قازاقستان رەسپۋبليكاسى ۇكىمەتىنىڭ قاۋلىسى №1212

2011 جىلعى 28 قازان, استانا, ۇكىمەت ءۇيى ۇزاق مەرزىمدى ورمان پايدالانۋ كەزىندە ورمان پايدالانۋشىلار  ازىرلەيتىن ورتكە قارسى ءىس-شارالار جوسپارلارىنا قويىلاتىن تالاپتاردى ايقىنداۋ تۋرالى قازاقستان رەسپۋبليكاسىنىڭ 2003 جىلعى 8 شىلدەدەگى ورمان كودەكسىنىڭ 12-بابىنىڭ 17) تارماقشاسىنا سايكەس قازاقستان رەسپۋبليكاسىنىڭ ۇكىمەتى قاۋلى ەتەدى: 1. قوسا بەرىلىپ وتىرعان ۇزاق مەرزىمدى ورمان پايدالانۋ كەزىندە ورمان پايدالانۋشىلار ازىرلەيتىن ورتكە قارسى ءىس-شارالار جوسپارلارىنا قويىلاتىن تالاپتار بەكىتىلسىن. 2. وسى قاۋلى العاشقى رەسمي جاريالانعان كۇنىنەن باستاپ كۇنتىزبەلىك ون كۇن وتكەن سوڭ قولدانىسقا ەنگىزىلەدى. قازاقستان رەسپۋبليكاسىنىڭ پرەمەر-ءمينيسترى  ك.ءماسىموۆ. قازاقستان رەسپۋبليكاسى ۇكىمەتىنىڭ 2011جىلعى 28 قازانداعى №1212 قاۋلىسىمەن بەكىتىلگەن ۇزاق مەرزىمدى ورمان پايدالانۋ كەزىندە ورمان پايدالانۋشىلار ازىرلەيتىن ورتكە قارسى ءىس-شارالار جوسپارلارىنا قويىلاتىن تالاپتار 1. ورمان قورى ۋچاسكەلەرى ورمان پايدالانۋعا بەرىلگەن ورمان پايدالانۋشىلار جىل سايىن ورتكە قارسى ءىس-شارالاردىڭ جوسپارلارىن (بۇدان ءارى – جوسپار) ازىرلەيدى جانە ونى ىسكە اسىرادى. جوسپار مىناداي ەكى بولىمنەن تۇرادى: 1) ورتكە قارسى الدىن الۋ ءىس-شارالارى; 2) ورمان ورتتەرىن ءسوندىرۋ ءىس-شارالارى. 2. جوسپاردىڭ ءبىرىنشى بولىمىندە شەكاراسىندا ورمان پايدالانۋعا بەرىلگەن ورمان قورى ۋچاسكەسى (ۋچاسكەلەرى) ورنالاسقان ورمان يەلەنۋشىنىڭ ورمان ورنالاستىرۋ ماتەريالدارىنا جانە ورمانداردى ورتكە قارسى ورنالاستىرۋ جوسپارلارىنا نەگىزدەلگەن جۇمىستاردىڭ ناقتى كولەمدەرى مەن ولاردى وتكى­زۋ ورىندارى كوزدەلەدى. جوسپارلاناتىن ءىس-شارالار ءىس-ارەكەتتىڭ دايەكتىلىگىن, بۇدان بۇرىن ورىندال­عان جۇمىستاردىڭ جالعاستىرىلۋىن كوزدەيدى جانە ورمان يەلەنۋشىلەر مەن ورمان پايدالانۋشىلاردىڭ ورمان قورىنىڭ كورشىلەس ۋچاسكەلەردە اتقارىپ جاتقان جۇمىستارىمەن بايلانىستىرىلادى. جوسپاردىڭ بۇل بولىمىندە قايدا جانە قانداي مەرزىمدە ورتكە قارسى جىرالار قازىلاتىنى, ورتكە ءتوزىمدى ورمان شەتى قۇرىلاتىنى, مينەرالدى