“قازسۋشار” رەسپۋبليكالىق مەملەكەتتىك كاسىپورنىنا قاراستى سوكولوۆكا توپتىق سۋ قۇبىرى جاڭعىرتىلىپ, قىزىلجار اۋدانىنداعى 13 اۋىلعا ساپالى اۋىز سۋ جەتتى.
ستانتسياعا سۋ ەسىل وزەنىنەن الىنىپ, 12 مەتر تەرەڭدىكتە ورنالاسقان ارنايى كامەرادا ساقتالادى. ەسكى قۇرال-جابدىقتار جاڭالانىپ, عيماراتتىڭ جۇمىسى تولىعىمەن اۆتوماتتى جۇيەگە كوشىرىلدى. “قازسۋشار” رەسپۋبليكالىق مەملەكەتتىك كاسىپورنى “ەسىل سۋ” فيليالىنىڭ باس ينجەنەرى نيكيتا ءزاباۆيننىڭ ايتۋىنشا سورعى ستانتسياسى مەن 116 شاقىرىم قۇبىر قالپىنا كەلتىرىلگەن. بۇل ماقسات ءۇشىن رەسپۋبليكالىق بيۋدجەتتەن 4,6 ميلليارد تەڭگە جۇمسالعان.
“2018-2020" جىلدارعا ارنالعان جوبا قۇنى 6,9 ميلليارد تەڭگەنى قۇرايدى. ول بويىنشا 19 اۋىلعا جاڭا قۇبىرلار تارتىلادى”, دەيدى باس ينجەنەر.
زاماناۋي تەحنيكالىق قوندىرعىلاردىڭ ارقاسىندا بارلىق جۇمىس پروتسەسى كومپيۋتەر ارقىلى باقىلانادى. سۋ شىعىنىنىڭ ءبىرشاما ازايعانى بايقالادى. بۇعان دەيىن 1 ليتر تىرشىلىك كوزىندەگى لايلانۋ مولشەرى 1,1-1,2 مل. گرامدى قۇراسا, ەندى 0,7-گە دەيىن تومەندەگەن.
بۇگىندە پرەسنوۆكا توپتىق سۋ قۇبىرى جوندەلۋدە. ونىڭ العاشقى كەزەڭىنە 7,8 ميلليارد تەڭگە قاراستىرىلىپ, 19 اۋىل تازا سۋمەن قامتىلماق. ولاردىڭ قاتارىندا ميحايلوۆكا, نوۆودۋبروۆنوە, سەنجاركا, كلادبينكا, سەماكي پچەلينو سياقتى ەلدى مەكەندەر بار. تۇتاستاي العاندا 280 شاقىرىم ماگيسترالدى جەلى قوسىلىپ, وتىزعا جۋىق اۋىلدىڭ تۇرعىندارى سۋ ازابىنان قۇتىلاتىن بولادى.
بيىل شال اقىن, تيميريازەۆ جانە عابيت مۇسىرەپوۆ اتىنداعى اۋداندارى ءۇشىن سورعى ستانتسياسى ىسكە قوسىلىپ وتىر.
“قازسۋشار” كاسىپورنىنىڭ “ەسىل سۋ” فيليالى وڭىرىمىزدەگى 11 جانە قوستاناي وبلىسىنداعى 2 اۋدانعا تىرشىلىك كوزىن جەتكىزۋمەن اينالىسادى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.