اقتاۋ قالاسىندا بەسىنشى كاسپي ءسامميتىنىڭ قارساڭىندا قازاقستاندىق تاراپتىڭ توراعالىعىمەن كاسپي ماڭىنداعى مەملەكەتتەر سىرتقى ىستەر مينيسترلەرىنىڭ كەڭەسى ءوتتى, دەپ حابارلايدى قر ءسىم ءباسپاسوز قىزمەتى.
كەڭەستىڭ جۇمىسىنا ازەربايجاننىڭ سىرتقىساياسي ۆەدومستۆوسىنىڭ باسشىسى ەلمار مامەدياروۆ, يراننىڭ - دجاۆاد زاريف, قازاقستاننىڭ - قايرات ءابدىراحمانوۆ, رەسەيدىڭ - سەرگەي لاۆروۆ جانە تۇركىمەنستاننىڭ - راشيد مەرەدوۆ قاتىسىپ, الداعى جوعارى دەڭگەيدەگى «كاسپي بەستىگى» كەزدەسۋىنە دايىندىق جۇمىستارىن قورىتىندىلادى.
«بۇگىن ءبىز ىلگەرىلەمەلى كەلىسىمگە ۇمتىلۋ جانە ءوزارا ءتيىمدى شەشىمدەردى تابۋدىڭ ارقاسىندا كاسپي تەڭىزىندەگى ءوزارا ارەكەتتەسۋگە قاتىستى بارلىق ماسەلەلەر بويىنشا كونسەنسۋسكە كەلە الدىق. بۇنىڭ ايعاعى رەتىندە پرەزيدەنتتەرگە قول قويۋعا ۇسىنىلعان كاسپي تەڭىزىنىڭ قۇقىقتىق مارتەبەسى تۋرالى كونۆەنتسيانىڭ جوباسى بولىپ تابىلادى», - دەدى ق.ءابدىراحمانوۆ. اتقارىلعان جۇمىس كاسپي ماڭىنداعى مەملەكەت باسشىلارىنىڭ بەلسەندى اتسالىسۋى مەن جەكە كوڭىل ءبولۋىنىڭ ارقاسىندا جۇزەگە اسىرىلعانى اتاپ ءوتىلدى.
كاسپي ماڭى مەملەكەتتەرىنىڭ سىرتقى ىستەر مينيسترلەرى بەسىنشى كاسپي ءسامميتى بارىسىندا قول قويۋعا جوسپارلانعان كاسپي تەڭىزىنىڭ قۇقىقتىق مارتەبەسى تۋرالى كونۆەنتسيانىڭ ەرەجەلەرىن جۇزەگە اسىرۋ بويىنشا تاراپتاردىڭ كەلەشەك ارەكەتتەرىن بەينەلەيتىن حاتتامانى قابىلدادى.