وبلىستىق قوعامدىق كەڭەس وسىدان ەكى جىل بۇرىن قۇرىلعان بولاتىن. بۇل جولى ونىڭ مۇشەلەرى العاشقى سەزدە باس قوسىپ, جۇمىس ناتيجەلەرىن قورىتىندىلادى.
القالى باس قوسۋدا وسى كەزەڭدە اتقارىلعان شارالارعا تالداۋ جاسالىپ, شەشىمىن تاپپاي جۇرگەن تولعاقتى ماسەلەلەر تالقىلاندى.
«ەلىمىزدە 200-گە جۋىق قوعامدىق كەڭەس بولسا, 15-ءى ءبىزدىڭ وڭىردە جۇمىس ىستەيدى. ولار ارالاسپايتىن سالا كەمدە كەم. جەرگىلىكتى بيۋدجەتتى بەكىتۋگە,ورىندالۋىنا, جۇرتشىلىقتىڭ ارىز-شاعىمدارىندا ايتىلعان پروبلەمالاردىڭ شەشىلۋىنە بەلسەنە اتسالىسادى.تۇرعىنداردىڭ الەۋمەتتىك جاعدايى اركەز باستى نازارىمىزدا. جۇرتشىلىقتى جول قاتىناسى, اۋىز سۋ جاعدايى كوبىرەك تولعاندىرادى. وسىعان وراي كەڭەس مۇشەلەرى جوندەۋ جۇمىستارىنىڭ ساپاسىن قاداعالايتىن جاڭا جۇيەنى ەنگىزۋ تۋرالى ۇسىنىس ەنگىزدى. ەسىل اۋدانىنىڭ پوكروۆكا-يلينكا باعىتىنداعى تاس جولدى قالپىنا كەلتىرۋگە 120 ميلليون تەڭگە بولىنگەنىمەن, ساپا جايى قاناعاتتاندىرمايدى», دەيدى قوعامدىق كەڭەستىڭ توراعاسى قايىرلى ەدىرەسوۆ.
بيىلدان باستاپ «قوعامدىق باقىلاۋ كارتاسى» ەنگىزىلىپ, 50-دەن استام ادام ونىڭ قىزمەتىنە جۇگىنگەن. جۇرتشىلىقتىڭ ساۋالدارى, حابارلامالارى جانە مونيتورينگتىك تالداۋلار بويىنشا مەملەكەتتىك باعدارلامالاردىڭ ورىندالۋى, قارجىنىڭ ماقساتتى جۇمسالۋى قاداعالانادى. اۋىلدىق وكرۋگتەردە سەنىم تەلەفونوندارى ورناتىلعان.
اقجار اۋداندىق قوعامدىق كەڭەستىڭ توراعاسى بەكتۇرسىن قاسەيىنوۆتىڭ ايتۋىنشا اۋدان رەسەيمەن شەكارالاس ايماقتا ورنالاسقان. كەڭەس كەزىندە تارتىلعان جول ءالى جوندەۋ كورمەگەن. اۋىز سۋ جۇيەسى جەكە مەنشىكتىڭ يەلىگىندە بولعانداقتان, تىرشىلىك ءنارىن بوساتۋ گرافيگى ساقتالا بەرمەيدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى