28 تامىز – 2 قىركۇيەكتە استانا قالاسىندا يادرولىق سىناقتارعا جاپپاي تىيىم سالۋ تۋرالى شارتى ۇيىمىنىڭ (ياسجتشۇ) «وتكەندى ەسكە الىپ, بولاشاققا بەتتەۋ» اتتى حالىقارالىق كونفەرەنتسياسى وتەدى. كونفەرەنتسيا 2009 جىلى قازاقستان پرەزيدەنتى نۇرسۇلتان نازارباەۆتىڭ باستاماسىمەن بۇۇ باس اسسامبلەياسى بەكىتكەن 29 تامىز – يادرولىق سىناقتارعا قارسى ءىس-قيمىلدىڭ حالىقارالىق كۇنىنە وراي ۇيىمداستىرىلادى.
بەسكۇندىك كونفەرەنتسيا شارتتىڭ مارتەبەسىن جوعارىلاتۋ جولىن قوسا العاندا جاھاندىق الەمدى قۇرۋداعى يادرولىق قارۋسىزداندىرۋ جانە تاراتپاۋدىڭ ءرولىن تالقىلاۋ ماقساتىندا بەدەلدى قايراتكەرلەر توبى مەن ياسجتشۇ جاستار توبىنىڭ باسىن بىرىكتىرەدى.
«استانا كونفەرەنتسياسى بەدەلدى قايراتكەرلەر توبى مەن جاستار توبى مۇشەلەرىنىڭ ءوزارا ارەكەتتەستىگى ءۇشىن قولايلى پلاتفورمانى ۇسىنادى. «ۇرپاقتار اراسىنداعى ديالوگ» رەتىندە جوسپارلانعان كونفەرەنتسيا ياسجتش-نىڭ امبەباپتالۋى مەن كۇشىنە ەنۋ سەرپىندى قولداۋ ماقساتىندا بارلىق قاتىسۋشى توپتاردىڭ ىنتىماقتاستىعى ءۇشىن الەۋەتتى مۇمكىندىكتەردى زەرتتەۋگە باعىتتالاتىن بولادى», - دەپ ياسجتش ازىرلەۋ كوميسسياسىنىڭ مالىمدەمەسىندە اتاپ وتىلەدى.
فورۋم بارىسىندا يادرولىق سىناقتارعا قارسى ءىس-قيمىلدىڭ حالىقارالىق كۇنىنە ورايلايستىرعان بىرلەسكەن دەكلاراتسيا قابىلدانادى.
قازاقستان بۇل كونفەرەنتسيانى مەملەكەتتىك باسشىسى نۇرسۇلتان نازارباەۆتىڭ يادرولىق قارۋسىزدانۋ جانە ونى تاراتپاۋ سالاسىنداعى باستامالارىن دايەكتى ىسكە اسىرۋ تۇرعىسىنان ازىرلەيدى. ء«بىز بالالارىمىز بەن نەمەرەلەرىمىزدىڭ بولاشاعى تۋرالى ويلاۋعا ءتيىسپىز. وتكەن عاسىرلاردىڭ قاسىرەتتى قاتەلىكتەرىن قايتالاۋعا جول بەرمەي, الەمدى سوعىس قاتەرىنەن تۇپكىلىكتى ارىلتۋ ءۇشىن بۇكىل الەم ۇكىمەتتەرىنىڭ, ساياساتكەرلەرىنىڭ, عالىمدارىنىڭ, بيزنەسمەندەرىنىڭ, ونەر قايراتكەرلەرىنىڭ جانە ميلليونداعان ادامدارىنىڭ كۇش-جىگەرىن جۇمىلدىرۋ قاجەت», - دەپ اتاپ ءوتتى قازاقستان پرەزيدەنتى ءوزىنىڭ «الەم. ءححى عاسىر» مانيفەسىندە.
2015 جىلعى قىركۇيەكتە بۇۇ باس اسسامبلەياسىنىڭ 70-سەسسياسىندا سويلەگەن سوزىندە ن. نازارباەۆ ححI عاسىردا يادرولىق قارۋسىز الەمدى قۇرۋدى ادامزاتتىڭ باستى ماقساتى ەتۋگە شاقىردى. «قازاقستان – يادرولىق پوليگوندى جاپقان جانە اۋقىمى جاعىنان ءتورتىنشى يادرولىق قارۋ-جاراقتان ءوز ەركىمەن باس تارتقان, سونداي-اق ورتالىق ازيادا يادروسىز ايماق قۇرعان تاريحتاعى تۇڭعىش ەل. يادرولىق قارۋسىز ايماقتى الەمنىڭ وزگە وڭىرلەرىندە, سونىڭ ىشىندە تاياۋ شىعىستا دا قۇرعان ءجون. يادرولىق دەرجاۆالار يادرولىق قارۋعا يەلىك ەتۋدەن باس تارتقان بارلىق ەلدەرگە كۇش قولدانباۋعا كەپىلدىك بەرۋگە ءتيىس». سونىمەن قاتار, قازاقستان پرەزيدەنتى «جەر بەتىندەگى ءاربىر ادام يادرولىق سىناقتارعا تىيىم سالۋ ىسىنە ءوز ۇلەسىن قوسا الادى جانە سولاي بولۋعا ءتيىس» دەپ, جاھاندىق انتيادرولىق قوزعالىستى قۇرۋدى ۇسىندى.
ياسجتشۇ كونفەرەنتسياسىنىڭ قاتىسۋشىلارى بۇرىنعى سەمەي يادرولىق سىناق پوليگونى مەن كۋرچاتوۆ قالاسىنداعى مۇراجايعا, كەڭەس يادرولىق سىناقتار ورتالىعىنا بارادى. بۇل جاستارعا اتالعان سۇراپىل قارۋدى سىناۋدىڭ ادامدار مەن قورشاعان ورتاعا تيگىزگەن اۋىر سالدارىن كورۋگە مۇمكىندىك بەرەدى. 31 تامىزدا كونفەرەنتسيا قاتىسۋشىلارىنىڭ قازاقستان ۇلتتىق يادرولىق ورتالىعىنىڭ باسشىلىعىمەن, سونداي-اق يادرولىق قاۋىپسىزدىك سالاسىنداعى جاس ماماندارمەن كەزدەسۋلەرى وتكىزىلەدى. 1 قىركۇيەكتە تاجىريبەلىك الاڭى مەن كرەست سەيسميكالىق ستانتسياسىنا بارۋ جوسپارلانعان.