مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىندە سىبايلاس جەمقورلىقتىڭ الدىن الۋ, حالىقارالىق قاتىناستاردى دامىتۋ, مەملەكەتتىك قىزمەتتى وتكەرۋ, سونداي-اق سىبايلاس جەمقورلىققا قارسى ءىس-قيمىل بيۋروسىنىڭ اعىمداعى قىزمەتىنە ارنالعان بريفينگ ءوتتى.
الدىمەن سىبايلاس جەمقورلىققا قارسى ساياسات دەپارتامەنتىنىڭ ديرەكتورى دانيار سابىرباەۆ ءسوز الىپ, اگەنتتىك باستاماسىمەن ماۋسىم ايىنان باستاپ «Protecting business and investments» ينۆەستورلاردى قورعاۋ جوباسىنىڭ جۇزەگە اسىرىلا باستاعانىن جەتكىزدى. ونىڭ ايتۋىنشا, بۇگىندە جەمقورلىقتان قورعاۋ ماقساتىندا وتاندىق جانە شەتەلدىك 56 ينۆەست-جوبا تىكەلەي اگەنتتىك قامقورلىعىنا الىنعان. ولاردىڭ قارجى پورتفەلى 2 ترلن 875 ملرد تەڭگەنى قۇرايدى. جوبا قىزمەتىن باستاعان قىسقا ۋاقىت ىشىندە كاسىپكەرلەردەن 26 ارىز ءتۇسىپ ۇلگەرگەن كورىنەدى. جۇرگىزىلگەن تەكسەرىستەردىڭ 18-ءى ينۆەستورلار پايداسىنا شەشىلگەن. ماسەلەن, قوستاناي وبلىسىندا «زاريا» اق-تىڭ زاڭدىق قۇقى قورعالىپ, جايىلىم جەرى يەسىنە قايتارىلعان. سونىمەن بىرگە ارحيپوۆكا اۋىلىنىڭ 650 تۇرعىنىنىڭ قۇقى قورعالعان. ال كومپانياعا اكىمشىلىك كەدەرگىلەر جاساعان اۋىل اكىمى قىزمەتىنەن بوساتىلدى. الماتى وبلىسىنداعى ايماقتىق كەڭسەگە ارىز ايتا كەلگەن «Empire Food» كومپانياسىنىڭ ماسەلەلەرى دە وڭ شەشىلدى.
بيىل اگەنتتىك ءباسپاسوز ارقىلى ءبىلىم جانە عىلىم مينيسترلىگى قىزمەتىندەگى ىشكى سىبايلاس جەمقورلىقتى ساراپتاۋ ماقساتىندا جۇمىس توبىنا قوسىلۋعا ەرىكتىلەردى شاقىرعان بولاتىن. جۇمىس توبىنا وزدەرىنىڭ وسى سالادا ءبىلىمى مەن تاجىريبەسى بار ەكەنىن ايعاقتايتىن قۇجاتتارى بارىن راستاعان 45 مامان قابىلدانىپ, ولار زەرتتەۋ اياقتالعان سوڭ 1061 ۇسىنىس دايارلاعان. ناتيجەسىندە ءتۇرلى دەڭگەيدەگى 114 جاڭا قۇقىقتىق اكتىلەر قابىلداندى.
سونىمەن قاتار كۆازيمەملەكەتتىك سەكتور سۋبەكتىلەرىنە اگەنتتىك تاراپىنان تۇراقتى مونيتورينگ جۇرگىزىلۋدە. اتاپ ايتقاندا, «قازاۆتوجول» ۇك» اق-تىڭ شىعىس قازاقستان وبلىسىنداعى فيليالىنىڭ ديرەكتورى قىزمەتىنە بۇرىن جەمقورلىق قىلمىسى ءۇشىن جاۋاپكەرشىلىككە تارتىلعان تۇلعانىڭ تاعايىندالعانى انىقتالدى. بۇل مالىمەت قازىر تەكسەرىلۋ ۇستىندە. اگەنتتىكتىڭ ءجىتى نازارعا العان باعىتتارىنىڭ ءبىرى – پويىز بيلەتتەرىنىڭ جەتىسپەۋشىلىگى. وسى ورايدا «قازاقستان تەمىر جولى» ۇك» اق بازاسىندا, تەمىر جول تاسىمالى سالاسىنداعى جۇيەلى سىبايلاس جەمقورلىقتى جويۋ, جەمقورلىق فاكتىلەرىنىڭ الدىن الۋ ءۇشىن تىكەلەي اگەنتتىككە باعىناتىن «ادال جول» كەڭسەسى قۇرىلماق. دەپارتامەنت باسشىسى اگەنتتىكتىڭ تەمىر جول بيلەتتەرىنىڭ زاڭدى ساتىلۋىنا قاتىستى تەكسەرىس جۇرگىزگەنىن اتاپ ءوتىپ, «الىپ-ساتۋ» ءادىسى ارقىلى جولاۋشىنى بيلەتسىز كەز كەلگەن وڭىرگە جىبەرە الاتىن «كومەكشىلەر» انىقتالعانىن حابارلادى. زاڭسىز تاسىمالداۋشىلار جولاۋشىلارعا تەمىر جول بيلەتتەرىن نارىق باعاسىنان 50% قىمباتقا ساتقان.
