«استانا وپەرا» كامەرالىق زال ساحناسىندا ع.ا.جۇبانوۆا اتىنداعى اقتوبە وبلىستىق فيلارمونياسىنىڭ قازاق كامەرالىق حورى گاسترولدىك ساپارمەن ونەر كورسەتەدى. «قۇتتى مەكەن اقتوبەدەن ءان شاشۋ» كونتسەرتى 19-تامىزدا وتەدى.
اقتوبە وبلىستىق فيلارمونياسىنىڭ قازاق كامەرالىق حورى رەسپۋبليكامىزداعى الدىڭعى قاتارلى حور ۇجىمدارىنىڭ ءبىرى. ۇجىمنىڭ شىعارماشىلىق جولى 1991 جىلى باستالعان. بۇگىندە حور رەپەرتۋارىندا 400-دەن استام تۋىندىلار بار. حالىق اندەرى, قازاقستاندىق جانە شەتەلدىك كومپوزيتورلاردىڭ كامەرالىق شىعارمالارىمەن قاتار, ارتىستەر ۆ.ا.موتسارتتىڭ رەكۆيەم, ك.ورفتىڭ «كارمينا بۋرانا», گ.سۆيريدوۆتىڭ «پۋشكينسكي ۆەنوك» جانە «نەيزرەچەننوە چۋدو», م.ساعاتوۆتىڭ «مەرەكەلىك كانتاتا» جانە تاعى باسقا حور كلاسسيكاسىنىڭ كولەمدى شىعارمالارىن ورىندايدى. كوركەمدىك جەتەكشىسى جانە ديريجەرى – مەربول قۇسپانوۆ, حورمەيستەرلەر – ءمادي ابىشەۆ, لەيلا كۋششانوۆا.
وسى كەشتە ەلوردالىق كورەرمەندەرگە حالىق اندەرى, وتاندىق جانە شەتەلدىك اۆتورلاردىڭ جاۋھار تۋىندىلارى ۇسىنىلادى.