يندونەزيادا ءوتىپ جاتقان جازعى ازيا ويىندارى دا بەل ورتاسىنا جەتتى. قازىرشە قازاقستان قۇراماسى مەدال سانى بويىنشا جالپىكوماندالىق ەسەپتە 11-ورىندا كەلەدى.
ۆەلوسپورت بويىنشا توپتىق جارىس كەزەڭىندە توپ جارعان وتانداسىمىز الەكسەي لۋتسەنكو جەكەلەي سىندا دا ءوزىن ازياداعى ەڭ مىقتى ۆەلوشاباندوز ەكەنىن تاعى ءبىر مارتە دالەلدەدى. ول 40 شاقىرىم جولدى 55:37:13 ۋاقىت ءجۇرىپ ءوتىپ, ازيادانىڭ ەكىنشى التىن جۇلدەسىن جەڭىپ الدى. وسىلايشا, الەكسەي لۋتسەنكو ازيا ويىندارىندا ەكى دۇركىن جەڭىمپاز اتانىپ, قازاقستان قورجىنىنا ءۇشىنشى التىن جۇلدەنى سالدى. شىندىعىندا ازياداعا الەكسەي بارماسا, قايتەر ەدىك؟!
سونداي-اق دجيۋ-دجيتسۋ سپورتىنىڭ وكىلى دارحان نورتاەۆ (62 كگ) ەل قورجىنىنا ءتورتىنشى التىن جۇلدەنى سالدى. نورتاەۆ فينالدىق ايقاستا بىرىككەن اراب امىرلىكتەرىنىڭ سپورتشىسى ومار ءال-ءفادليدى جەڭىپ, دجيۋ-دجيتسۋدان قازاق سپورتشىلارى اراسىندا تۇڭعىش ازيا ويىندارىنىڭ چەمپيونى اتاندى. سەبەبى دجيۋ-دجيتسۋ سپورتى ازياداعا بيىل عانا قوسىلدى.
ال كۇمىس جۇلدەنى دەنيس ەۆسەەۆ پەن الەكساندر بۋبليك جەڭىپ الدى. جۇپتاسىپ سىنعا تۇسۋدە تەننيسشىلەرىمىز فينالدا ۇندىستاندىق سپورتشىلارعا ەسە جىبەردى. قولا مەدالدى دجيۋ-دجيتسۋ سپورتشىلارى نۇرجان سەيدۋالي (56 كگ) مەن نارتاي قاجەكوۆ (69 كگ), ريزات ماقاشەۆ (94 كگ), تەننيستەن قىزدار اراسىنداعى جۇپتاسىپ سىنعا تۇسۋدەن اننا دانيلينا مەن گوزال اينيتدينوۆا, سونداي-اق جۇپتاسىپ ونەر كورسەتۋدە اننا دانيلينا مەن الەكساندر نەدوۆەسوۆ, سۋدا ءجۇزۋ سپورتى بويىنشا دميتري بالاندين مەن قازاقستان قۇراماسى جانە يادرو لاقتىرۋدان يۆان يۆانوۆ جەڭىپ الدى.
كوماندالىق ەسەپتە قىتاي كوش باستاپ كەلەدى – 153 مەدال (72 التىن). ەكىنشى ورىنداعى جاپونيادا 109 جۇلدە (34 التىن), ءۇشىنشى ورىنداعى وڭتۇستىك كورەيادا 84 مەدال (25 التىن) بار.