ەلەكتروندى تولەم جۇيەسى مەن سارالانعان تاريف ەنگىزىلگەننەن بەرى استانا قالاسىنداعى قوعامدىق كولىكتەر سالاسىندا قىزمەت ەتەتىن تاسىمالداۋشىلاردىڭ تابىسى دۇرىستالدى. بۇل جايلى «نۇر وتان» پارتياسى قالالىق فيليالىنىڭ ءماسليحات دەپۋتاتى يليا مەششەرياكوۆ توراعالىق ەتكەن كوشپەلى وتىرىستا ايتىلدى. سونداي-اق جيىندا استانالىق جولاۋشىلاردىڭ 90%-ءى جول تولەم كارتاسىن قولداناتىندىعى ءمالىم بولدى. باسقوسۋدا ودان بولەك جاڭا كولىك قۇرالدارىن قۇرۋ جانە «استانا LRT» كومپانياسىنىڭ قىزمەتى تالقىلاندى. اتاپ ايتقاندا, City Bus, «Bus Lane ايرىقشا جولاقتار», «استانا قالاسىنىڭ كولىك قوياتىن كەڭىستىگىن باسقارۋ» جانە «استانانىڭ جاڭا تاسىمالداۋ جۇيەسى – LRT» سياقتى جوبالار قاراستىرىلدى.
سارالانعان ءتاريفتى ەنگىزۋدىڭ العاشقى ناتيجەلەرىنە كەلەر بولساق, بۇل جايىندا «استانا LRT» جشس باسشىسى بەكمىرزا يگەنبەردينوۆ ايتىپ بەردى. ونىڭ ايتۋىنشا, ەڭ باستىسى تاسىمالداۋشىلاردىڭ تابىسى ايقىن كورىنە باستاعان. «سارالانعان ءتاريفتى ەنگىزەردەن بۇرىن جاسالعان بولجام بويىنشا, باسقا تابىس سوماسىن كۇتكەن بولاتىنبىز, بىراق ەكى اپتادان سوڭ, باسقا سوماعا كۋا بولدىق, ياعني پاركتەردىڭ تابىسى 15%-كە وسكەن», دەيدى كومپانيا باسشىسى. ول اتالعان كورسەتكىشتىڭ ءارى قاراي دا جوعارىلاۋىن كۇتەتىندىگىن ايتادى. سونىمەن قاتار كومپانيا الداعى ۋاقىتتا كارتا تۇتىنۋشىلارىنىڭ ۇلەسىن 95-98%-كە دەيىن جەتكىزۋدى جوسپارلاپ وتىر. سوندا كوپشىلىككە تاسىمالداۋشىلاردىڭ شىنايى تابىستارىن كورسەتىپ, جىل سوڭىندا تاريفتىك ساياسات بويىنشا ۇسىنىستار جاساۋ وڭايعا تۇسپەك.
سونىمەن قاتار كوشپەلى وتىرىستا اۆتوبۋستارعا الدىڭعى ەسىكتەن كىرۋ ۋاقىت الاتىنى تۋرالى حالىقتىڭ شاعىمىنا قاتىستى پىكىرتالاس ورىن الدى. ساراپشى توپتىڭ ايتۋىنشا, بۇل ءتارتىپ بيلەتسىز جولاۋشىلاردى انىقتاۋ ءۇشىن قاجەت. اتالعان لوگيستيكا قىزمەتى حالىقارالىق تاجىريبە نەگىزىندە ەنگىزىلگەن. كومپانيا قىزمەتكەرلەرى استانا قالالىق ىشكى ىستەر دەپارتامەنتى مەن جول-پاترۋلدىك قىزمەتىمەن بىرگە قوعامدىق كولىك ءتارتىبىن باقىلاۋدى كۇشەيتىپ جاتقاندىعىن مالىمدەدى.
