«سارىارقا» ەكسپەديتسياسى – قارقارالىدا

قاتىسۋشىلار بۇيراتاۋ, باياناۋىل جانە قارقارالى ۇلتتىق پاركتەرىن ارالادى, قۇماي ارحەولوگيالىق كەشەنىندە, سۇڭقار تاۋلارىندا, ءاجىباي, جاسىباي جانە شايتانكول كولدەرىندە بولدى. ساياحاتشى باياناۋىل تابيعي پاركىندەگى تورايعىر كولىنىڭ تابيعاتى تاماشا جاعالاۋىندا ايالدادى.

«قازاقستاندا 12 ۇلتتىق تابيعي پارك بار, ولاردىڭ ۇشەۋى ءبىزدىڭ باعىتتىڭ كارتاسىندا اتاپ وتىلگەن. ارقايسىسى وزىندىك قايتالانباس جانە بىرەگەي سۇلۋلىققا يە, وسى سۇلۋلىقتى باستاپقى كۇيىندە ساقتاۋ ءار قازاقستاندىقتىڭ ىسىنە اينالۋى ءتيىس», دەيدى ەكسپەديتسيا جەتەكشىسى, QazaqGeography-ءدىڭ حالىقارالىق جانە عىلىمي جوبالارىنىڭ مەنەدجەرى نۇرجان العاشوۆ.

بۇدان ءارى باعىت بويىنشا ەكى ۇلتتىق پارك بار: «كوكشەتاۋ» تابيعي پاركى جانە يۋنەسكو دۇنيەجۇزىلىك مۇراسىنىڭ تىزىمىنە كىرەتىن قورعالجىن مەملەكەتتىك تابيعي قورىعى.

ەسكە سالا كەتسەك, شىلدە ايىندا مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ تاپسىرىسىمەن «Kazakh Tourism» ۇك ۇيىمداستىرعان قازاقستاننىڭ تۋريستىك الەۋەتىن دامىتۋ بويىنشا « ۇلى دالا ەلىنە ساياحات» اۋقىمدى جوباسى ­باس­تاۋ الدى. ەكسپەديتسيا ەلىمىزدىڭ اسا ماڭىز­دى التى باعىتىن قامتيدى جانە قازاق­­ستاننىڭ 14 وبلىسىنىڭ 11-ىنەن وتەدى.

«سارىارقا» باعىتىنىڭ ەكسپەديتسياسىن Kazakh Tourism-مەن ءوزارا ىنتىماقتاستىق تۋرالى مەموراندۋم اياسىندا QazaqGeography جۇزەگە اسىرىپ كەلەدى. باعىتتىڭ جالپى ۇزاقتىعى 4 مىڭ شاقىرىمدى قۇرايدى. كوماندا قۇرامىندا ساياحاتشىلار, تەلەجۋرناليس­تەر, تۋروپەراتورلار مەن گەوگرافيالىق قوعامداردىڭ وكىلدەرى, فوتوگرافتار, شەتەلدىك جانە قازاقستاندىق ترەۆەل-بلوگەرلەر, ونىڭ ىشىندە دەونيسي ميت, ەربولات شادراحوۆ, ەلەنا حاچينا مەن ۇلان الىمبەك بار. ەكسپەديتسيا قورىتىندىسىندا تۋريستىك نىسانداردى ارالاۋ بويىنشا ارنايى باعدارلاما شىعارىلادى.

« ۇلى دالا ەلىنە ساياحات» جوباسىنىڭ اياسىندا تاعى ەكى باعىت قالدى: قىزىلوردا, اقتوبە جانە ماڭعىستاۋ وبلىستارىنىڭ اۋماعى بويىنشا «تەڭىزدەن تەڭىزگە دەيىن» باعىتى جانە تۇركىستان, جامبىل, الماتى وبلىستارىنىڭ اۋماعى بويىنشا «جاڭا جىبەك جولى» باعىتى, وعان «National Geographic رەسەي» كومانداسى قاتىسادى.

«ەگەمەن-اقپارات»