شىمكەنت ءۇشىنشى مەگاپوليس اتىنا ساي بولۋى ءتيىس. وسى باعىتتا قۇرىلىمدىق جۇمىستارمەن قاتار, قالاداعى ساۋدا ورىندارىن تالاپقا ساي ەتۋ جۇمىستارى دا جۇرگىزىلۋدە.
قالاداعى العاشقى دا ءىرى ساۋدا ورنى «قىرعى بازاردىڭ» ماڭى زاڭسىز ساۋدا دۇڭگىرشىكتەرىنە تولى بولاتىن. كولىك قوزعالىسىنا جانە كوشە تازالىعىنا كەرى اسەرىن تيگىزىپ كەلگەن بۇل ماسەلە كوپتەن بەرى كوتەرىلىپ كەلگەن دە ەدى. قالا باسشىلىعىن تىزگىنگە العان تالاي اكىم دە, ءتارتىپ ساقشىلارى دا رەتسىز ساۋدانى جويا الماعان-دى. كوپ جىلداردان بەرى شىمكەنتتىڭ «باس اۋرىنا» اينالعان رەتسىز ساۋدا ورىندارى 30 شىلدە كۇنى سۇرىلە باستادى.
ويتكەنى «قىرعى بازار» اۋماعىندا جول بويىنداعى كەلەڭسىزدىكتى جويۋعا نەگىزدەلگەن سوت شەشىمى كۇشىنە ەندى. ال وسىعان دەيىن ءال فارابي اۋداندىق اكىمدىگىندە سوت شەشىمىنىڭ ورىندالۋى تالقىلانعان جيىن وتكەن بولاتىن. جيىندا اۋدان اكىمى عابيت ماۋلەنقۇلوۆ بازار باسشىلارىمەن مەموراندۋم تۇزىلگەنىن مالىمدەدى. سوت شەشىمى بويىنشا 35 دۇڭگىرشەك الىنىپ تاستالادى.
ءسويتىپ 5 گەكتار جەر تەلىمى مەملەكەتكە قايتارىلادى. كاسىپكەرلەرگە م ۇلىكتەرىن كوشىرىپ اكەتۋى ءۇشىن ءبىرشاما ۋاقىت بەرىلگەن. قالالىق تكش باسقارماسى باسشىسىنىڭ مىندەتىن اتقارۋشى نۇرلان بەكتۇرسىنوۆتىڭ ايتۋىنشا, اكىمدىك رەتسىز ساۋدا يەلەرى ءۇشىن 150 الەۋمەتتىك ورىن بەرۋ تۋرالى «قىرعى بازار» جشس-نىڭ باسشىلىعىمەن كەلىسىمگە كەلگەن. كەلىسىمگە سايكەس, اتالمىش كاسىپكەرلەر العاشقى ءۇش اي مەرزىمىندە بازار ىشىندەگى ساۋدا ورىندارىن جالعا الۋدان جانە سالىق تولەۋدەن بوساتىلادى.
دۇيسەنبى كۇنى تاڭەرتەڭ تولە بي كوشەسىنە پوليتسيا قىزمەتكەرلەرى, اكىمدىك وكىلدەرى مەن ساۋداگەرلەر جينالدى. سوت شەشىمىن ورىنداۋشىلار ارنايى تەحنيكالارمەن ىسكە كىرىسىپ, زاڭسىز ساۋدا ورىندارى ءسۇرىلدى. دۇڭگىرشەكتەردىڭ سۇرىلۋىنە قارسىلىق بىلدىرگەن ساتۋشىلار دا از بولمادى. ولار اكىمدىك وزدەرىنە ەكى اي ۋاقىت بەرسە, بازاردان ءوز ەركىمەن كەتۋگە دايىن ەكەنىن جەتكىزدى. ال قۇقىق قورعاۋ ورىندارى وكىلدەرىنىڭ مالىمدەۋىنشە, ساۋداگەرلەرگە بازاردىڭ ىشىنەن ورىن تاۋىپ بەرۋ ۇسىنىلعانىمەن, ساۋدا بولمايتىنىن ايتىپ كوشۋدەن باس تارتقان.
ەركىن دوسىمباي,
شىمكەنت قالاسى