تۇركيا كىرەدى. تۇركى كەڭەسىنىڭ باس حاتشىلىعى ىستانبۇل قالاسىندا (تۇركيا) ورنالاسقان.