الماتىنىڭ «قايرات» كلۋبى ەۋروپا ليگاسى ەكىنشى ىرىكتەۋ كەزەڭى اياسىندا نيدەرلاندىنىڭ ازۋلى كلۋبى از (الكماار) كومانداسىن قابىلداپ, 2:0 ەسەبىمەن باسىم ءتۇستى.
الماتىنىڭ «ورتالىق» ستاديونىندا وتكەن ماتچتىڭ العاشقى مينۋتتان-اق از كومانداسى قاۋىپتى شابۋىلمەن كوزگە تۇسە باستادى. دەگەنمەن كەزدەسۋدىڭ 12-مينۋتىندا الماتىلىق كلۋبتىڭ جارتىلاي قورعاۋشىسى ادەرينسولا ەسەولا مەرگەندىگىمەن كوزگە ءتۇسىپ, كومانداسىن ەسەپتە العا شىعاردى. گول سوعىلعان سوڭ ويىن مانەرى قىزا ءتۇستى. ەكى كوماندا دا الما-كەزەك شابۋىلداعانىمەن, ءبىرىنشى تايمدا ەسەپ وزگەرمەدى.
كەزدەسۋدىڭ ەكىنشى بولىگىن «قايرات» بەلسەندى باستادى. ويىننىڭ 50-مينۋتىندا ادەرينسولا ەسەولا ەسەپتى ەسەلەپ, ءوزىنىڭ ماتچتاعى ەكىنشى گولىن سالدى. ويىننىڭ قالعان بولىگىندە «قايرات» قورعانىسقا كوبىرەك كوڭىل ءبولىپ, ەسەپتى ۇستاپ تۇرۋعا تىرىستى. از كومانداسى ەسەپتى قىسقارتۋعا قانشا تىرىسقانىمەن, «قايرات» كومانداسىنا گول سوعۋ ولارعا بۇيىرمادى.
ەكى كوماندا اراسىنداعى قارىمتا كەزدەسۋ 2 تامىز كۇنى نيدەرلاندىدا وتەدى.