قر ۇلتتىق بانكى ەكسيمبانك پەن «Qazaq Banki» اق-نى قۇندى قاعازدار نارىعىندا جۇمىس جۇرگىزۋدە بانكتىك جانە باسقا دا وپەراتسيالاردى جۇرگىزۋ ليتسەنزياسىنان ايىردى.
ۇلتتىق بانكتىڭ ءباسپاسوز قىزمەتىنەن حابارلانعانداي, «ەكسيمبانك قازاقستان» اق اتالمىش ليتسەنزيادان پرۋدەنتسيالىق نورماتيۆتەردىڭ, نورماتيۆتىك-قۇقىقتىق اكتتەردىڭ جۇيەلى تۇردە بۇزىلۋىنا, سونىمەن بىرگە قوسىمشا كاپيتاليزاتسيا بويىنشا ۋاكىلەتتى ورگاننىڭ تالاپتارىن بانكتىڭ ءىرى قاتىسۋشىلارىنىڭ ورىنداماۋىنا بايلانىستى ايىرىلىپ وتىر.
سول سەكىلدى «Qazaq Banki» اق جۇيەلى تۇردە (كۇنتىزبەلىك ون ەكى ايدىڭ ىشىندە ءۇش جانە ودان دا كوپ مارتە) تولەمدىك جانە اۋدارمالىق وپەراتسيالار بويىنشا كەلىسىم مىندەتتەرىن لايىقسىز ورىنداعانى جانە جۇيەلى تۇردە پرۋدەنتسيالىق نورماتيۆتەر مەن وزگە دە مىندەتتەردى, نورمالار مەن ليميتتەردىڭ بۇزىلۋىنا بايلانىستى اتالمىش ليتسەنزيادان ايىرىلعان. ۇلتتىق بانكتەن ءتۇسىندىرىلىپ وتكەندەي, بانك سەكتورىنىڭ مىندەتتەمەلەرى مەن جيىنتىق اكتيۆتەرىندە بانكتەردىڭ اكتيۆتەرى مەن مىندەتتەمەلەرى از بولعاندىقتان (0,2 پايىز جانە 0,8 پايىز) اتالمىش بانكتەردى ليتسەنزيادان ايىرۋ باسقا قارجى ۇيىمدارىنا قاۋىپ توندىرە قويمايدى. «ۇلتتىق بانك توراعاسىنىڭ 2018 جىلعى 27 تامىزداعى بۇيرىعىنا سايكەس, بانكتەردىڭ ۋاقىتشا اكىمشىلىگى تاعايىندالدى. ولارعا بانكتەردى باسقارۋداعى بارلىق ورگاننىڭ قۇزىرەتتىلىگى بەرىلەدى.
ۋاقىتشا اكىمشىلىك سوت ليكۆيداتسيالىق كوميسسيانى تاعايىنداعانشا جۇمىس جۇرگىزەدى. 2018 جىلدىڭ 28 تامىزىنان باستاپ ۋاكىلەتتى ورگاننىڭ نورماتيۆتىك-قۇقىقتىق اكتىسىندە قاراستىرىلعان شىعىنداردان, بانككە ءتۇسىپ جاتقان اۋدارىم اقشادان باسقا جاعدايدىڭ بارىندە كليەنتتەردىڭ بارلىق بانك شوتتارى مەن بانكتەردىڭ وزدەرى بويىنشا وپەراتسيالار توقتاتىلدى. بەكىتىلگەن زاڭنامالىق ءتارتىپ بويىنشا ۇلتتىق بانك بانكتەردىڭ جۇمىسىن توقتاتۋ تۋرالى سوتقا جۇگىنەدى», - دەلىنگەن حابارلامادا.