ەسىن ءبىلىپ, ەتەگىن جاپقان بويجەتكەننىڭ بارلىعى قالىڭدىق اتاناتىن كۇندى ءومىر بويى كۇتەدى. جەر بەتىندە جالعىز ءوزى عانا كۇيەۋگە شىعىپ بارا جاتقانداي ءساندى دە سۇلۋ بولۋدى ارماندايدى.
ەندەشە جاھاندانعان زاماندا ۇيلەنۋ تويلارىنىڭ ترەندتەرى دە تۇپكىلىكتى وزگەرىستەردى وتكەرۋدە. تويعا كيەتىن قالىڭدىق كويلەگىنىڭ ءسانى قىرىق قۇبىلىپ تۇرسا دا, رومانتيكالىق بەينە باستى رولگە شىقتى. ءتىپتى 2018 جىلدىڭ توي ماۋسىمىندا ءسان ۇلگىلەرىنىڭ توڭكەرىسى ءجۇرىپ جاتىر دەسەك تە بولعانداي. ديزاينەرلەر قالىڭدىقتاردىڭ كيىم ۇلگىسىن دايارلاۋدا باتىل شەشىمدەرگە بارىپ وتىر. سوندىقتان دا الدىن الا كويلەك ساتىپ الىپ قويعان بولساڭىز, وندا اسىعىستىق تانىتقان بولىپ شىعاسىز. ەندىگى جەردە ەڭ ءساندى قالىڭدىق ەتەگى جەر سىزعان ۇزىن فاتا كيەدى. قالىڭدىققا يىعىن جالاڭاشتاۋ ەرسى سانالىپ, الدامشى جەڭدەر الدىڭعى كەزەككە شىقتى.
ىقشام دا ىڭعايلى كويلەكقالىڭدىقتىڭ كويلەگى ءمىنسىز تىگىلۋى ءۇشىن ديزاينەرلەر گەومەتريالىق سىزىقتاردىڭ ۇستىندە جۇمىس ىستەۋگە كوشتى. مىسالى, بيىلعى ماۋسىمدا مودەلەرلەر V-بەينەسىندەگى دەكولتەگە باسىمدىق بەرىپ, بەلدەمشەنىڭ سىزىقتارىن بارىنشا باتىل جوعارى قيادى. وسى ارقىلى ايەلگە ءتان سۇلۋلىق پەن تارتىمدىلىقتى العا تارتپاق.
قىسقا كويلەكتەردىڭ ۇلگىسىندە گەومەتريالىق تىگىستەر بارىنشا ايقىن كورىنىپ, ارقانى اشىق قالدىرادى. تىگىنشىلەر گەرمەتيكالىق سىزىقتارعا ەرەكشە ءسان بەرۋ ءۇشىن قولدان توقىلعان شىلتەرلەردى, ءىنجۋ تاستارمەن كومكەرىلگەن ماتالار مەن گۇلدى ويۋلاردى پايدالانۋدا. كويلەكتىڭ ءاربىر بولشەگى كورمەگە قويىلاتىنداي كوز تارتىپ تۇرۋى ءتيىس.
شىلتەر ماتالار ەشقاشان دا ساننەن قالىپ كورمەگەن. بىراق بيىلعى ماۋسىمدا قۇستىڭ قاۋىرسىنىنداي جۇقا, نازىك ويۋلى شىلتەرلەر بۇرىنعىدان دا وزەكتى بولا ءتۇستى. جانە جۇقا شىلتەرلەر كويلەكتە عانا ەمەس, فاتا, يىققا جامىلعى تۇرىندە دە پايدالانىلادى.
ءساندى فاتاەڭ باستىسى بەتى اشىلماعان كەلىننىڭ پاك كەيپىن تانىتاتىن فاتالاردان بيىل باس تارتۋعا بولمايدى. توي ترەندتەرىندە ديزاينەرلەردىڭ بارلىعى دەرلىك وسى اكسەسسۋارعا ەرەكشە ءمان بەرىپ وتىر. مىنا عالامتوردىڭ زامانىندا ەڭ اتاقتى, ەڭ تانىمال توي مودەلەرلەرىنىڭ ۇلگىلەرىنە كوز جۇگىرتىپ شىقساڭىز, قالىڭدىقتىڭ فاتاسىنا ۇلكەن نازار اۋداراتىندىعىن اڭعارماۋ مۇمكىن ەمەس. جاڭا تۇسكەن كەلىنىڭ سۇلۋلىعىن سۇق كوزدەن جاسىرعان فاتالار مايدا گۇلدەرمەن, گۇل دەستەلەرىمەن كومكەرىلىپ, درامالىق كوڭىل كۇي سىيلايدى.
جامىلعىلارەندىگى جەردە ساننەن قالماعان قالىڭدىققا يىق جالاڭاشتاۋ ەرسى سانالماق. جارتىلاي جالاڭاش توي كويلەكتەرى ەكىنشى قاتارعا سىرىلىپ قالدى. بۇل ماسەلەدە دە ديزاينەرلەر يىققا ىلە سالاتىن جامىلعىلاردىڭ كويلەكتىڭ ادەمىلىگىن جاۋىپ قالماۋىن قاداعالاپ, بەلگىلى ولشەمدەردى ساقتايدى.
