قازاقستان پرەزيدەنتى «DP World» كومپانياسى باسقارماسىنىڭ توراعاسى سۇلتان احمەد بين سۋلايەممەن كەزدەستى, دەپ حابارلايدى اقوردانىڭ ءباسپاسوز قىزمەتى.
كەزدەسۋ بارىسىندا مەملەكەت باسشىسى «DP World» كومپانياسىنىڭ جۇك تاسىمالى مەن لوگيستيكا سالاسىنداعى جەتىستىكتەرىن اتاپ ءوتتى.
– سىزدەر الەمدەگى 78 تەرمينالدى باسقارىپ, 6 قۇرلىقتاعى 42 ەلمەن جۇمىس ىستەيسىزدەر. ءبىز ءۇشىن سىزدەردىڭ مول تاجىريبەلەرىڭىز اسا ماڭىزدى, بىرلەسىپ جۇمىس ىستەۋگە دايىنبىز, – دەدى نۇرسۇلتان نازارباەۆ.
قازاقستان پرەزيدەنتى ينۆەستيتسيا تارتۋ ءۇشىن جاسالىپ جاتقان ەلىمىزدەگى جاعدايعا ەرەكشە توقتالىپ, قۇرىق پورتى ەركىن ەكونوميكالىق ايماعىنىڭ باسىمدىقتارى جونىندە ايتتى.
– ءبىز جاڭا جول سالدىق, الاشانكوۋ مەن قورعاس ارقىلى وتەتىن ەكى جول تارتىلدى. وسىلايشا, ءبىز شىعىس قىتاي پروۆينتسياسىنان قازاقستان, ورتالىق ازيا, رەسەي, پارسى شىعاناعى, قارا تەڭىز جانە جەرورتا تەڭىزى ارقىلى ەۋروپاعا جۇك تاسىمالداۋ كولەمىن تولىق قامتاماسىز ەتىپ وتىرمىز, – دەدى نۇرسۇلتان نازارباەۆ.
كومپانيا جەتەكشىسى مەملەكەت باسشىسىن قۇرىق پورتى مۋلتيمودالدى تەرمينالىنىڭ ىسكە قوسىلۋىمەن قۇتتىقتاپ, قازاقستاندا ترانسۇلتتىق تاسىمالداۋشىلاردىڭ جۇمىس ىستەۋىنە قولايلى جاعداي جاسالعانى ءۇشىن العىس ءبىلدىردى.
– مەن ءسىزدىڭ سىڭىرگەن ەڭبەگىڭىزدى جوعارى باعالايتىنىمدى تاعى دا اتاپ وتكىم كەلەدى. بۇل جوبانىڭ جۇزەگە اسىرىلۋى, شىندىعىندا, عاجايىپ ءىس بولىپ سانالادى. سەبەبى ينفراقۇرىلىمعا قارجى سالماي, قازاقستاندا عانا ەمەس, سونداي-اق وسى وڭىردە ەكونوميكالىق تۇرعىدان جەتىستىككە جەتۋ مۇمكىن ەمەس. ءبىز ءوز تۇتىنۋشىلارىمىزدىڭ ماقساتتارى مەن قاجەتتىلىكتەرى ءۇشىن اقتاۋ پورتىنىڭ جۇمىسىنا مۇددەلى بولىپ وتىرمىز, – دەدى سۇلتان احمەد بين سۋلايەم.
سوڭىندا قازاقستان پرەزيدەنتى «DP World» كومپانياسىنىڭ باسشىسىنا ءوزارا ءتيىمدى ىنتىماقتاستىق جولىندا زور تابىس تىلەدى.