ستراتەگيالىق ازىرلەۋ جانە حالىقارالىق باعدارلامالار دەپارتامەنتىنىڭ ديرەكتورى ايجانات قۇشتاروۆا قازاقستاننىڭ ازيا جانە تىنىق مۇحيتى, ازيا دامۋ بانكى جانە ەكونوميكالىق ىنتىماقتاستىق جانە دامۋ ۇيىمىنا مۇشە ەلدەردىڭ سىبايلاس جەمقورلىققا قارسى باستاماسىنا مۇشە ەكەندىگىن حابارلادى. ونىڭ ايتۋىنشا, 6-8 قاراشادا استانادا وسى باستامانىڭ سىبايلاس جەمقورلىققا قارسى مادەنيەتتى دامىتۋ تۋرالى جينالىسى وتپەك. شاراعا 70-تەن استام شەتەلدىك ماماندار قاتىسادى دەپ كۇتىلۋدە. سونىمەن بىرگە بۇۇ-نىڭ ەسىرتكى جانە قىلمىستار بويىنشا باسقارماسىمەن تىعىز قارىم-قاتىناس ورناتىلعانى تۋرالى قىسقاشا مالىمەت بەرە كەتتى.
بريفينگ بارىسىندا ءسوز العان مەملەكەتتىك قىزمەت دەپارتامەنتىنىڭ ديرەكتورى جارقىن تىلەۋكەنوۆ مەملەكەتتىك قىزمەتتىڭ تارتىمدىلىعى ارتقانىن جەتكىزدى. ونىڭ ايتۋىنشا, بيىل 2694 مەملەكەتتىك قىزمەتكەر مانساپ جولىندا وسۋگە قول جەتكىزگەن. بۇل وتكەن جىلعى كورسەتكىشپەن سالىستىرعاندا 63 پروتسەنتكە جوعارى. اشىق بايقاۋ نەگىزىندە ىرىكتەلگەن مەملەكەتتىك قىزمەتكەرلەر سانى 42 %-كە ارتىپ, جەرگىلىكتى جەرلەردە كادر تۇراقسىزدىعى ازايعان.
بريفينگتى قورىتىندىلاعان اگەنتتىكتىڭ رەسمي وكىلى نۇرلان جاحين سوڭعى ەكى اپتادا قوعامدى شۋلاتقان سىبايلاس جەمقورلىق قىلمىستارى فاكتىلەرىنە توقتالىپ, سونداي-اق اگەنتتىك توراعاسى اليك شپەكباەۆ ۇلتتىق بيۋرونىڭ 8 ايماقتىق دەپارتامەنتىنىڭ باسشىلارىن روتاتسيالاۋ تۋرالى شەشىم قابىلداعانىن مالىمدەدى. ونىڭ ايتۋىنشا, روتاتسيا ءوز لاۋازىمدارىندا 2 جىلدان 4 جىلعا دەيىنگى ارالىقتا جۇمىس اتقارعان الماتى قالاسى, اتىراۋ, شىعىس قازاقستان, جامبىل, قوستاناي, قىزىلوردا, پاۆلودار جانە سولتۇستىك قازاقستان وبلىستارى بويىنشا دەپارتامەنت باسشىلارىنا قولدانىلعان.
ۆەنەرا تۇگەلباي, «ەگەمەن قازاقستان»