پەتروپاۆلدا مۇمكىندىگى شەكتەۋلى جاندار ءۇشىن اۆتومەكتەپ اشىلادى

وڭىردە كەمباعال جاندار اراسىندا «تەمىر تۇلپار» تىزگىندەگىسى كەلەتىندەر قاراسى كوپ بولعانىمەن, ارنايى جابدىقتالعان كولىك  بولماعاندىقتان جۇرگىزۋشىلىك كۋالىككە قول جەتكىزە الماي كەلەدى. ءوزى قاتارلاس قۇربى-قۇرداستارىنىڭ ارمان-ماقساتىن جۇزەگە اسىرۋعا قۇلشىنا كىرىسكەن ءسالىمحان ءسابيتوۆ جۋىردا جارىم جاندارعا ارنالعان اۆتومەكتەپتىڭ جوباسىن الماتى قالاسىندا ءساتتى قورعاپ كەلدى.

«مۇنداي جوبا ەلىمىزدە العاش رەت ىسكە قوسىلعالى وتىر. تىڭ يدەيا جان-جاقتى سۇزگىدەن ءوتىپ, «راۆنايا دوروگا» دەپ اتالاتىن جوبا قولدانىسقا ەنگىزىلەدى. ءبىز  مۇگەدەك  ادامداردىڭ ومىرگە تولىققاندى ارالاسۋلارى ءۇشىن بارلىق مۇمكىندىكتەردى تۋدىرۋعا ۇمتىلامىز», دەيدى  «قوعامدىق كەلىسىم» كمم-ءنىڭ جەتەكشى ساراپشىسى ءسالىمحان ءسابيتوۆ.

تىڭ باعدارلاما «مەتالل گرۋپپ» كومپانياسى تاراپىنان قولداۋ تاۋىپ, 2 ميلليون تەڭگە ءبولىنىپتى. بۇل قاراجاتقا «لادا گرانتا» اۆتوكولىگى ساتىپ الىنىپ,  رەسەيدىڭ چەليابى قالاسىندا  مۇگەدەك ادامدارعا ىڭعايلانىپ وزگەرتىلمەك. «تەمىر تۇلپاردى» جۇرگىزۋدىڭ قىر-سىرىن ارنايى اۆتومەكتەپتە مەڭگەرگەننەن كەيىن وزدەرى دە ەمىن-ەركىن تىزگىندەيتىن بولادى.

دارىگەرلەردىڭ قورىتىندىسى بويىنشا جۇرگىزۋشى كۋالىگىن الۋعا رۇقسات ەتىلسە, ىنتا-تىلەك بىلدىرگەن عارىپ جاندار قىسقا مەرزىمدى كۋرستارعا جازىلۋلارىنا بولادى. اۆتومەكتەپ ۇيىمداستىرۋشىلار ولاردى جۇمىسقا ورنالاستىرۋ, قوسىمشا تابىس تابۋ جولدارىن دا ويلاستىرىپ وتىر.

"التىن قىران" سەرىكتەستىگى دە 4 ميللليون تەڭگە مولشەرىندە قارجىلىق قولداۋ كورسەتۋگە ءازىر. بۇل قارجىعا تاعى ءبىر «تەمىر تۇلپار» ساتىپ الىنباق. وقۋ باعاسى 15 مىڭ تەڭگەنى قۇرايدى.

«اردوس-جۇرەك» مۇگەدەكتەر بىرلەستىگىنىڭ جەتەكشىسى اقجان كارىمنىڭ سوزىنە قاراعاندا "يمپەريال" تاكسوپاركىمەن كەلىسىم-شارت جاسالىپ, جۇمىسقا ورنالاستىرۋ مۇمكىندىگى قاراستىرىلعان. بولاشاقتا  تەحنيكالىق قىزمەت كورسەتۋ ستانتسياسىن دا قۇرىلماق. ءسويتىپ  كولىكتەردى كورشى ەلگە اپارماي-اق كەمباعال جاندار ءۇشىن جابدىقتاپ بەرەدى.

بۇگىندە وبلىس ورتالىعىندا 8 مىڭنان  استامى تىرەك قيمىل جۇيەسى بۇزىلعان  مۇگەدەك ادامدار تۇرادى.

ءومىر ەسقالي,

«ەگەمەن قازاقستان»

پەتروپاۆل