باتىس قازاقستان وبلىسى بيىل جەرگىلىكتى بيۋدجەت ەسەبىنەن قارجى ءبولىپ, تەحنيكالىق جانە كاسىبي مامان دايىنداۋ ءۇشىن جەرگىلىكتى كوللەدجدەر مەن ليتسەيلەرگە 3500 گرانت بولگەن ەدى. ودان بولەك جوعارى ءبىلىمى بار كادرلاردى دايارلاۋعا تاعى 100 گرانت جاريالانىپ, يەسىن تاپتى. ەندى وقىتۋشىلار مەن مۇعالىمدەردىڭ ءوزى ءبىلىمىن جەتىلدىرۋى ءۇشىن وبلىس بيۋدجەتى ەسەبىنەن شەتەلدەرگە جىبەرىلمەك.
– ءبىز وقىتۋشىلاردىڭ كاسىبي بىلىكتىلىگىنە ەرەكشە نازار اۋدارىپ وتىرمىز. وتكەن جىلى وڭىردەگى كوللەدجدەردەن 16 پەداگوگ مالايزيا, چەحيا, ۇلىبريتانيا, گەرمانيا جانە فينليانديا سياقتى ەلدەردە ءبىلىمىن جەتىلدىرىپ قايتتى. بۇعان قوسا 100-دەن اسا كوللەدج وقىتۋشىسى مەن شەبەرى اعىلشىن ءتىلى كۋرسىنان ءوتتى. بۇگىندە 5 كوللەدجدە ارناۋلى پاندەر مەن ينفورماتيكا ساباعى اعىلشىن تىلىندە وتەدى. وسى كۇزدە ورال مۇناي, گاز جانە سالالىق تەحنولوگيالار كوللەدجىنىڭ 10 وقىتۋشىسىن ءۆىم (Building Information Modeling) تەحنولوگيا ءپانىن تەرەڭ مەڭگەرۋ ءۇشىن فينلياندياعا جىبەرگەلى وتىرمىز. بيىلعى وقۋ جىلىنان باستاپ ورال قالاسى مەن اۋدان ورتالىقتارىندا باعدارلامالاۋ نەگىزدەرى مەن روبوت تەحنيكاسىن تەرەڭدەتىپ وقىتاتىن ءىت-سىنىپتارى اشىلادى, – دەدى وبلىس اكىمى التاي كولگىنوۆ.
بيىلعى تامىز كەڭەسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى ادامي كاپيتال» تاقىرىبىمەن وتۋىندە دە ۇلكەن ءمان بار. ءوڭىر باسشىلىعى جەكە ادامنىڭ كاسىبي جەتىلۋىنە, ءبىلىم دەڭگەيىنىڭ الەمدىك تالاپتارعا ساي كوتەرىلۋىنە دەن قويىپ وتىر. TEDح فورماتىندا ۇيىمداستىرىلعان كونفەرەنتسيادا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما باسشىسى كۇلاش شامشيدينوۆا, «Knouledg Engineering» جشس ديرەكتورى نارتاي ءاشىم, «Astana Garden Schools» باسشىسى, ءبىلىم بەرۋ تەحنولوگيالارى بويىنشا ترەنەر نۇرمۇحاممەد دوسىباەۆ, «Editech» حالىقارالىق ءبىلىم ورتالىعىنىڭ باس ديرەكتورى, پسيحولوگ عاني بەيسەنباەۆ سىندى بىلىكتى ماماندار ءسوز الىپ, ماڭىزدى سالانىڭ بۇگىنى مەن بولاشاعى تۋرالى ويلارىمەن ءبولىستى.
