ەرلان اۋكەنوۆ الماتى قالاسى اكىمىنىڭ جاڭا ورىنباسارى بولىپ تاعايىندالدى, دەپ حابارلايدى قالا اكىمدىگىنىڭ ءباسپاسوز قىزمەتى.
اكىم ورىنباسارى قىزمەتىن بۇعان دەيىن مۇرات دارىباەۆ اتقارعان ەدى. ونىڭ باسقا قىزمەتكە اۋىسۋىنا بايلانىستى ورنىنا ەرلان اۋكەنوۆ كەلدى. الماتى قالاسىنىڭ باسشىسى باۋىرجان بايبەك مۇرات دارىباەۆقا اتقارىلعان ەڭبەگى ءۇشىن العىس ايتىپ, ساتتىلىك تىلەدى.
ەرلان اۋكەنوۆ الماتى اكىمدىگىندە كولىك, الەۋمەتتىك سالا, حالىقتى ەڭبەكپەن قامتۋ جانە توتەنشە جاعدايلار ماسەلەلەرىنە جاۋاپ بەرەدى.
ايتا كەتەيىك, ە.اۋكەنوۆ 2015 جىلدىڭ تامىز ايىندا الماتى اكىمىنىڭ ورىنباسارى بولىپ تاعايىندالىپ, ەكى جىلدان كەيىن شەتەلگە وقۋعا تۇسۋىنە بايلانىستى جۇمىسىنان ۋاقىتشا بوساتىلعان ەدى. ول يندۋستريالدى-يننوۆاتسيالىق دامۋ, ساۋدا, شاعىن جانە ورتا بيزنەستى دامىتۋ ماسەلەلەرىنە جاۋاپتى بولدى.
«ەرلان اۋكەنوۆ «قالالاردى دامىتۋ» باعدارلاماسى بويىنشا لوندوننىڭ ەكونوميكا جانە ساياسي عىلىمدار مەكتەبىنىڭ ماگيستراتۋراسىن اياقتاعاننان كەيىن الماتى اكىمىنىڭ ورىنباسارى لاۋازىمىنا قايتا ورالدى. ول وقۋ بارىسىندا ۋربانيزاتسيا, قالا اگلومەراتسياسىن قالىپتاستىرۋ, ەكونوميكالىق ايماقتاردى قۇرۋ, كولىك جۇيەسى مەن ينفراقۇرىلىمدى دامىتۋ, سونداي-اق ولاردىڭ الەۋمەتتىك-ەكونوميكالىق پروتسەستەرگە جانە قالا ەكولوگياسىنا ىقپالى ماسەلەلەرى بويىنشا ءبىلىم الدى. شاعىن جانە ءىرى مەگاپوليستەرگە «Green Economy» جانە «Resilient city» زاماناۋي تۇجىرىمداماسىن ەنگىزۋگە قاتىستى الەمدىك تاجىريبە زەردەلەندى», دەلىنگەن قالا اكىمدىگىنىڭ ءباسپاسوز قىزمەتى تاراتقان اقپاراتتا.