27 تامىزدا نيۋ-يوركتە اقش-تىڭ اشىق بىرىنشىلىگى باستالادى. الەمنىڭ ەڭ ۇزدىك تەننيسشىلەرىنىڭ باسىن قوساتىن «ۇلكەن دۋىلعا» ساناتىنداعى تۋرنيردە قازاقستاننىڭ ءۇش ويىنشىسى ونەر كورسەتەدى. ولار – يۋليا پۋتينتسەۆا, زارينا دياس جانە ميحايل كۋكۋشكين.
ايەلدەردىڭ الەمدىك رەيتينگىندە 51 ورىندا تۇرعان ەلىمىزدىڭ ءبىرىنشى راكەتكاسى يۋليا پۋتينتسەۆا امەريكالىق بەرناردا پەرامەن شەبەرلىك بايقاسادى. ول WTA تىزىمىندە 94 ورىندا تۇر. 23 جاستاعى اقش ويىنشىسى ءدۇبىرلى دودالاردا ءالى دە اۋىز تولتىرىپ ايتارلىقتاي تابىستارعا قول جەتكىزە قويعان جوق. بيىل پەرا اۆستراليانىڭ اشىق بىرىنشىلىگىندە ءۇشىنشى كەزەڭگە دەيىن جەتتى. ازىرگە ونىڭ ەڭ ۇزدىك ناتيجەسى وسى.
WTA رەيتينگىندە 62 ورىندى يەمدەنگەن زارينا دياس العاشقى اينالىمدا وتە مىقتى قارسىلاسقا تاپ كەلىپ وتىر. سوڭعى جىلدارى 26 جاستاعى چەحيا تەننيسشىسى كارولينا پليشكوۆا ءدۇبىرلى دودالاردىڭ كوبىندە ۇنەمى ۇزدىكتەر ساناتىنان كورىنىپ ءجۇر. اتاپ ايتساق, 2017 جىلى رولان گارروستىڭ جارتىلاي فينالىنا دەيىن جەتىپ, بىرقاتار حالىقارالىق تۋرنيرلەردە توپ جاردى. سونىڭ ناتيجەسىندە الەمنىڭ ءبىرىنشى راكەتكاسى اتاندى. 2016 جىلى اقش-تىڭ اشىق بىرىنشىلىگىنىڭ فينالىنا شىقسا, بيىل مەلبۋرندەگى باسەكەدە وزىق سەگىز ويىنشىنىڭ قاتارىنا قوسىلدى. قازىرگى كەزدە پليشكوۆا الەمدىك رەيتينگتە 8 ورىندا تۇر.
ەرلەر سايىسىندا جالعىز ميحايل كۋكۋشكينگە ءۇمىت ارتىلىپ وتىر. اتر تىزىمىنىدە 84 ورىنعا تابان تىرەگەن جەرلەسىمىز نيۋ-يوركتە نوا رۋبينمەن كۇش سىناسادى. 22 جاستاعى اقش-تىڭ وكىلى دە پالەندەي تابىستارعا جەتە قويعان جوق. بۇل كۇندەرى ول الەمدىك رەيتينگتە 135 ورىندى ەنشىلەۋدە.
اقش-تىڭ اشىق بىرىنشىلىگىنىڭ بيىلعى جىلعى جۇلدەلىك قورى 25 282 400 دوللاردى قۇراپ وتىر. بۇل جارىس 9 قىركۇيەكتە ءوز مارەسىنە جەتەدى.
عالىم سۇلەيمەن,
«ەگەمەن قازاقستان»