ەكى كۇن «Microsoft» كومپانياسى «سامۇرىق-قازىنا» اق جانە قوردىڭ قورجىندىق كومپانيالارىندا «تسيفرلىق جاز 2018» باعدارلاماسى بويىنشا تاعىلىمدامادان ءوتۋشى جاستارعا ءدارىس وقىدى. بۇل تۋرالى بۇگىن «Power BI ارقىلى ىلگەرى تالداۋ جاساۋ» كۋرسى بارىسىندا «Microsoft» كومپانياسىنىڭ دەرەكتەرى تالداۋ قۇرالدارى بويىنشا مامانى سانجار مىرزاعالىم مالىمدەدى. ول اقپاراتتىق تەحنولوگيالاردىڭ ماڭىزدىلىعىن اتاپ ءوتىپ, تاعالىمدامادان ءوتۋشى جاستار باسەكەگە قابىلەتتى بولۋ ءۇشىن وزىق تەحنولوگيالاردى قالاي پايدالانۋعا بولاتىنان كورسەتتى.
«تاعىلىمدامادان وتۋشىلەر باسەكەگە قابىلەتتى بولۋى ءۇشىن ءبىز دارىستەر بارىسىندا سوڭعى ۇردىستەردى كورسەتۋگە تىرىسامىز. دەرەكتەردى تالداۋ بويىنشا ءدارىس جۇرگىزىپ, ۇلكەن كولەمدەگى اقپاراتتاردى تالداۋ ءۇشىن «Microsoft» ەڭ وزىق تەحنولوگيالارىن قالاي پاينالاناتىنىن كورسەتەمىز. شىن مانىندە, بۇل وتە وزەكتى ماسەلە, سەبەبى تىڭداۋشىلاردىڭ دارىستەن العان بىلىمدەرى بولاشاقتا مىندەتتى تۇردە پايداعا جارايدى. مۇنى ۋنيۆەرسيتەتتە وقىتپاعاندىقتان, ءبىز ولارعا ناقتى ءبىلىم بەرۋگە تىرىسامىز», - دەپ اتاپ ءوتتى سانجار مىرزاعالىم.
سونىمەن قاتار, «Microsoft» كومپانياسى مامانىنىڭ ايتۋى بويىنشا, اقپاراتتىق تەحنولوگيالار سالاسىنداعى ءبىلىم تەز ارادا ەسكىرەدى جانە مامانداردىڭ سول ءبىلىمدى ءاردايىم جاڭارتىپ وتىرۋى كەرەكتىگىن تىلگە تيەك ەتتى. مىسالى, ءبىراز ۋنيۆەرسيتەتتەردىڭ وزىندە قازىر بىرنەشە جىل بۇرىن بەكىتىلگەن باعدارلاما بويىنشا ءبىلىم بەرىلەدى, بۇل اقپاراتتىق تەحنولوگيالار سالاسىندا ءاردايىم قولدانىلماۋى مۇمكىن. سانجار مىرزاعالىمنىڭ ايتۋى بويىنشا, باعدارلاما جىل سايىن وزگەرۋى ءتيىس, سەبەبى جاڭا تەحنولوگيالار نارىعى جاڭارتىلىپ وتىرادى.
ەستەرىڭىزگە سالا كەتەيىك, 2018 جىلدىڭ 6 ماۋسىمىندا «سامۇرىق-قازىنا» ۇاق» اق مەن قورجىندىق كومپانيالارىندا «تسيفرلىق جاز 2018» تاعىلىمداما باعدارلاماسى باستالدى. وسى باعدارلامانىڭ بىرەگەي ەرەكشەلىكتەرىنىڭ ءبىرى – تاعىلىمدامادان ءوتۋشى جاستار باسەكەلەستىگى جوعارى Iت سالاسىندا قۇندى تاجىريبە مەن ءبىلىم الادى, SAP, Microsoft, Oracle, Cisco, HP, IBM, Huawei كومپانيالارىنىڭ ونىمدەرىمەن جۇمىستارىن شىڭداي الادى.
جوعارعى وقۋ ورىندارىن 2016, 2017 جانە 2018 جىلدارى بىتىرگەن ستۋدەنتتەر «تسيفرلىق جاز – 2018» باعدارلاماسىنا «سامۇرىق-قازىنا» ۇاق» اق رەسمي www.sk.kz سايتىنا كىرىپ, ءوتىنىم قالدىردى. اقپاراتتىق تەحنولوگيالارعا دەگەن قىزىعۋشىلىق جانە قور كومپانيالارىندا اقپاراتتىق تەحنولوگيالارىنىڭ دامۋىنا ۇلەس قوسۋ باعدارلامانىڭ نەگىزگى تالابى بولىپ سانالادى.
باعدارلاما قورىتىندىسى بويىنشا ۇزدىك تانىلعان جاس ماماندار كەلەسى كومپانيالار توبىندا جۇمىسقا ورنالاسۋ مۇمكىندىگىنە يە بولماق: «قازمۇنايگاز» ۇك» اق, «قازاتومونەركاسىپ» ۇاك» اق, «قازاقستان تەمىر جولى» ۇك» اق, «قازپوشتا» اق, «سامۇرىق-ەنەرگو» اق, «قازاقتەلەكوم» اق, «تاۋ-كەن سامۇرىق» اق, «كورەم» اق, «Qazaq Air» اق, «ەنەرگوينفورم» اق, «سامۇرىق-قازىنا كونتراكت» جشس جانە «بىرىككەن حيميالىق كومپانيا» جشس.