10-12 تامىز كۇندەرى ماجارستان استاناسى بۋداپەشت قالاسىندا تۇركى حالىقتارىنىڭ «ۇلكەن تۇران قۇرىلتايى» ءوتتى.
كوشپەلى جۇرت وكىلدەرىنىڭ باسىن قوسقان ايتۋلى شاراعا قازاقستان, تۇركيا, ازەربايجان, قىرعىزستان, باشقۇرتستان, داعىستان سياقتى الەمنىڭ 30-دان استام ەلىنەن دەلەگاتسيا قاتىستى. وسى جيىن اياسىندا رەسپۋبليكالىق «ەگەمەن قازاقستان» گازەتى مەن «قازاقپارات» حالىقارالىق اقپارات اگەنتتىگىنىڭ, سونداي-اق حالىقارالىق تۇركى اكادەمياسىنىڭ قولداۋىمەن قازاقستاننىڭ ۆەنگرياداعى ەلشىلىگى ۇيىمداستىرعان « ۇلى دالا رۋحى» فوتوكورمەسى اشىلدى.
تۋىسقان ەلدەردەگى ءوزارا مادەني جانە دوستىق بايلانىستاردىڭ جارقىن ۇلگىسىنە اينالعان ءداستۇرلى قۇرىلتاي بيىل ونىنشى رەت ۇيىمداستىرىلىپ وتىر. قۇرىلتايدىڭ اشىلۋ سالتاناتىندا ەجەلگى «تۇران» اسكەري شەرۋى ءوتىپ, كوشپەلىلەردىڭ جاۋىنگەرلىك ءداستۇرى جاڭعىرتىلدى.
جوعارىدا ايتىپ وتكەنىمىزدەي, قۇرىلتايدا رەسپۋبليكالىق «ەگەمەن قازاقستان» گازەتى مەن «قازاقپارات» حالىقارالىق اقپارات اگەنتتىگىنىڭ, سونداي-اق حالىقارالىق تۇركى اكادەمياسىنىڭ قولداۋىمەن قازاقستاننىڭ ۆەنگرياداعى ەلشىلىگى « ۇلى دالا رۋحى» فوتوكورمەسىن ۇيىمداستىردى.
استانانىڭ 20 جىلدىعىنا ارنالعان كورمەدە «ەگەمەن قازاقستان» گازەتى مەن «قازاقپارات» حاا-نىڭ ەرلان وماروۆ, مۇحتار حولدوربەكوۆ, ۆيكتور فەديۋنين, الەكساندر پاۆسكي جانە يلزات سافارگاليەۆ سىندى فوتوتىلشىلەرىنىڭ تاڭداۋلى جۇمىستارى كوپتىڭ نازارىنا ۇسىنىلدى. قازاقستاننىڭ باي تاريحى مەن بۇگىنگى قايتالانباس كەلبەتىنەن سىر شەرتەتىن فوتوسۋرەتتەرگە قۇرىلتاي قاتىسۋشىلارى مەن قوناقتار ەرەكشە قىزىعۋشىلىق ءبىلدىردى. كورمەگە ارنايى قاتىسقان ماجارستان پارلامەنتىنىڭ ۆيتسە-سپيكەرى شاندور لەجاك جوعارى دەڭگەيدە وتكەن شارا ءۇشىن ۇيىمداستىرۋشىلار القاسىنا ريزاشىلىعىن ءبىلدىردى. بۇدان بولەك, بۋگاتس شاعىن اۋدانىنداعى ەكى كۇنگە سوزىلعان قۇرىلتاي الاڭى تەاترلاندىرىلعان سان الۋان شوۋ-باعدارلامالار مەن ءتۇرلى ەتنوتوپتاردىڭ ءان سالۋىمەن, ارحەولوگيالىق-انتروپولوگيالىق كورمەلەر مەن كوزدىڭ جاۋىن الار قولونەر جارمەڭكەسىمەن تولىعا ءتۇستى.
ايا ءومىرتاي,
«ەگەمەن قازاقستان»