ەرەجەسىز جەكپە-جەك شەبەرى يۋسۋف رايسوۆ الماتىعا كەلدى

سپورتتاعى العاشقى قادامىن كاراتەدەن باستاعان يۋسۋف رايسوۆ شەبەرلىگى تولىسى كەلە قويان-قولتىق ايقاس جانە جاۋىنگەرلىك سامبودان وتكەن ءتۇرلى جارىستاردا باق سىنادى. كەيىننەن ەرەجەسىز جەكپە-جەككە اۋىسىپ, بىرقاتار بيىك بەلەستەردى باعىندىردى. وسى كۇنگە دەيىن كاسىپقويلار اراسىندا 14 كەزدەسۋ وتكىزىپ ۇلگەرگەن 23 جاستاعى رەسەي ازاماتى 13 رەت جەڭىسكە جەتتى. ول 2016 جىلدىڭ جەلوقسان ايىندا مارات بالاەۆتان ۇپاي سانىمەن ۇتىلعان بولاتىن. ارادا ءبىر جارىم جىلداي ۋاقىت وتكەندە ءدال سول قارسىلاسىن ءبىرىنشى راۋندتا «قىلقىندىرۋ» ادىسىمەن ايقىن ۇتقان رايسوۆ اسۆ ۇيىمىنىڭ چەمپيوندىق اتاعىن يەلەندى. وسى جەڭىسىنەن كەيىن ول 70 كيلو سالماق دارەجەسىنە اۋىساتىنىن مالىمدەدى.  

بۇل مەنىڭ قازاقستانعا ءبىرىنشى رەت كەلۋىم ەمەس. 2014 جىلى استانادا وتكەن «M-1 Challenge 48 – Battle of Nomads» تۋرنيرىندە باق سىناپ, ءوز قارسىلاسىمنان باسىم تۇسكەن ەدىم. سودان بەرى ءبىراز ۋاقىت ءوتتى. دەسەك تە قازاقتاردىڭ قوناقجايلىعىنا ءتانتىمىن. سىزدەردە دە وسى سپورت تۇرىنە دەگەن قىزىعۋشىلىق ەرەكشە. اسىرەسە, ماعان ارمان وسپانوۆتىڭ ونەرى ۇنايدى. ەكەۋىمىز بىرەر جىلدان بەرى تانىسپىز. ول جاقسى ازامات, وتە مىقتى سپورتشى. شاۆكات راحمونوۆتى دا ەرەكشە اتاپ وتكىم كەلەدى. بۇل جىگىتتىڭ دە بولاشاعى زور. سونداي-اق, جەڭىل سالماقتا كۇش سىناسىپ جۇرگەندەر اراسىندا دا قازاقستاندا جاقسى جاۋىنگەرلەر جەتەرلىك, – دەيدى يۋسۋف رايسوۆ. 

الماتىنىڭ الدىندا يۋسۋف قاراعاندى قالاسىندا بولىپ, سول جەردەگى جىگىتتەرمەن بىرلەسكەن جاتتىعۋ وتكىزگەن بولاتىن. ءوزىنىڭ كەلەسى جەكپە-جەگىن رەسەي سپورتشىسى ۇستىمىزدەگى جىلدىڭ 10 قاراشاسىندا ماسكەۋدە ۇلىبريتانيانىڭ وكىلى اندرە ۆيننەرگە قارسى وتكىزەدى.          

عالىم سۇلەيمەن,

«ەگەمەن قازاقستان»

الماتى