ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ءبىلىم جانە عىلىم مينيسترلىگىنىڭ بالالاردىڭ قۇقىقتارىن قورعاۋ كوميتەتىنىڭ توراعاسى نۇربەك ورشۋبەكوۆ «مەكتەپكە جول» رەسپۋبليكالىق اكتسياسى تۋرالى باياندادى.
«بۇگىن جىل سايىنعى «مەكتەپكە جول» رەسپۋبليكالىق اكتسياسىنىڭ باستالۋىن جاريالايمىز. «مەكتەپكە جول» اكتسياسى از قامتىلعان جانە كوپ بالالى وتباسىلاردىڭ وقۋشىلارىنا كومەك كورسەتۋگە جانە الەۋمەتتىك سەبەپتەر بويىنشا بالالاردىڭ مەكتەپكە بارماۋىنىڭ الدىن الۋعا باعىتتالعان. بۇل اكتسيا 1 تامىز – 30 قىركۇيەك ارالىعىندا وسىمەن ون ءبىرىنشى جىل وتكىزىلىپ وتىر. اكتسيا وتكىزىلگەن ون جىل ىشىندە 2 ملن 600 مىڭنان استام بالاعا جالپى سوماسى 17 ملرد 800 ميلليون تەڭگەدەن استام ماتەريالدىق كومەك كورسەتىلدى. اكتسيا شەڭبەرىندە بالالار كەڭسە كەرەك-جاراقتارىمەن, كيىممەن قامتىلادى. جىلدان جىلعا دەمەۋشىلىك كومەك كولەمى ارتىپ وتىر», دەدى ول.
كوميتەت باسشىسى, سونىمەن قاتار بيىل اكتسيا اياسىندا ءبىلىم بەرۋ ورگاندارى مەن ۇيىمدارى تامىز-قىركۇيەك ايلارىندا بىرقاتار ءىس-شارالاردى وتكىزەتىنىن مالىمدەدى.
«بىرىنشىدەن, ءاربىر ەلدى مەكەندە, قالا ماڭىنداعى ساياجايلاردا, بولىمدەردە, فەرمالاردا «تاۋەكەل توبىنداعى» (قاداعالاۋسىز جانە پاناسىز بالالار, الەۋمەتتىك جاعدايى تومەن وتباسىلاردان شىققان بالالار جانە ميگرانتتار, قايىرشى بالالار, دالادا جۇمىس ىستەيتىن بالالار جانە ت.ب.) بالالاردى انىقتاۋ ءۇشىن رەيد جۇرگىزىلەدى. ەكىنشىدەن, رەيدتەردىڭ قورىتىندىسى بويىنشا «تاۋەكەل توبىنداعى» وتباسىلاردان شىققان جانە الەۋمەتتىك كومەككە مۇقتاج بالالاردىڭ پەرسونالدى تىزىمدەرى جاسالىپ, ءبىلىم بەرۋ ورگاندارىنا جانە دەمەۋشىلەرگە بەرىلەدى. ۇشىنشىدەن, اكتسيا كەزەڭىندە ءبىلىم بەرۋ مەكەمەلەرى مەن ۇيىمدارىندا سەنىم تەلەفوندارى مەن قوعامدىق قابىلداۋلاردىڭ ءۇزىلىسسىز جۇمىسى ۇيىمداستىرىلادى. ءىرى ساۋدا ورتالىقتارىندا گۋمانيتارلىق كومەك پۋنكتتەرى ورناتىلادى», دەدى ول.
مۇقتاج جاندارعا كومەكتەسۋدى, سونداي-اق دەمەۋشىلىك كومەك كورسەتۋدى قالايتىن كەز كەلگەن ادامدار ەلىمىزدىڭ بالا قۇقىقتارى جونىندەگى ۋاكىلەتتىگىنىڭ «111» ۇلتتىق بايلانىس ورتالىعىنا نەمەسە بالالاردىڭ قۇقىقتارىن قورعاۋ كوميتەتىنىڭ 74-25-28 سەنىم تەلەفونىنا حابارلاسۋىنا, قاجەتتى اقپاراتتى كوميتەتتىڭ www.bala-qqk.gov.kz ۆەب-سايتىنان الۋعا بولادى.
«بۇگىندە جەرگىلىكتى بيلىك ورگاندارى كومەككە مۇقتاج بالالاردىڭ ءتىزىمىن دايىندادى. بۇل – شامامەن 323 مىڭ بالا, بىراق تىزىمدەر اتا-انالاردان وتىنىشتەردى قابىلداۋ ارقىلى تولىقتىرىلادى. مەن بارلىق قازاقستاندىقتارعا «مەكتەپكە جول» اكتسياسى 30 قىركۇيەككە دەيىن جالعاساتىنىن جانە وعان بەلسەندى قاتىسۋعا مۇمكىندىك بار ەكەنىن جەتكىزگىم كەلەدى. جەرگىلىكتى اتقارۋشى ورگانداردىڭ نازارىن از قامتىلعان وتباسىلاردان شىققان بالالاردى مەكتەپكە قاۋىپسىز تاسىمالداۋدى جانە قاۋىپسىز تاماقتانۋدى قامتاماسىز ەتۋ بويىنشا شارالاردى قابىلداۋ قاجەتتىلىگىنە اۋدارعىم كەلەدى», دەدى بالالاردىڭ قۇقىقتارىن قورعاۋ كوميتەتىنىڭ توراعاسى.
راۋان قايدار,
«ەگەمەن قازاقستان»