سونداي-اق كاسىپورىن باسشىسى ب.يگەمبەردينوۆ اعىمداعى جىلى جولاقىقۇنى كوتەرىلمەيتىنىن, تاريفتەر بويىنشا بارلىق شەشىمدەر اۆتوپاركتەردىڭ جۇمىسىن سۋبسيديالاۋ دەڭگەيىن جانە ونداعى جۇمىستاردى مۇقيات تالداپ, قوعامدىق تالقىلاۋدان كەيىن جاسالاتىنىن ەسكەرتتى.
وتىرىستا قوعامدىق كولىكتەردەگى قىزمەت كورسەتۋ مادەنيەتى, ونىڭ ىشىندە, جۇرگىزۋشىلەردىڭ كاسىپقويلىعى مەن ءجۇرىس-تۇرىسى ماسەلەسى دە كەڭىنەن تالقىلاندى. ء«ار جۇرگىزۋشى ادام تاسىمالداپ كەلە جاتقاندىعىن تۇسىنەتىندەي, بىرتىندەپ قارىم-قاتىناستارىن تۇزەپ كەلەمىز. اۆتوپاركتەردىڭ باسشىلىعىمەن سويلەستىك, قازىر ولار دا جۇرگىزۋشىلەر ساپالى قىزمەت ەتۋ ءۇشىن جالاقىسىن كوتەرگەنىن العا تارتتى», دەيدى كومپانيا باسشىسى.
بۇدان بولەك, جيىندا «استانانىڭ جاڭا تاسىمالداۋ جۇيەسى - LRت» جوباسىن جۇزەگە اسىرۋ جاعى تالقىلاندى. بۇل نۇرسۇلتان نازارباەۆ حالىقارالىق اۋەجايىنان «نۇرلى جول» تەمىر جول ۆوكزالىنا دەيىنگى اۋماقتى قامتيدى. جەڭىل رەلستى كولىك LRT – ەكولوگيالىق تازالىققا, جولاۋشىلاردىڭ كوپتىگىنە جانە جوعارى جايلىلىق دەڭگەيىنە باعىتتالعان جەتىلدىرىلگەن تاسىمالداۋ جۇيەسى بولماق. ولاردىڭ ايتۋىنشا, ەكى ءتۇرلى ستانسالار اۆتوكولىك جولدارىنىڭ شەتىندە جانە ونىڭ ورتالىق بولىگىندە ورنالاسادى. ستانسالاردىڭ اراسىنداعى قاشىقتىق 800-دەن 1000 مەترگە دەيىن بولماق. وعان كەلەشەكتە جەر استى نەمەسە جەر ءۇستى جولدارى ارقىلى دا كىرۋگە بولاتىنىن ايتا كەتكەنىمىز ءجون.
سونىمەن قاتار جيىندا ەلورداداعى اۆتوبۋس پاركتەرىنىڭ قوزعالىس قۇرامىن جاڭارتۋ ماسەلەسى ايتىلدى. قازىر استانا اۆتوبۋستار پاركى City Bus-1, City Bus-2 جوبالارىنىڭ اياسىندا جاڭارتىلىپ جاتىر, سونىڭ ارقاسىندا 400-گە جۋىق ەسكىرگەن كولىكتەر پايدالانۋدان شىعارىلعان. ونىڭ ورنىنا سالقىنداتقىشتارمەن, جىلىتۋ, اقپاراتتاندىرۋ جانە ۆيدەوباقىلاۋ جۇيەسىمەن جابدىقتالعان جاڭا, جايلى كولىكتەر الىنعان.
سونداي-اق استانا قالاسىندا ەلەكتروبۋستار مەن گيبريدتى اۆتوبۋستاردى ەنگىزۋ جوسپارلانۋدا. قازىرگى تاڭدا بۇل قوعامدىق كولىكتەر باس قالانىڭ قولايسىز كليماتتىق جاعدايىندا جۇمىس ىستەۋ ءۇشىن سىناقتان ءوتىپ جاتىر.
ميراس اسان, «ەگەمەن قازاقستان»