«Kazakh Tourism ۇك» اكتسيونەرلىك قوعامى استانا قالاسىنىڭ 20 جىلدىق مەرەيتويىنا وراي ەل اۋماعىنداعى ەڭ بيىك 20 شىڭعا ارنايى ەكسپەديتسيا ۇيىمداستىرۋدى كوزدەپ وتىر.
وسىعان وراي الماتىداعى «دوستىق» ۇيىندە ءباسپاسوز ءماسليحاتى ۇيىمداستىرىلدى. بۇل شاراعا الماتى قالاسىنداعى «Visit Almaty» تۋريستىك اقپاراتتىق ورتالىعىنىڭ ديرەكتورى كاميليا لۇقپانوۆا, الپينيزمنەن قازاقستان قۇراما كومانداسىنىڭ مۇشەسى, تۋريستىك كوپسايىستان حالىقارالىق جارىستاردىڭ جۇلدەگەرى ەلدار عابباسوۆ, الپينيزم بويىنشا بىلىكتى باپكەر ارتەم سكوپين, سپورتتىق تۋريزم قاۋىمداستىعىنىڭ پرەزيدەنتى ارمان حاسەنوۆ جانە قاراعاندى وبلىستىق قۇزعا شىعۋ فەدەراتسياسىنىڭ توراعاسى ايدوس جومارتوۆ قاتىستى.
ەكسپەديتسياعا قۇرامىندا كاسىبي الپينيستەر مەن تاجىريبەلى ساياحاتشىلار, تانىمال جۋرناليستەر مەن بلوگەرلەر بار 100-دەن اسا ادام قاتىسادى. ولار الماتى, تۇركىستان, شىعىس قازاقستان وبلىستارى اۋماعىنداعى تاۋلى ايماقتارمەن ءجۇرىپ وتپەك. ونداعى ماقسات – قازاقستاننىڭ تاۋلى وڭىرلەرىندە بەلسەندى ءتۋريزمدى دامىتۋعا قولايلى جاعدايدىڭ بار ەكەنىنە ءوز وتانداستارىمىزدىڭ جانە كۇللى الەم جۇرتشىلىعىنىڭ كوزىن جەتكىزۋ.
– ەكسپەديتسيا جوسپارىن جاساۋ بارىسىندا «قازاقتۋريزممەن» اقىلداسا وتىرىپ, ەلىمىزدىڭ ءۇش وڭىرىندە ورنالاسقان 20 شىڭعا تاڭداۋىمىز ءتۇستى. ول جەرلەردە ەكسترەمالدى جانە ەكوتۋريزمدى دامىتۋعا مۇمكىندىك مول. ءبىز وسى باعىتتاردىڭ بارلىعىن تەرەڭ زەرتتەپ, ولاردىڭ ينفراقۇرىلىمىن دامىتۋدىڭ جولدارىن ۇسىنامىز. وسى جوسپاردى ويداعىداي جۇزەگە اسىرۋ ءۇشىن قازاقستان رەسپۋبليكاسى الپينيزم جانە قۇزعا شىعۋ فەدەراتسياسى, سپورتتىق تۋريزم فەدەراتسياسى جانە جەرگىلىكتى اۋماقتىق قاۋىمداستىقتار قۇرامىنداعى كاسىبي الپينيستەر مەن مامانداردى وسى ىسكە جۇمىلدىردىق. سونىمەن قاتار, استانانىڭ مەرەيتويىنا وراي وزىندىك سىي دايىنداپ وتىرعان جايىمىز بار: تۇركىستان وبلىسىنداعى سايران-وگەم ۇلتتىق ساياباعىنداعى شىڭدى «استانانىڭ 20 جىلدىق شىڭى» دەپ اتاۋدى جوسپارلاپ وتىرمىز, – دەيدى ارمان حاسەنوۆ.
عالىم سۇلەيمەن,
«ەگەمەن قازاقستان»
الماتى