«پرەزيدەنتتىڭ بەس الەۋمەتتىك باستاماسىن» باقىلاۋ جونىندەگى رەسپۋبليكالىق قوعامدىق كەڭەستىڭ توراعاسى باقىتجان جۇماعۇلوۆ قىزىلوردا وبلىسىنا جۇمىس ساپارىمەن كەلدى. كەڭەس توراعاسى باستاعان دەلەگاتسيا ايماقتاعى الەۋمەتتىك جانە ونەركاسىپتىك وبەكتىلەردىڭ جۇمىسىمەن تانىسىپ, «پرەزيدەنتتىڭ بەس الەۋمەتتىك باستاماسى» بويىنشا كەزدەسۋگە قاتىستى.
باقىتجان جۇماعۇلوۆ «7–20–25» باعدارلاماسىن ىسكە اسىرۋ اياسىندا سىرداريا وزەنىنىڭ سول جاعالاۋىنداعى تۇرعىن ءۇي قۇرىلىسى جۇمىستارىنىڭ قالاي ورىندالىپ جاتقانىن كوردى. 2017 جىلدىڭ قاراشاسىندا باستالعان «قاراوزەك» جوعارى تەحنولوگيالىق گازدى كومپرەسسورلىق ستانساسىنىڭ قۇرىلىسىمەن جانە وسى جىلدىڭ ءساۋىر ايىندا اشىلعان «Q-med» كلينيكاسىنىڭ جۇمىسىمەن تانىستى. «ەلەكتروتەحنولوگيا» جشس وقۋ ورتالىعى مەن «بولاشاق» ۋنيۆەرسيتەتىندە بولدى.
دوستىق ۇيىندە وبلىس اكىمى قىرىمبەك كوشەرباەۆ, رەسپۋبليكالىق قوعامدىق كەڭەستىڭ توراعاسى باقىتجان جۇماعۇلوۆ, «نۇر وتان» پارتياسىنىڭ حاتشىسى فارحاد قۋانعانوۆ جانە ءتيىستى مەملەكەتتىك ورگاندار وكىلدەرىنىڭ, ساياسي پارتيا جانە قوعام بەلسەندىلەرىنىڭ قاتىسۋىمەن مەملەكەت باسشىسىنىڭ بەس الەۋمەتتىك باستاماسىن قىزىلوردا وبلىسىندا جۇزەگە اسىرۋ بويىنشا كەڭەس بولىپ ءوتتى.
وبلىس اكىمى قىرىمبەك كوشەرباەۆ مەملەكەت باسشىسى تاپسىرماسىنىڭ ايماقتا ىسكە اسۋ بارىسى تۋرالى بايانداما جاسادى. ايماق باسشىسى شاعىن جانە ورتا كاسىپكەرلىكتى قولداۋ مەن ميكروكرەديتتەر سانىنىڭ ۇلعايۋى ارقىلى اعىمداعى جىلدىڭ 6 ايىنىڭ ىشىندە ءوزىن ءوزى ءتيىمسىز جۇمىسپەن قامتىعان جانە جۇمىسسىز 97538 ادامنىڭ 27 مىڭنان استامى جۇمىسقا ورنالاستىرىلعانىن ايتتى.
– سوڭعى ەكى جىلدىڭ كولەمىندە وبلىس بويىنشا مەملەكەتتىك قاراجات پەن جەكە قۇرىلىس سالۋشىلاردىڭ ەسەبىنەن 500 مىڭ شارشى مەترگە جۋىق تۇرعىن ءۇي پايدالانۋعا بەرىلدى. 2017 جىلى اپاتتى تۇرعىن ۇيلەردىڭ ماسەلەسىن تولىقتاي شەشتىك. بۇل جۇمىستى 2013 جىلى باستادىق. سودان بەرى اپاتتى ۇيدە تۇرىپ جاتقان 500-دەن اسا تۇرعىندى جايلى دا جاڭا باسپانامەن قامتاماسىز ەتتىك. قىزىلوردا وبلىسىنىڭ اۋماعىندا 1726 پاتەردى قۇرايتىن 42 كوپ قاباتتى تۇرعىن ءۇيدىڭ قۇرىلىسى ءجۇرىپ جاتىر. ءبىز 2018 جىلدى «جاپپاي كاسىپكەرلىكتى دامىتۋ جىلى» دەپ جاريالادىق. وسى ماقساتتا كەشەندى «جول كارتاسىن» ازىرلەدىك. ونى ىسكە اسىرۋعا جالپى ەسەبى 32 ملرد تەڭگە ءبولۋدى جوسپارلاپ وتىرمىز. ونىڭ ىشىندە 3 ملرد تەڭگە ستارتاپ جوبالارعا بولىنەدى, دەدى اكىم.
كەزدەسۋدى قورىتىندىلاعان الەۋمەتتىك باستامالاردى ىسكە اسىرۋ جونىندەگى كەڭەستىڭ توراعاسى ب.جۇماعۇلوۆ وڭىردە اتقارىلعان جۇمىستاردى جاقسى باعالايتىندىعىن ايتتى.
– سىرداريانىڭ سول جاعالاۋىنداعى جاڭا قالانىڭ سالىنۋىنا وراي بۇل باعدارلاما تۇرعىندار ءۇشىن ءتيىمدى بولار دەگەن ويدامىن. سونداي-اق بۇل تۇرعىدا «وردا» باعدارلاماسى بەكىتىلىپ, ءساتتى تاجىريبە جۇزەگە اسىرىلىپ جاتىر ەكەن. بۇل نەسيە الۋشىلاردىڭ اياسىن كەڭەيتۋگە جانە اتالعان باستامانى ءساتتى ىسكە اسىرۋعا سەپتىگىن تيگىزەتىنى انىق. مۇنداي باستاما ازىرگە تەك الماتى مەن قىزىلوردا وبلىسىندا بار. مۇنداي تاجىريبەنى وزگە دە وبلىستارعا دا تاراتۋ كەرەك دەپ ەسەپتەيمىن, – دەدى «پرەزيدەنتتىڭ بەس الەۋمەتتىك باستاماسىن» باقىلاۋ جونىندەگى رەسپۋبليكالىق قوعامدىق كەڭەستىڭ توراعاسى.
باقتيار تايجان, «ەگەمەن قازاقستان»