ميانمانىڭ نەپيدو قالاسىندا ۆولەيبولدان ەرلەر اراسىنداعى ازيانىڭ كلۋبتىق چەمپيوناتى اياقتالدى. وسى جارىستا باق سىناعان بيىلعى جىلعى قازاقستان بىرىنشىلىگىنىڭ جەڭىمپازى – «اتىراۋ» كۇمىس مەدالدى يەلەندى.
ايتۋلى دودادا سارى قۇرلىقتىڭ ەڭ ۇزدىك 13 كومانداسى شەبەرلىك بايقاستى. «ا» توبىندا ونەر كورسەتكەن «اتىراۋ» تۇساۋكەسەر كەزدەسۋدە يراننىڭ «Khatam Ardakan» كلۋبىنا ۇتىلعانىمەن, كەلەسى باسەكەلەردە كاتار مەن جاپونيانىڭ وكىلدەرىن جەڭدى. پلەي-وفف سايىستارىندا شري-لانكا مەن پاكستان ۆولەيبولشىلارىنان باسىم تۇسكەن جەرلەستەرىمىز فينالدا قايتا پارسى ەلىنىڭ ورەندەرىمەن كەزدەستى. بۇل جولى دا يراندىقتاردىڭ مىسى باسىم بولىپ, ولار باس جۇلدەنى ولجالادى. ءۇش سەتتىك ماتچ 27:29, 23:25 جانە 22:25 ەسەبىمەن اياقتالدى. «اتىراۋ» كۇمىس مەدالدى يەلەنسە, پاكستاندىقتار ءۇشىنشى ساتىعا تابان تىرەدى.
ميانامادا وتكەن جارىستا «اتىراۋدىڭ» ساپىندا يسلام جۇمابەكوۆ, رومان حاندرولين, ناريمان سۇلەيمەنوۆ, ولەگ شەۆچەنكو, الپامىس حيليموۆ, ايبات نەتالين, انتون پلەتنەۆ, دامير اكىموۆ, پەتر چۋرزين, ۆاسيلي نوسەنكو, سەرگەي كۋزنەتسوۆ, انتون كۋزنەتسوۆ, ۆيتالي ۆوريۆودين جانە ماكسيم مامەدوۆ سىندى ويىنشىلار ونەر كورسەتتى.
ەستەرىڭىزگە سالا كەتەيىك, ازيانىڭ كلۋبتىق چەمپيوناتى وسىمەن 19 مارتە ۇيىمداستىرىلىپ وتىر. بۇل باسەكەلەردە ەڭ كوپ ولجاعا كەنەلگەن يراننىڭ ۆولەيبولشىلارى. پارسى ەلىنىڭ كوماندالارى 13 رەت جەڭىس تۇعىرىنىڭ ەڭ بيىك ساتىسىنا كوتەرىلدى. وڭتۇستىك كورەيانىڭ وعىلاندارى ەكى مارتە تەڭدەسسىز دەپ تانىلسا, قىتاي, قازاقستان, كاتار جانە تايپەيدىڭ ۆولەيبولشىلارى ءبىر-ءبىر رەتتەن توپ جاردى. وسى ورايدا يراننىڭ «تايكان» كلۋبى جەتى رەت جەڭىمپاز اتانعانىن دا ايتا كەتۋگە ءتيىسپىز.
قازاقستاننىڭ وكىلدەرى ازيانىڭ كلۋبتىق چەمپيوناتىندا جەتى رەت جەڭىس تۇعىرىنا كوتەرىلدى. 2002 جانە 2004 جىلدارى «اتىراۋ» قولا مەدالدى قورجىنعا سالسا, 2005 جىلى الماتىنىڭ «راحاتى» باس جۇلدەنى ولجالادى. 2006 جىلى «راحات» كۇمىسپەن كۇپتەلسە, 2008 جانە 2011 جىلى «الماتى» كلۋبى ءدال سول مەجەدەن كورىندى. مىنە, ەندى ارادا جەتى جىل وتكەننەن كەيىن قازاقستاندىقتار قايتا جۇلدەگەرلەر قاتارىنان كورىندى. بۇل جولى «اتىراۋ» ەكىنشى ورىندى ەنشىلەپ, ءوز جانكۇيەرلەرىن قۋانتتى.
سوڭعى ەكى ازيانىڭ كلۋبتىق چەمپيوناتى يراننان كەلگەن «سارمايە بەنك» كومانداسىنىڭ جەڭىسىمەن اياقتالدى. 2016 جىلى ميانمادا وتكەن جارىستىق اقتىق سىنىندا ولار كاتاردىڭ ء«ال-ءارابيىن» ۇتسا, 2017 جىلى جاپونيانىڭ «تويودا گوسەيىنەن» ايلاسىن اسىردى. عالىم سۇلەيمەن,
«ەگەمەن قازاقستان»