ورال قالاسىندا قازاقستان رەسپۋبليكاسىنىڭ كونستيتۋتسياسى كۇنىنە وراي وتكەن سالتاناتتى جيىندا ءبىر توپ قوعام بەلسەندىلەرى مەن ارداگەرلەر مەرەيتويلىق ناگراداعا يە بولدى. ماراپاتتى باتىس قازاقستان وبلىسىنىڭ اكىمى التاي كولگىنوۆ تابىس ەتتى.
- سىزدەردى ەلىمىزدىڭ قاستەرلى مەرەكەلەرىنىڭ ءبىرى – كونستيتۋتسيا كۇنىمەن شىن جۇرەكتەن قۇتتىقتايمىن! ەلباسى نۇرسۇلتان ءابىش ۇلى نازارباەۆ ايتقانداي, ء«بىزدىڭ باستى پارىزىمىز – كونستيتۋتسياعا ۇقىپتى قاراپ, ءوز ەلىمىزدى, تاريحىمىزدى قالاي قۇرمەتتەسەك, ونى دا سولاي قۇرمەتتەۋىمىز قاجەت». كونستيتۋتسيا قوعامنىڭ ديناميكالىق دامۋىنىڭ فاكتورىنا اينالدى. ەڭ باستىسى, تاۋەلسىز قازاقستاننىڭ ءتيىمدى دامۋىن قامتاماسىز ەتتى. مۇنىڭ ءوزى ءبىزدىڭ اتا زاڭىمىزدا بۇكىل ادامزاتتىق قۇندىلىقتار مەن وركەنيەتتىك يگىلىكتەردىڭ قامتىلعانىن ايعاقتايدى. كونستيتۋتسيا مىزعىماس مەملەكەتىمىزدىڭ التىن قازىعى بولعاندىقتان, بارشامىز ەلىمىزدىڭ بۇگىنى مەن بولاشاعى ءۇشىن اتا زاڭىمىزدى قۇرمەتتەپ, قورعاپ جانە ماڭىزدىلىعىن جوعالتپاي ساقتاۋعا ءتيىسپىز. ايبارلى اسقار ەلدى اسقاقتاتار اتا زاڭىمىزدىڭ مەرەكەسى قۇتتى بولسىن! - دەدى التاي كولگىنوۆ.
سالتاناتتى جينالىس اياسىندا التاي كولگىنوۆ ءبىر توپ قوعام بەلسەندىلەرى مەن ەڭبەك ارداگەرلەرىن «استاناعا – 20 جىل» مەرەكەلىك مەدالىمەن ماراپاتتادى. قازاقستان رەسپۋبليكاسىنىڭ جانە ونىڭ استاناسىنىڭ قالىپتاسۋى مەن دامۋىنا قوسقان ەلەۋلى ۇلەسى ءۇشىن عاريفوللا قۇرمانعاليەۆ اتىنداعى باتىس قازاقستان وبلىستىق فيلارمونيانىڭ ءانشىسى حاتيموللا بەردىعاليەۆ, ەڭبەك ارداگەرلەرى سوفيا يمانعاليەۆا, روزا كوجەكوۆا, كلارا سارجانوۆا, ءنابيا سەيتقاليەۆا, باتەس ىسماعۇلوۆا, باتىس قازاقستان وبلىستىق ءماسليحات حاتشىسى مالىك قۇلشار, باتىس قازاقستان وبلىستىق اۋرۋحانانىڭ ەمحانا مەڭگەرۋشىسى سەرگەي مەلنيكوۆ, حاديشا بوكەەۆا اتىنداعى باتىس قازاقستان وبلىستىق تەاترىنىڭ اكتەرى سەردەش قاجىمۇراتوۆ, «وتدەلستروي» جشس قۇرىلىس كومپانياسىنىڭ ديرەكتورى ۆالەنتينا ميحنو, «بقو ۇكىمەتتىك ەمەس قوعامدىق عىلىمي ۇيىمى» قوعامدىق بىرلەستىگىنىڭ ءتورايىمى زاحوت مۇحليسوۆا, «باتىس قازاقستان ماشينا جاساۋ كومپانياسى» جشس باس ديرەكتورى داۋرەن سيسەنوۆ, كرۋگلووزەرنىي ارناۋلى الەۋمەتتىك قىزمەت كورسەتۋ ورتالىعى مەديتسينا ءبولىمىنىڭ مەڭگەرۋشىسى فارزانا ىسقاقوۆالار ماراپاتتالدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
سۋرەتتى تۇسىرگەن تەمىربولات توقمامبەتوۆ