اتا زاڭ – اتا-بابالار ارمانداعان ازاتتىعىڭدى ايقىندايتىن, ەگەمەندىگىڭدى پاش ەتەتىن, تاۋەلسىز ەل ەكەندىگىڭدى تانىتاتىن, دەربەس مەملەكەتتىگىڭدى كورسەتەتىن قاستەرلى قۇجات. اتا زاڭ – ەلدىگىمىزدىڭ تىرەگى, ازاماتتىڭ ارقا سۇيەر التىن ارقاۋى. ءبىزدىڭ كۇللى تىنىس-تىرشىلىگىمىز, ءومىر سالتىمىز, قوعامنىڭ تامىر بۇلكىلى – بارلىعى نەگىزگى زاڭنان باستاۋ الاتىندىعى راس. اتا زاڭ – تال بەسىكتەن, جەر بەسىككە دەيىنگى ۋاقىت ارالىعىندا ءسىزدىڭ قۇقىعىڭىزدى قورعايدى. اتا زاڭ – ەل ازاماتىنىڭ كونستيتۋتسيالىق قۇقىن تانىتاتىن, ءار وتانداسىمىز بۇلجىتپاي ورىندايتىن زاڭداردىڭ التىن ارقاۋى, تەمىرقازىعى. اتا زاڭ – بابالار اماناتى. كەشەگى قاسىمنىڭ «قاسقا جولى», ەسىمنىڭ «ەسكى جولى», ءاز تاۋكەنىڭ «جەتى جارعىسىنىڭ» جالعاسى, زاڭدى مۇراگەرى
– قازاق ەلىنىڭ بۇگىنگى كونستيتۋتسياسى. تاريحتىڭ تەرەڭ قويناۋىنا ۇڭىلەر بولساق, العاشقى قازاق حاندىعى قۇرىلعاندا اتا-بابالار داستۇرىمەن قاتار, 1511 جىلى 19-باپتان تۇراتىن نەگىزگى زاڭ قابىلدانعان. وعان قازاق «قاسىم حاننىڭ قاسقا جولى» دەپ ات قويىپ, ايدار تاققان بولاتىن. ءالى دە سولاي اتالادى. 1690 جىلى تاۋكە حان «جەتى جارعىنى» قابىلدادى. بۇل زاڭ – جەتى ادەتتىك قۇقىقتىق جۇيەدەن تۇراتىن قوعامدىق قاتىناستاردى رەتتەيتىن سالالاردىڭ جيىنتىعى. «جەتى جارعىنى» جاساۋعا ۇلى دالانىڭ داناگوي بيلەرى بەلسەنە اتسالىسىپتى.
اتى اڭىزعا اينالعان اتاقتى تولە بي قايتىس بولار الدىندا ءۇش ءجۇزدىڭ يگى جاقسىلارىن جيناپ الىپ: «اتتىڭ قۇنىن, ەردىڭ قۇنىن, ايەلدىڭ قۇنىن ءوز اقىلىمىزبەن شەشكەن ءجون» دەپ كەڭەس بەرگەن ەكەن. «مالعا سالساڭ باسپايتىن, ۇرساڭ شاپپايتىن جابى بار دا, قۋساڭ جەتەتىن, قاشساڭ قۇتقاراتىن جەلدەن جۇيرىك تۇلپار بار, ەكى ادامنىڭ باسى قوسىلسا وسەك ايتاتىن ايەل بار دا, ءبىر ەلگە انا, پانا بولاتىن ايەل بار. شەشىم ايتقاندا وسىلاردىڭ اراجىگىن اشىپ, ەكشەپ بارىپ, قۇن كەسۋلەرىڭدى وتىنەم», – دەپ اماناتتاپتى ارتتا قالىپ بارا جاتقان ەل اعالارىنا.
اتا زاڭ – ۇلتارالىق تاتۋلىقتىڭ التىن دىڭگەگى. بۇكىل حالىقتىڭ يگىلىگىن كوزدەيتىن كونستيتۋتسيا قوعام مەن بيلىكتىڭ تۇراقتىلىعىن قامتاماسىز ەتىپ قانا قويماي, قازاقستاننىڭ الەم تانىعان مەملەكەتكە اينالۋىنا وڭ ىقپال ەتتى. ەلىمىز زايىرلى مەملەكەت. ەل باسىنا كۇن تۋىپ, ەر ەتىگىمەن سۋ كەشكەن قيىن-قىستاۋ زامانداردا كيىز تۋىرلىقتى قازاق ۇلتىن ۇلت رەتىندە ساقتاپ قالعان بىرلىگى مەن ىنتىماعى دەسەك, ارتىق ايتقانىمىز ەمەس. قازاقستاننىڭ كوپەتنوستى حالقىنىڭ تاتۋلىعى, ىنتىماقتاستىعى, بەيبىتشىلىگى – ءبىزدىڭ ەلىمىزدىڭ ەڭ باستى بايلىعى. ونى كوزدىڭ قاراشىعىنداي ساقتاۋعا تىرىسۋىمىز كەرەك.
مەملەكەت باسشىسىنىڭ ساليقالى ساياساتىنىڭ ارقاسىندا ءبىز قازىرگى كۇنى ەكونوميكالىق جەتىستىكتەرگە, الەۋمەتتىك يگىلىكتەرگە, ساياسي تۇراقتىلىق پەن مادەني وركەندەۋگە قول جەتكىزىپ وتىرمىز. ەلدىڭ قول جەتكەن تابىستارىنا, بىزدەگى ورىن العان تاتۋلىق پەن تۇسىنىستىك جاعدايلارىنا الەمدىك وركەنيەت قىزىعۋشىلىق تانىتۋدا. جەتىستىكتەرىمىز وڭايلىقپەن كەلىپ جاتقان جوق. بۇل ەڭ الدىمەن ىنتىماقتاستىعىمىز بەن بىرلىگىمىزدىڭ ارقاسىندا جەتىپ وتىرعان يگىلىكتى ناتيجەلەر. ءبىزدىڭ ماقساتىمىز – قازاق جەرىن مەكەن ەتكەن حالىقتىڭ اۋىزبىرلىگىن بۇزباي, مەملەكەتتىڭ الەۋەتىن ارتتىرىپ, الەمدىك كوشتەن كەنجە قالماي, دامىعان 30 ەل قاتارىنان كورىنۋ. وسى ورايدا كونستيتۋتسيا قاعيداتتارىنا ادال بولىپ, وعان قۇرمەتپەن قاراۋدىڭ ماڭىزى زور. ويتكەنى اتا زاڭىن باعالاي بىلگەن ەل عانا الدىڭعى قاتاردان كورىنەدى.
گاۋحار الدامبەرگەنوۆا,
قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى, پەداگوگيكا عىلىمدارىنىڭ دوكتورى, پروفەسسور