ورمان ورتىمەن كۇرەس قىزمەتكەرلەرى رەسەي اۋماعىندا 700 گا جەردى قامتىعان 20-عا جۋىق ورمان ورتىمەن ارپالىسىپ جاتىر. تاۋلىك ىشىندە شامامەن ءورتتىڭ 50 وشاعى ءوشىرىلدى, دەپ حابارلايدى تاسس اگەنتتىگى.
«وتكەن تاۋلىكتە رەسەيدەگى ورمان ورتتەرىن ءسوندىرۋ قىزمەتى 29 گا اۋماقتى شارپىعان 44 ورمان ءورتىن ءسوندىردى. ماسكەۋ ۋاقىتى بويىنشا 28 تامىز كۇنى ساعات 00:00-دە 705 گا جەرگە تاراعان 19 ورمان ءورتى تىركەلدى.
ارنايى قىزمەت وكىلدەرى ولاردى سوندىرۋمەن بەلسەندى تۇردە اينالىستى», - دەدى وڭىرلىك ورمان شارۋاشىلىعىنىڭ ديسپەتچەرلىك قىزمەتىندەگىلەر. ءبىر تاۋلىك بۇرىن, 27 تامىز كۇنى, وڭىرلەردە 534 گا اۋماقتا باقىلاناتىن 14 ورمان ءورتى تىركەلدى. ال الىس جانە جەتۋگە قيىن جەرلەردە تاعى دا 64 ورمان ءورتى انىقتالدى. ولاردىڭ جالپى اۋماعى 666,3 مىڭ گەكتارعا جەتتى. ءورت وشاقتارى ياكۋتيا, كراسنويارسكى, حاباروۆسكى ولكەلەرىندە جانە ماگادان وبلىسىنان تابىلدى. قازىرگى ۋاقىتتا باقىلاناتىن ءورت وشاقتارىندا 1 مىڭعا جۋىق ادام جۇمىس جاساۋدا, 220 تەحنيكا جۇمىلدىرىلدى. ال اۆياتسيالىق مونيتورينگ پەن ءسوندىرۋ جۇمىستارىنا 49 اۋە كەمەسى تارتىلدى. ياكۋتيادا پاراشيۋتيست-دەسانتشىلار جۇمىس جاساۋدا.