پەتروپاۆلدا 630 ادامعا ارنالعان مەشىت اشىلدى

مەشىتتىڭ اشىلۋ سالتاناتىنا  قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي سەرىكباي قاجى وراز, ايماق باسشىسى قۇمار اقساقالوۆ, پارلامەنت سەناتىنىڭ دەپۋتاتى ەرىك سۇلتانوۆ, ءماجىلىس دەپۋتاتى اباي تاسبولاتوۆ,  رەسپۋبليكامىزدىڭ وزگە وڭىرلەرىنەن, رەسەيدىڭ شەكارالاس ايماقتارىنان قوناقتار قاتىستى.

جينالعان قاۋىم الدىندا  قۇمار ىرگەباي ۇلى, ەرىك حامزا ۇلى ءسوز سويلەپ, ەڭسەلى مەشىتتىڭ بوي كوتەرۋى مۇسىلماندار جاماعاتى ءۇشىن ايتۋلى وقيعا سانالاتىنىن, ءبىر شاڭىراق استىندا تۇرىپ جاتقان ءتۇرلى ءدىني كونفەسسيالاردىڭ تىلەگى ەل بىرلىگى ەكەنىن جەتكىزدى. باس ءمۇفتي س. وراز عيباداتحاناعا قاسيەتتى قۇران-كارىمدى  تارتۋ ەتتى. «قىزىلجار ورتالىق مەشىتىنىڭ» نايب يمام قىزمەتىن اتقارىپ كەلگەن قاسىمحان قاجى يساەۆتىڭ باس يمام بولىپ تاعايىندالعانىن جاريا ەتتى. «اق نيەت» قوعامدىق قورى قامقورشىلىق كەڭەسىنىڭ توراعاسى قۇدايبەرگەن قاليەۆ 1,4 گەكتار جەر ءبولىنىپ, قۇرىلىس جۇمىستارىنا  جەكەلەگەن ادامدار, كاسىپكەرلەر, كاسىپورىندار قاراجاتپەن كومەكتەسىپ, ساۋاپتى ءىس  اتقارعاندارىن ايتتى.

جوبانىڭ اۆتورى ءارى باس ساۋلەتشىسى ساعىندىق جانبۇلوۆتىڭ ايتۋىنشا 2,7 مىڭ شارشى مەتر اۋماقتا ورنالاسقان عيماراتتى سالۋدا بىرەگەي ساۋلەت ۇلگىسى باسشىلىققا الىنعان. ءداستۇرلى مۇسىلماندىق جانە قازاقى ەلەمەنتتەر توعىسقان. ءىشى-سىرتى ويۋ-ورنەكتەرمەن اشەكەيلەنگەن. اقشىل سارى تۇسپەن بويالىپ, قالاداعى ايشىقتى ورىنعا اينالعان. ءۇش دەڭگەيلى, التىن تۇستەس كۇمبەزدەر مەن  بيىكتىگى 33 مەتردى قۇرايتىن سيممەتريالىق كوپقىرلى ءتورت مۇناراسى, نەكە قيۋ زالى, اۆتوتۇراق, 500 ورىندى اسحانا, ءدىني راسىمدەر ورىندالاتىن ارنايى ورىندار بار.

الداعى ۋاقىتتا مەشىتتىڭ  ماڭايىنا  سۋبۇرقاق ورناتىلىپ, كىشى ساياباق اشىلىپ, اباتتاندىرىلاتىن بولادى.

ءومىر ەسقالي

«ەگەمەن قازاقستان»

سولتۇستىك قازاقستان وبلىسى.