جوعارى سوت كەڭەسىنىڭ توراعاسى تالعات دوناقوۆتىڭ باسشىلىعىمەن كەڭەستىڭ كەزەكتى وتىرىسى ءوتتى, دەپ حابارلادى قازاقستان رەسپۋبليكاسى جوعارى سوت كەڭەسىنىڭ اپپاراتى.
وتىرىس جۇمىسىنا زاڭ قاۋىمداستىعىنىڭ وكىلدەرى قاتىستى.
كەڭەس وتىرىسىنىڭ قورىتىندىلارى بويىنشا بوس سۋديا لاۋازىمدارىنا كونكۋرستى وتكىزۋ ءتارتىبىن جاڭعىرتىپ, جوعارى سوت كەڭەسىنىڭ جۇمىسىندا جوسپارلاۋدى قامتاماسىز ەتۋ جونىندەگى ۇسىنىستار ماقۇلداندى, ول 2019 جىلدان باستاپ قولدانىسقا ەنگىزىلەتىن بولادى. سونىمەن قاتار كەڭەس بيىلعى قىركۇيەكتەن باستاپ سۋديا لاۋازىمىنا بىلىكتىلىك ەمتيحانىن وتكىزۋدىڭ جاڭا جۇيەسىن ەنگىزۋ, سۋديالاردىڭ بوس ورىندارىنا ورنالاسۋعا كونكۋرسقا قاتىسۋشى كانديداتتاردى باعالاۋ جانە ىرىكتەۋ كريتەريلەرىن ودان ءارى جەتىلدىرۋ جونىندە شەشىم قابىلدادى. وسىعان وراي كەڭەس رەگلامەنتىنە ءتيىستى تۇزەتۋلەر بەكىتىلدى.
سونىمەن بىرگە كەڭەس جانىنداعى بىلىكتىلىك كوميسسياسىنىڭ قۇرامىنا وزگەرىستەر ەنگىزىلدى, ونىڭ قۇرامىنا شەتەل ساراپشىلارى مەن HR-مامان كىردى.
ودان باسقا كەڭەس جانىندا تۇراقتى نەگىزدە جۇمىس ىستەيتىن ساراپشىلىق-كونسۋلتاتيۆتىك كوميسسيا قۇرۋ تۋرالى شەشىم قابىلداندى, ول ۇلتتىق زاڭناما مەن سوت جۇيەسىن جەتىلدىرۋگە قاتىستى ماسەلەلەردى قارايدى.
سونىمەن قاتار كەڭەس زەينەتكەرلىك جاسقا تولعان ءتورت سۋديانىڭ قىزمەتتە بولۋ مەرزىمىن ۇزارتۋعا كەلىسىم جانە 15 سۋديانى لاۋازىمدارىنان بوساتۋعا ۇسىنىم بەردى.
كەڭەس وتىرىسىندا مامانداندىرىلعان تەرگەۋ سوتتارىنىڭ توراعالارى مەن سۋديالارىنىڭ بوس ورىندارىنا ورنالاسۋعا 2018 جىلى 12 ماۋسىمدا جاريالانعان كونكۋرستىڭ قورىتىندىلارى جاسالدى.
كەڭەس وتىرىسىنىڭ قورىتىندىلارى بويىنشا ءتيىستى شەشىمدەر مەن ۇسىنىمدار قابىلداندى.