وسكەمەندەگى قازاق تەاترىنىڭ جاڭا ماۋسىمى و.بوكەيدىڭ «قاسقىر ۇلىعان تۇندە» ليريكالىق دراماسىمەن اشىلادى.
شىعىس قازاقستان وبلىستىق قازاق دراما تەاترى ءوزىنىڭ 19-شى تەاتر ماۋسىمىن 28 قىركۇيەكتە جازۋشى ورالحان بوكەيدىڭ «قاسقىر ۇلىعان تۇندە» اتتى ليريكالىق دراماسىمەن اشادى. قويىلىمنىڭ ينستسەنيروۆكاسىن جاساعان, ءارى رەجيسسەرى - اسىل قوزىقانوۆ. «ەل بولىپ ەسكە الىپ, قۇرمەت تۇتاتىن, بەلگىلى دراماتۋرگ, جازۋشى و.بوكەيدىڭ 75 جىلدىعىنا وراي قويىلاتىن بۇل قويىلىم ءومىردىڭ وزىنەن الىپ جازىلعان شىندىق.
«اقىلشىم – تۋعان جەر,
ۇستازىم – تاكاپپار دا قاتال التاي», جاھاندا ساعان جەتەر سالتاناتتى جەر جوق» - دەپ اسا زور سۇيىسپەنشىلىكپەن جازعان ورالحان بوكەيدىڭ درامالىق شىعارمالارىندا زامان تىنىسى, ادامي قۇندىلىقتار كەلىستى كەسكىندەلەدى. اۆتوردىڭ ءار شىعارماسى تۋعان جەرىنە دەگەن ماحابباتىنان تۋىندايدى. قوعامنىڭ دامۋىنداعى بولىپ جاتقان ءتۇرلى وزگەرىستەر ادام ساناسىنا ىقپال ەتپەي قويمايدى.
سونداي-اق تابيعاتتىڭ دا ادام ومىرىندە اتقاراتىن ءرولى زور. دامىپ جاتقان زامان جەتىستىكتەرىنەن شەت قالعان اۋىل ءومىرى, قوعامدىق كولىكتەگى ساپارلاس قىزبەن جۋرناليست جىگىتتىڭ تاعدىرى اپپاق قارداي جان تازالىعىمەن استاسىپ كەلىپ, ورنى تولماس وكىنىشپەن اياقتالادى. قويىلىمعا كەلىڭىزدەر, و.بوكەيدىڭ تاعى ءبىر شىعارماسىمەن تانىس بولىپ, رۋحاني قورجىندارىڭىزدى تولتىرىڭىزدار», - دەيدى تەاتردىڭ ادەبيەت ءبولىمىنىڭ مەڭگەرۋشىسى شولپان لاقاەۆا.
ازامات قاسىم,
«ەگەمەن قازاقستان»
وسكەمەن