جانە ورتكە قارسى باسقا دا قورعانىشتىق جولاقتار تارتىلاتىنى, ورمان شارۋاشىلىعى جانە ورتكە قارسى جولدار, ءورت ءسوندىرۋ سۋاتتارى, ءورت قاداعالاۋ مۇنارالارى, ماچتالار, تىكۇشاق كەلىپ قوناتىن الاڭشالار, تەلەفون بايلانىسى جەلىلەرى سالىناتىنى, راديو بايلانىسى ۇيىمداستىرىلاتىنى كورسەتىلەدى. جوسپارعا سونداي-اق بۇرىننان بار ورتكە قارسى جىرالار مەن جولاقتارعا كۇتىم جاساۋ, ءورت قاداعالاۋ مۇنارالارى مەن ورتكە قارسى قۇرال-جابدىقتار مەن تەحنيكانى, جولداردى جوندەۋ, ۋاقىتشا ءورت كۇزەتشىلەرىن جالداۋ جونىندەگى جۇمىستار ەنگىزىلەدى. بارلىق جۇمىستار ءۇشىن كۇنتىزبەلىك ورىندالۋ مەرزىمدەرى جانە وسى جۇمىستاردىڭ ورىندالۋىنا جاۋاپتى ادامدار, كولەمى مەن قۇنى بەلگىلەنەدى. 3. جوسپاردىڭ ەكىنشى بولىمىندە ورتتەردى ءوز كۇشتەرىمەن دە, بۇل ورتتەردى قانداي دا ءبىر سەبەپتەرمەن ورمان پايدالانۋشىنىڭ كۇشتەرىمەن جانە قۇرالدارىمەن قۇرىقتاۋ مۇمكىن ەمەس جاعدايلاردا ءسوندىرۋدى ۇيىمداستىرۋ جونىندەگى شارالار كوزدەلەدى. سوڭعى جاعدايدا مەملەكەتتىك ورمان يەلەنۋشىمەن كەلىسە وتىرىپ ورمان ءورتىن سوندىرۋگە جىبەرىلەتىن اتالعان ورمان مەكەمەسىنىڭ كۇشتەرى مەن تەحنيكالىك قۇرالدارى, سونداي-اق ورمان قورىنىڭ ءتيىستى ۋچاسكەسىندە ورنالاسقان اۋدانداعى ەلدى مەكەندەردە ورنالاسقان وزگە دە ۇيىمداردىڭ كۇشتەرى مەن تەحنيكالىق قۇرالدارى ايقىندالادى. بۇل بولىمدە ورمان ورتتەرىن ءسوندىرۋ, ورمان ورتتەرىن سوندىرۋمەن اينالىسىپ جاتقان ادامداردى تاماقتاندىرۋ مەن مەديتسينالىق كومەكتى, بايلانىستى ۇيىمداستىرۋ ءۇشىن ەرىكتى قوعامدىق قۇرامالار (كوماندالار) قۇرۋ, سونداي اق ءورت قاۋىپى بار ماۋسىمعا جانار-جاعار ماي ماتەريالدارىنىڭ قورىن جاساۋ ورمان پايدالانۋشىنىڭ ەسەبىنەن كوزدەلەدى. 4. ورمان قورى ۋچاسكەلەرى ورمان پايدالانۋعا بەرىلگەن ورمان پايدالانۋشىلاردىڭ ورتكە قارسى ءىس-شارالاردىڭ جوسپارلارى اعىمداعى جىلدىڭ 15 اقپانىنان كەشىكتىرىلمەي كەلىسۋ ءۇشىن مەملەكەتتىك ورمان يەلەنۋشىلەرگە بەرىلەدى. ورمان پايدالانۋشىنىڭ ورتكە قارسى ءىس-شارالارىنىڭ جوسپارى مەملەكەتتىك ورمان يەلەنۋشىمەن كەلىسىلەدى جانە ونى ورمان پايدالانۋشىنىڭ ءوزى بەكىتەدى.