الماتىدا جۇرەگىنە وپەراتسيا جاساتقان بالانىڭ ءحالى اۋىر

قاناياتتىڭ ايتۋىنشا, ماۋسىم ايىندا تۇماۋ ءتيىپ اۋىرعان بالاسىن  ۇزىناعاشتاعى اۋرۋحاناعا اپارىپ, وكپەسىن رەنتگەنگە تۇسىرگەن. رەنتگەن  ناتيجەسى بويىنشا مىڭباەۆ اۋىلى اۋرۋحاناسىنداعى دارىگەرلەر جۇرەگىن ۋدز-عا تۇسىرۋگە پەريناتولوگيا جانە بالالار كارديوحيرۋرگيا ورتالىعىنا جىبەرەدى. ال ونداعى دارىگەرلەر  بالانىڭ جۇرەگىندە تەسىك بار ەكەنىن ايتىپ, جەدەل وپەراتسياعا دايىندايدى. ءسويتىپ 11 شىلدە اۋرۋحاناعا جاتقىزىلعان بالاعا 17 شىلدەدە پەريناتولوگيا جانە بالالار كارديوحيرۋرگيا ورتالىعىندا وپەراتسيا جاسالادى.

«دارىگەر وپەراتسيانىڭ ءساتتى وتكەنىن ايتىپ, بالانى ءبىر اپتاعا دەيىن ۇيقى ءدارى بەرىپ وياتپاۋ كەرەك ەكەنىن جەتكىزدى. بالام 10 كۇن جانساقتاۋ بولىمىندە ەس-ءتۇسسىز جاتتى. ءدارىنى توقتاتقان سوڭ دا 3-4 كۇنگە دەيىن ەسىن جيمادى. بالام كوزىن اشقاندا ەكى كوزى دە كورمەيتىن, قول-اياعى جانسىز, دەنەسىنە جارالار شىققان بولىپ شىقتى. نەۆروپاتولوگ دارىگەر مي قانتامىرىنا قان جەتىسپەيدى دەگەن دياگنوز قويدى. 25 تامىزدا الماتى وبلىستىق بالالار كلينيكالىق اۋرۋحاناسىنا اۋىستىردى. بىراق بالادا وڭ وزگەرىس جوق», دەيدى قانايات ابدىبەك ۇلى.

ءبىز بۇل ماسەلە بويىنشا پەريناتولوگيا جانە بالالار كارديوحيرۋرگيا ورتالىعىندا نۇرايىم قاناياتقا جاۋاپتى بولعان دارىگەر, بالالار كارديوحيرۋرگى قايرات قۋاتبەكوۆكە حابارلاستىق. دارىگەر وپەراتسياعا كىرىپ بارا جاتقانىن ايتىپ,  تەلەفون ارقىلى جاۋاپ بەرمەيتىنىن جەتكىزدى. «وپەراتسياعا كىرگەلى تۇرمىن... ول بالا قازىر ءبىزدىڭ اۋرۋحانادا جاتقان جوق. سوندىقتان دا ايتا المايمىن. تەك تۋا ءبىتتى جۇرەك اقاۋى, جۇرەك ىشىندەگى قارىنشا ارالىق پەردە اقاۋى, وكپە تامىرىنىڭ گيپەرتەنزياسى بار ەكەنىن عانا بىلەمىن. ناقتىسىن ايتۋ ءۇشىن اۋرۋ تاريحىنا قاراۋ كەرەك», دەدى ق.قۋاتبەكوۆ.

ىلە-شالا الماتى وبلىستىق بالالار كلينيكالىق اۋرۋحاناسىنا حابارلاسىپ, نۇرايىمنىڭ قازىرگى دارىگەرى عازيزا بيساليەۆادان ناۋقاستىڭ قازىرگى حال-جاعدايىن سۇرادىق. «اۋرۋحانانىڭ اكىمشىلىگىنەن رۇقسات العان سوڭ عانا جاۋاپ بەرەمىن. رۇقسات بولماسا ەشقانداي اقپارات بەرمەيمىز. ونداي اقپاراتتى تەك قانا اتا-اناسىنا بەرەمىز», دەدى ول.

بالانىڭ دياگنوزدارى جازىلعان انىقتامانى استاناداعى كارديولوگ مامانعا وقىتقانىمىزدا «بالادا جۇرەكتىڭ قارىنشاارالىق قالقانىنىڭ كەمشىلىگى بار دەگەن دياگنوز قويىلعان.  سول كەمشىلىكتى تىگۋ ءۇشىن وپەراتسيا جاسالعان. وتادان كەيىن ءسىڭىر تارتۋ ەپيزودى بولعان. ءبولىم مەڭگەرۋشىسىمەن بىرگە قاراۋ جۇرگىزگەندە بالانىڭ مي قان اينالىمى بۇزىلعان دەپ دياگنوز قويىلىپتى. وكۋليست كوز تامىرلارىنىڭ زاقىمدالۋى وتتەگىنىڭ جەتىسپەۋشىلىگىنەن ەكەنىن ايتقان. بۇل انىقتاما بويىنشا بارلىق ماسەلە ميدىڭ قان اينالىمىنىڭ بۇزىلۋىنان بولىپ تۇر. كونسيليۋم جيناپ, ءبىر شەشىمگە كەلۋ كەرەك», دەدى.

رەداكتسيا بۇل ماسەلەنى ەگجەي-تەگجەيلى انىقتاۋ ءۇشىن الداعى ۋاقىتتا بارلىق جاعدايدى نازاردا ۇستايدى.

مايگۇل سۇلتان,

«ەگەمەن قازاقستان»