جولاۋشىعا وي سەرىك. جاڭا عانا جەڭىل كولىكتىڭ ىشىندەگى راديو جەلىسىنەن وقىس وقيعا جايلى اقپارات ەستىگەنبىز. ون التىداعى بوزبالا كوپ قاباتتى ءۇيدىڭ التىنشى قاباتىنان سەكىرىپ كەتىپ, وپات بولىپتى. سەبەپ, اتا-اناسى نوۋتبۋك اپەرمەگەن. بايعۇس بوزبالا. امان بولسا, الدا قانشا عۇمىر بار, الدەنەشە نوۋتبۋك, بالكىم ودان قىمباتىن ۇستاماس پا ەدى؟..
ستەپنياك قالاسىنا جەتكەنبىز. قوناق ۇيگە ورنالاستىق. ءزاۋى ءبىر سەبەپپەن ەكىنشى قاباتتاعى اياق كيىم جوندەيتىن شەبەرحاناعا باس سۇققانبىز. سۇڭعاق بويلى, قاراتورى جىگىت قارسى الدى. ءوز جايىن ىممەن ۇقتىرعان. ءتىلسىز ەكەن. ءبىز قولىمىزداعى قالام مەن بلوكنوتىمىزدى كورسەتتىك. سوعان قاراپ, قاي كاسىپتىڭ ادامى ەكەنىمىزدى ۇققانداي. قالىپتى ماشىقپەن اۋانى ايقىش-ۇيقىش سىزعىلاپ, الدەنەنى ايتىپ جاتىر. وكىنىشكە قاراي ىمىن ۇعا المادىق. دەس بەرگەندە ءبىزدىڭ جايىمىزدى كورگەن جىگىت اعاسى وسىنداعى ساڭىراۋلار قوعامىندا روزا ايتماعانبەتوۆا ەسىمدى اۋدارماشىنىڭ بار ەكەندىگىن جەتكىزگەن. جۋرناليست ەكەنىمىزدى ايتقان سوڭ روزا اپاي بىردەن كەلىسە كەتتى.
شەبەردىڭ اتى-ءجونى يۋري جۋكوۆ. تۋمىسىنان ءتىلسىز. 2016 جىلى ءوز قارجىسىنا اياق كيىم جوندەيتىن شەبەرحانا اشىپ الىپتى. سودان بەرى ەل العىسىنا بولەنۋدە. توزعان اياق كيىمدى جاماپ-جاسقاۋ باعاسى ارزان ءارى كەلگەن ادامدى جىلىشىرايمەن قارسى الادى. ءتىلسىز-اق ءتامام ەلمەن ءتىل تابىسىپ ءجۇر. جالعىز اياق كيىم جوندەۋمەن عانا ەمەس, سپورتپەن دە اينالىسادى. اۋدان, وبلىس بىلاي تۇرسىن, رەسپۋبليكالىق سپارتاكيادالاردا توپ جارعان. مۇمكىندىگى شەكتەۋلى ء«ۇمىت» سپارتاكياداسىنىڭ الدەنەشە مارتە جەڭىمپازى. اۋىر اتلەتيكا جانە ارمرەستلينگپەن كۇندەلىكتى شۇعىلدانادى. جاتىپ كوتەرۋدەن 75 كەلى سالماق مەجەسىندە. مەنىڭ كوز الدىما اۋىر زىلتەمىردى ەمەس, تاعدىردىڭ سالماعىن قينالماي كوتەرىپ جۇرگەندەي ەلەستەپ كەتتى.
سۇڭعاق بويلى, ادەمىشە جىگىتتىڭ جۇزىندە تاعدىر تالقىسىنا دەگەن تورىعۋ جوق. قايتا ومىرگە قۇشتارلىقتىڭ لەبى ەسىپ تۇر.
– جارىسقا دايىندالىپ جاتىرمىن,– دەيدى ول اۋدارماشى ارقىلى ايتقان اڭگىمەسىندە, – بۇرىن جاعدايىم قيىنداۋ ەدى, قازىر ءبىر بولمەلى ءۇي الدىم. انام ەكەۋىمىز تۇرىپ جاتىرمىز. ءوز تابىسىم وزىمە جەتەدى. انام نادەجدا كوركينا قىرىق جىل مۇعالىم بولعان كىسى.
– وتە ەڭبەكقور, تازا, ادال جىگىت. اۋدان ورتالىعىنداعى مۇقتاج جاننىڭ ءبارى وسىندا كەلەدى. كەيبىرەۋلەردى مۇسىركەپ, تەگىن دە كومەكتەسە سالادى. انادا ءبىر كەلسەم, ون ەكى مۇشەسى ساۋ, تەپسە تەمىر ۇزەتىن ءوزىمىزدىڭ ءبىر جىگىت يۋريگە تەگىن ىستەپ بەرشى دەپ قولقا سالىپ تۇر ەكەن. ۇيالعانىم-اي, – دەيدى كولدەنەڭنەن كيلىككەن قاپپاس جانسۇگىروۆ اقساقال.
كۇن استىندا جۇرگەنمەن, كۇرسىنۋگە سەبەپ كوپ قوي. ايتسە دە تاعدىردىڭ سالعان ىسىنە مويىماعان شەبەردىڭ تىرشىلىگىنە ءتانتى بولدىق. سول كەزدە اتا-اناسىنا بولماشى زات ءۇشىن وكپەلەپ, دۇنيەدەن باز كەشكەن بوزبالانىڭ ەسىمىزگە تۇسكەنى.
بايقال ءبايادىل,
«ەگەمەن قازاقستان»