بىشكەكتەگى گ.ايتيەۆ اتىنداعى قىرعىز ۇلتتىق سۋرەت ونەرى مۋزەيىندە قازاقتىڭ مايتالمان سۋرەتشىسى, گوبەلەن-تۇكتى توقىما ونەرىنىڭ حاس شەبەرى قۇتتىبەك جاقىپتىڭ « ۇلى دالا اۋەنى» اتتى كورمەسى اشىلدى.
كورمە زاڭعار جازۋشى شىڭعىس ايتماتوۆتىڭ 90 جىلدىق مەرەيتويىنا جانە قىركۇيەكتىڭ ءبىرىنشى اپتاسىندا ىستىقكولدە وتەتىن III دۇنيەجۇزىلىك كوشپەندىلەر ويىندارىنىڭ قارساڭىندا ۇيىمداستىرىلدى.
كورمەنى قىرعىز جۇرتشىلىعى, ونەر سۇيەر قاۋىمى جىلى قابىل الدى. سۋرەتشىنىڭ قولدان توقىلعان گوبەلەندەرىنىڭ كوركەمدىگىنە سۇيسىنگەن كورەرمەن كوپ بولدى. ولاردى قۇتتىبەك جاقىپ تۋىندىلارىنىڭ وزىندىك ورنەگى, ءپالساپاسى قىزىقتىردى.
قۇتتىبەكتىڭ قۇتتى قولىنان شىققان سۋرەتتەردەگى ويۋ-ورنەكتەر مەن ايشىقتاردان باۋىرلاس قازاق پەن قىرعىزدىڭ قولونەرىنىڭ باستاۋى ءبىر ەكەنى ايقىن اڭعارىلدى. مۇمكىن, قىرعىز كورەرمەندەرىن باۋراپ العان سۋرەتتەگى وسىنداي قۇبىلىس بولار.
كورمەگە سۋرەتشىنىڭ « ۇلى دالا», «بالداۋرەن», «قانسونار», «اق تۇيە», «تۇيعىن», «ۇرشىق», «اعاش ءومىرى», «تەاتر» جانە باسقا ەلۋدەن اسا تۇكتى توقىما پولوتنوسى قويىلعان.
نازاربەك بايجىگىتوۆ,
بىشكەك