باقىتجان ساعىنتاەۆ ۇكىمەت وتىرىسىندا وتىن تاپشىلىعى ماسەلەسىن تالقىلادى, دەپ حابارلايدى قر پرەمەر-ءمينيستردىڭ باسپاسوز قىزمەتى.
قابىلدانعان شارالار قورىتىندىلارى
ەلوردا مەن وڭىرلەردە تۋىنداعان, كومىر باعاسىنىڭ كۇرت وسۋىنە اكەلگەن جاعداي مونوپولياعا قارسى كۇرەس كوميتەتىنىڭ باسا نازارىنا ءىلىندى.
قر ۇەم تابيعي مونوپوليالاردى رەتتەۋ كوميتەتىنەن حابارلاعانداي, 2017/2018 جىلۋ ماۋسىمىندا كومىر تاپشىلىعى مەن ونىڭ باعاسىنىڭ ءوسۋى فاكتىلەرى بويىنشا ءۇش كومىر وندىرەتىن كومپانيا مەن 96 بولشەك-كوتەرمە جەتكىزۋشىلەرگە قاتىستى باسەكەلەستىكتى قورعاۋ سالاسىنداعى زاڭنامانى بۇزعاندارى ءۇشىن 21 تەرگەۋ باستالعان.
قازىرگى تاڭدا, 20 تەرگەۋ اياقتالدى, ونىڭ ىشىندە 12 جاعدايدا 50 سۋبەكتىنىڭ بۇزۋشىلىققا ورىن بەرگەنى راستالدى:
شقو-دا كومىر نارىعىندا كوتەرمە جەتكىزۋشىلەردىڭ ەكونوميكالىق ءىس-ارەكەتىن ۇيلەستىرۋمەن اينالىسقان «قاراجىرا» اق كومىر وندىرۋشىگە قاتىستى تەرگەۋ.
ون وڭىردە (استانادا, اقمولا, اقتوبە, الماتى, شقو, جامبىل, بقو, قاراعاندى, سقو, تۇركىستان وبلىستارىندا) باعانى وسىرۋگە بايلانىستى كەلىسىلگەن ءىس-ارەكەتتەردى جاساۋىنا نەمەسە كارتەلدەر جاساسۋعا كۇدىكتى رەتىندە 49 كوتەرمە-بولشەك كومىر جەتكىزۋشىلەرگە قاتىستى 11 تەرگەۋ.
مونوپوليالىق كىرىستى ەسكەرۋمەن اكىمشىلىك ايىپپۇلدىڭ جالپى سوماسى 299 ملن تەڭگەنى قۇرادى, قازىرگى كەزدە ونىڭ 47,4 ملن تەڭگەسى تولەندى. قالعان ايىپپۇل سوماسىنا قاتىستى اكىمشىلىك ىستەر سوتتاردا قارالىپ جاتىر.
كوميتەتتە اقپاراتتاندىرعانداي, ساۋدا-ساتتىقتاردا كارتەل جاساسۋ بويىنشا قوستاناي وبلىسىندا ءتورت كوتەرمە جەتكىزۋشىگە قاتىستى ءبىر تەرگەۋ ءىسى اياقتالىپ قالدى.
ءوندىرۋ وتكەن جىلعىدان كوپ
ەنەرگەتيكا مينيسترلىگىنىڭ مالىمەتىنشە, جەدەل دەرەكتەر بويىنشا كومىر وندىرەتىن كاسىپورىندار ا.ج. جەتى ايىنىڭ ىشىندە 60 ملن ت كومىر وندىرگەن, بۇل وتكەن جىلعى وسىنداي كەزەڭگە شاققاندا 103,9% (59,7 ملن ت).
ەلەكتر ستانتسيالارىنا 32,4 ملن ت كومىر تيەلدى, بۇل وتكەن جىلدىڭ وسى كەزەڭىنە شاققاندا 102,5% (31,6 ملن ت). تۇرعىنداردىڭ كوممۋنالدىق-تۇرمىستىق قاجەتتىلىكتەرى ءۇشىن 5,44 ملن ت كومىر تيەلدى – 2017 ج. وسى كەزەڭگە شاققاندا 100% (5,3 ملن ت). ۆەدومستۆودان اتاپ وتكەندەي, بۇل كەزەڭدە 15,5 ملن ت كومىر ەكسپورتتالدى.
ەنەرگەتيكا مينيسترلىگىندە وتكەن جىلۋ ماۋسىمىندا تۇرعىندار ءۇشىن كومىر جەتكىزۋدە ىركىلىستەر بولعانىن مويىندايدى.
«بۇل نەگىزگى ەكى فاكتورعا بايلانىستى: جەرگىلىكتى اتقارۋشى ورگاندار تاراپىنان دايىندىقتىڭ بولماۋى جانە ادال ەمەس كومىر جەتكىزۋشىلەردىڭ ۇيلەستىرىلمەگەن ءىس-ارەكەتى», دەپ ناقتىلادى ەم.