كوستيۋمدەرمىنا قىزىقتى قاراڭىز, جوعارىداعى ۇلگىلەردى كەزەگىمەن بايانداپ وتىرساق-داعى, كوستيۋمدەر مەن كومبينەزوندار تويدىڭ سانىنە باسا-كوكتەپ كىردى. ءبىر جاعىنان بۇل ۇلگى تويدىڭ سالتاناتىمەن سيىسپايتىنداي بولىپ كورىنسە دە, شىلتەردەن توقىلعان سۆيتەرلەرگە تويدىڭ سيپاتىن بەرۋ ءۇشىن جىلتىر تاستار, كورسەتتەر قوسىلىپ وتىر. ءبىر جاعىنان بۇل ءۇردىستىڭ ەنۋىنە قازىرگى كلاسسيكالىق كوستيۋمدەر مەن سپورتتىق ءستيلدىڭ قابىسۋى تۇرعىسىنان دا قاراۋعا بولار.
الدامشى جەڭدەرتوي الەمىندەگى كىشىگىرىم توڭكەرىس دەپ وتىرعانىمىز دا وسى تۇس. ديزاينەرلەر قالىڭدىقتىڭ كويلەگىنە الىنىپ, سالىناتىن ءتۇرلى ۇزىندىقتاعى جەڭدەر مەن قولعاپتاردى قوسىپ وتىر. قالاي دەسەك تە, بۇل ىڭعايلى. جەڭدەرگە كەلگەندە, ءساننىڭ نەشە ءتۇرلى نۇسقاسى تابىلادى. قوڭىراۋ, كوبەلەك تارىزدەس جەڭدەر, تاستارمەن, جىلتىراقتارمەن كومكەرىلگەن جەڭدەر. تىزە بەرسەڭ بۇل ىستە دە نەبىر ىسمەر تىگىنشىلەر تالانتىن تانىتىپ وتىر.
XXLء«سىز بالعا بارۋعا دايىندالىپ جاتىرسىز با؟», – دەگەن سۇراق قازىر كونە عاسىرلاردىڭ ءسوزى ەمەس. ديزاينەرلەر قالىڭدىقتىڭ ۇيرەنشىكتى بەينەسىنەن قاشا باستاعان سىڭايلى. قاراپايىم بولعان جاقسى, بىراق ومىردە ءبىر-اق رەت بولاتىن كۇندى نەگە ەرتەگىدەي ەتپەسكە؟! قالىڭدىققا ءجۇز جەردەن ءساندى كويلەك ۇسىنساڭىز دا, ونىڭ ساناسىنىڭ تۇكپىرىندە حانشايىم بولۋ ارمانى قالىپ قوياتىنىن مويىنداۋ كەرەك. سوندىقتان تورت سياقتى ۇلدە مەن بۇلدەگە ورانعان كويلەكتەر ىقىلىم زاماندارداعى پاتشالاردىڭ بالدارىن ەسكە ءتۇسىرۋى ابدەن مۇمكىن. ەگەر بۇل دا از بولىپ كورىنسە, توي كويلەكتەرىمەن تانىلعان الەمدىك ديزاينەرلەردىڭ بىرقاتارى تيۋرنيۋرلەردى قايتا ءتىرىلتىپ وتىر. ياعني وتكەن عاسىرلارداعى سالتاناتى اسقان بالداردا بيكەشتەر كويلەگىنىڭ ارت جاعىنا جاستىق سياقتى ءتيۋرنيۋردى سالىپ, بوكسەسىن ءبولىپ قويماۋشى ما ەدى؟!
قارا ءتۇس قوسىلدىقاراپ وتىرساق, بۇگىنگى قالىڭدىقتاردىڭ قيالىندا ءبارىبىر شەك جوق ەكەن. قازىر تويعا تەك قانا اپپاق كويلەك كيۋ كەرەك دەگەن تۇسىنىك قالىپ بارادى. جۇمساق تۇستەر, مايدا دالا گۇلدەرى قوسىلعان كويلەكتەردىڭ نەشە اتاسى بار. بۇل از دەسەڭىز ديزاينەرلەر توي كويلەگىنە قارا سىزىقتار, قارا ءتۇستى دەتالداردى دا قوسىپ جىبەردى. نەسى بار, ءپىشۋى مەن تىگىلۋى كەلىسسە, جامان كورىنبەيدى. بەلدى قىناعان قارا لەنتا, قارا گۇلدەر اق كويلەكتىڭ ۇستىندە مەنمۇندالاپ ەرەكشە كورىنەدى. تەك ونىڭ بۇكىل بەت-بەينەڭىزبەن كەلىسۋىن ايتىڭىز.
ايناش ەسالي,
«ەگەمەن قازاقستان»
الماتى