قازاقستاندىق زاعيپ جانە ناشار كورەتىن ازاماتتاردىڭ «Blind Race Astana-Paris» قۇرلىقارالىق ۆەلومارافونى باستالدى.
ۆەلوشەرۋدىڭ نەگىزگى ماقساتى - سالاۋاتتى ءومىر سالتىمەن قاتار ۆەلوسيپەدتى ەكولوگيالىق تازا كولىك ءتۇرى رەتىندە ناسيحاتتاۋ, سونداي-اق الەۋمەتتىك جانە ەكوتۋريزمدى دامىتۋ. سونىمەن قاتار مۇگەدەكتىگى بار ازاماتتار ءۇشىن ۆەلوسپورتتى پاراوليمپيادالىق سپورت ءتۇرى رەتىندە دامىتۋعا جاعداي جاساۋ. قۇرامى 16 زاعيپ جانە ناشار كورەتىن جانداردان تۇراتىن ۆەلومارافونشىلار ازيا مەن ەۋروپانى جالعاستىراتىن 6 ەل (قازاقستان, رەسەي, بەلارۋس, پولشا, گەرمانيا, فرانتسيا) مەن 30 قالانى (ماسكەۋ, مينسك, ۆارشاۆا, بەرلين, فرانكفۋرت-دە-ماينە, پاريج ت.ب.) قامتىپ, بارلىعى 6 مىڭ شاقىرىمعا جۋىق جولدى باعىندىرۋدى كوزدەۋدە.
«2016 جىلى مۇگەدەكتىگى بار ازاماتتارعا ارنالعان سپورتتىق جارىسقا قاتىستىم, شارانىڭ ۇيىمداستىرۋ جاعى وتە تومەن بولدى, ەشقانداي جاعداي جاسالماعان, قازىر پاراسپورت ءبىر ىزگە قويىلعان. سول كەزدە ماعان وزىمىزدەن باستاماساق بولمايتىنى تۇسىنىكتى بولدى. مىنە بۇگىنگى ۆەلومارافون سونىڭ جەمىسى دەسەك تە بولادى, ياعني زاعيپ جانە ناشار كورەتىن جاندار دا قوعامنىڭ ءبىر بولىگى, ءبىزدىڭ دە وزدىگىمىزدەن ءجۇرىپ- تۇرىپ, قوعامعا پايدامىزدى تيگىزە الاتىنىمىزدى دالەلدەۋ. سونىمەن قاتار نەگىزگى ماقساتىمىز ۆەلوسپورت پەن پاراسپورتتى ناسيحاتتاۋ جانە بۇنداي جوبا قازاقستاندا تۇڭعىش رەت ۇيىمداستىرىلىپ وتىر», -دەدى «سپورت بەز گرانيتس» جوباسىنىڭ جەتەكشىسى, «استانا-پاريج» ۆەلوشەرۋىنىڭ كاپيتان كومانداسى باحتيار بازاربەكوۆ.