وسى اجەلەردى كورگەن كىشكەنتايلار ء«اياي اجە» دەپ قىزىقسا, ەرەسەكتەر اۋەندى اندەرىن قىزىعا تىڭدايدى. ونەرپاز اجەلەردىڭ حالقىمىزدىڭ ءداستۇرلى اندەرىن بىرىگىپ شىرقاپ كەلە جاتقانىنا دا بەس جىل بولىپتى.
ءيا, ءبارى سول كورشى ەلدەگى «بۋرانوۆسكيە بابۋشكي»-دەن باستالعان-دى. زامانداستارىنىڭ ونەرىنە ءتانتى بولعان اجەلەر يگى ءبىر يدەيانى ىسكە اسىرۋ ءۇشىن, اپتا سايىن جينالىپ, ءان ايتىپ, بويداعى دارىندارىن وياتقان. ىلگەرىدە سايرام اۋدانىندا ءبىرى – ۇستاز, ەندى ءبىرى – دارىگەر, ەسەپشى مەن جەمىس وڭدەۋ زاۋىتىنىڭ تەحنولوگى بولعان زەينەتكەرلەر, اتاپ ايتقاندا, روزا ۇسەنبەكوۆا, كۇلاش بايدىبەك, ءانيپا ىسقاقوۆا, ۇلجان وڭعارباەۆا, قالدىگۇل تۇمانباەۆا جانە تاڭسىق بورىبەكوۆانىڭ اپتا سايىنعى «رەپەتيتسياسى» ناتيجەسىندە ونەر توبى ومىرگە كەلدى. بىرىگە ءان سالىپ, مەرەكەلىك ءىس-شارالاردا ونەر كورسەتە باستادى. كوپ ۇزاماي-اق كوپشىلىككە تانىلدى. اجەلەردى كونتسەرتتىك باعدارلامالارعا عانا ەمەس, تەاترلاندىرىلعان قويىلىمدارعا, سونداي-اق مۋزىكالىق بەينەباياندارعا تۇسۋگە شاقىراتىندار كوبەيدى. ۇلتتىق مەرەكەلەردىڭ كوزايىمىنا اينالدى. ال ساحناعا ارنالعان ۇلتتىق كيىمدەردى تىكتىرۋگە ۇل-قىزدارى كومەكتەسىپتى. ونەر جولىندا قول جەتكىزگەن جەتىستىكتەرى دە از ەمەس. مىسالى, ۇلى جەڭىستىڭ 70 جىلدىعىنا ارنالعان وبلىستىق سايىستا ءى ورىندى, وبلىستىق پاتريوتتىق اندەر بايقاۋىندا باس جۇلدەنى جەڭىپ العان. ءان ارقىلى جاستاردى وتانسۇيگىشتىككە, تۋعان جەردى قاستەرلەۋگە, ىنتىماق-بىرلىككە شاقىرۋدى ماقسات ەتكەن «كوركەم اجەلەر» جۋىردا استانادا وتكەن «قىمىزمۇرىندىق» فەستيۆالىندە كوپشىلىكتى ءوز ونەرلەرىمەن ءتانتى ەتكەن بولاتىن.
عالىمجان ەلشىباي,
«ەگەمەن قازاقستان»
تۇركىستان وبلىسى