سولتۇستىك قازاقستاندا ەكسپەديتسيالىق توپ ءوز جۇمىسىن باستادى

بۇگىندە  800 ميلليونعا جۋىق اۋديتورياسى بار باسىلىم 130  جىلدا 12 مىڭنان استام گرانت ءبولىپ, ماڭىزدى عىلىمي-زەرتتەۋ جۇمىستارىن جۇرگىزىپ كەلەدى. جۋرنال الەمنىڭ  38 تىلىندە شىعارىلىپ, 80 ەلگە تارايدى. ورتا ازيادا  ءبىرىنشى بولىپ قازاقستاندا 2016 جىلى جارىق كورىپ, مەملەكەتتىك تىلدە تارالاتىن تۇڭعىش شەتەلدىك باسىلىم بولىپ تابىلادى.

ايماق باسشىسى قۇمار اقساقالوۆتىڭ ۇسىنىسىمەن وڭىرگە كەلگەن «National Geographic Qazastan» حالىقارالىق جۋرنالىنىڭ باسشىلىعى باق وكىلدەرىمەن كەزدەسۋدە ەكسپەديتسيالىق توپ قۇرىپ, تاريحي-مادەني ورىنداردى, كورىكتى جەرلەردى  ارالايتىندارىن, ەكولوگيالىق ماسەلەلەردى, جان-جانۋارلار دۇنيەسىن زەرتتەيتىندەرىن, الايدا باستى باعدار  ءتۋريزمدى ناسيحاتتاۋ بولىپ قالا بەرەتىنىن جەتكىزدى.

«شىعارماشىلىق توپ تەرىسكەيگە ءبىرىنشى رەت كەلىپ وتىرعانىنا قاراماستان ىسكە بىردەن كىرىسىپ كەتتى. فوتوسۋرەتتەر مەن بەينەتۇسىرىلىمدەردى جيناقتاپ, اعىلشىن تىلىندە ءتۇرلى-ءتۇستى جيناق شىعارۋدى جوسپارلاپ وتىرمىز.  ونداعى ماقسات–شالقار, يمانتاۋ سياقتى ايماقتىڭ قايتالانباس سۇلۋ تابيعاتى مەن بوتاي مادەنيەتى, ايعانىم قونىسى سەكىلدى تاريحي ورىندارعا شەتەلدىكتەردىڭ نازارىن اۋدارتۋ. توپتىڭ قۇرامىندا يتاليادان ارنايى شاقىرتىلعان وتە تاجىريبەلى فوتوگراف  البەرتو دە ماۋرو بار»,دەدى  ەكسپەديتسيا جەتەكشىسى  داۋرەن قۇدايبەرگەن الداعى ءىس-شارالارمەن ءبولىسىپ. ەكسپەديتسيا قورىتىندىسى بويىنشا  ارنايى كورمە ۇيىمداستىرىلىپ, سۋرەتتەر  قازاقستان مەن رەسەي اراسىندا وتەتىن وڭىرارالىق فورۋمعا دا ۇسىنىلاتىن بولادى. بۋكلەتتەر جاسالىپ, جۇرتشىلىققا تاراتىلماق.

وبلىس اكىمىنىڭ ورىنباسارى  داۋرەن جانداربەكتىڭ ايتۋىنشا  وڭىردە تابيعاتى اسەم, كورىكتى جەرلەر كوپ بولعانىمەن, ولاردى ناسيحاتتاۋ, تانىستىرۋ جاعى كەمشىن. ەندى وسى ولقىلىقتىڭ ورنىن تولتىرۋعا ون ادامنان قۇرالعان ەكسپەديتسيا سۇبەلى ۇلەس قوسىپ, تۋريستىك الەۋەتىمىزدى شەتەلدىكتەرگە كەڭىنەن  تانىتادى دەگەن سەنىمدە.

توپ مۇشەلەرى  14 كۇندە ءبىرجارىم مىڭ شاقىرىم جەردى ءجۇرىپ ءوتىپ, جيىرمادان استام تاريحي نىسانداردى ارالاماق.

ءومىر ەسقالي,

«ەگەمەن قازاقستان»

 سولتۇستىك قازاقستان وبلىسى