– بيىلعى تامىز كەڭەسى جىلداعىدان وزگەشە. ەرەكشەلىگى سول – ماڭعاز پرەزيديۋم دا, كولدەي باياندامالار دا, تريبۋنادان ەسەپ بەرۋ دە بولعان جوق. شاقىرىلعان سپيكەرلەردىڭ ارقايسىسى ءبىر مەكتەپ, ءبىر لەكتوري. اتاپ ايتقاندا, كۇلاش نوعاتايقىزى – قازىرگى زامانعى مىقتى قوعام قايراتكەرى, ەلىمىزدەگى ءبىلىم بەرۋدىڭ جاڭا فيلوسوفياسىن, جاڭا مازمۇنى مەن ادىستەمەسىن قۇراستىرىپ قانا ەمەس, مەكتەپتەرگە ەنگىزۋدى ابىرويمەن ىسكە اسىرىپ كەلەدى, – دەيدى جاھانشا دوسمۇحامەد ۇلى اتىنداعى ورال پەداگوگيكالىق كوللەدجىنىڭ ديرەكتورى سۆەتلانا باقىشەۆا.
وبلىستىڭ ءبىلىم سالاسىندا تسيفرلاندىرۋ ءىسى دە قارقىندى جۇرۋدە. ءبىلىم بەرۋ سالاسىنداعى ساپا مەن اشىقتىقتى قامتاماسىز ەتەتىن وسى جۇيەنىڭ ارقاسىندا اتا-انا بالاباقشاعا بالاسىن ونلاين رەجىمدە ورنالاستىرا الادى. بالانىڭ مەكتەپتەگى ساباق ۇلگەرىمىن دە ە-كۇندەلىك جۇيەسى ارقىلى باقىلاپ وتىرۋعا بولادى. وڭىردەگى شالعاي اۋىلداردا شاشىراپ جاتقان شاعىن مەكتەپتەردە ء«بىلىم book» ەلەكتروندى جوباسى ەنگىزىلگەن. ياعني 226 شاعىن جيناقتى مەكتەپ باعدارلاماسى توقسان سايىن جاڭارتىلىپ تۇراتىن ء«بىلىم book» نوۋتبۋكتەرىن پايدالانادى. ەڭ وزىق باعدارلامالار, ساباق ۇلگىلەرى ءۇش تىلدە جۇكتەلگەن بۇل كومەكشى قۇرالعا ينتەرنەتتىڭ قاجەتى جوق, اۆتونومدى قىزمەت ەتەدى.
تاعى ءبىر جاڭالىق, وبلىستا پەداگوگيكالىق, يندۋستريالدىق جانە سپورتتىق باعىتتا ءبىلىم بەرەتىن ۇلگىلى ءۇش كوللەدج قۇرۋ قولعا الىنباق. الەمنىڭ وزىق وقۋ مەتوديكاسى, زاماناۋي جابدىقتار مەن كرەاتيۆتىك ويلاۋ جۇيەسى كەشەندى كورىنىس تاباتىن مۇنداي ءبىلىم ورداسى وڭىردەگى وزگە كوللەدجدەرگە تاجىريبە تاراتىپ, العا سۇيرەيتىن لوكوموتيۆ قىزمەتىن اتقاراتىن بولادى.
– ءبىز 3-6 جاس ارالىعىنداعى سابيلەردى مەكتەپكە دەيىنگى تاربيە ورىندارىمەن تولىق قامتىدىق. 2018 جىلدان باستاپ ورال قالاسى مەن ءبورلى اۋدانىندا بالاباقشا كەزەگىنە تۇرۋ اۆتوماتتىق جۇيەگە كوشتى. جىل سوڭىنا دەيىن بۇل ءۇردىس بارلىق اۋدان ورتالىقتارىنا ەنگىزىلەدى. وبلىستا ء«باتىسبىلىمTallks» ءبىلىم بەرۋ لەكتورياسى جانە ء«وسۋ ۆەكتورى» اتتى ليدەرلىك مەكتەپ جوباسى قولعا الىندى. بۇل ءوڭىر پەداگوگتارىنىڭ كاسىبي بىلىكتىلىگىن ارتتىرۋعا باعىتتالعان ەڭ جاڭا باعدارلاما, – دەيدى وبلىستىق ءبىلىم باسقارماسىنىڭ باسشىسى شولپان قادىروۆا.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى