گرەكيادا ورمان ءورتى سالدارىنان 77 ادام قازا تاپتى. 200-گە جۋىق ادام جاراقات العان. ولاردىڭ 23-ءى – بالالار. قازىرگى كەزدە جوعالعانداردى ىزدەستىرۋ جۇمىستارى جۇرگىزىلىپ جاتىر. وسىعان بايلانىستى ەلدە ءۇش كۇندىك قارالى كۇن جاريالاندى.
قازا تاپقانداردىڭ كوبى افينىدان 40 شاقىرىم قاشىقتىقتاعى ماتي اۋىلىن تاستاپ كەتە الماعان. رەسمي دەرەككە سۇيەنسەك, قايتىس بولعانداردىڭ باسىم بولىگى تۇتىنگە تۇنشىققان ەكەن. گرەكيا ۇكىمەتى الاپات ورمان ورتىنەن زارداپ شەككەندەرگە كومەك كورسەتۋ ءۇشىن 20 ملن ەۋرو ءبولدى. ءتىلسىز جاۋ ءالى سوندىرىلگەن جوق. قۇتقارۋ جۇمىستارىنا 100-دەن استام ءورت ءسوندىرۋشى تارتىلعان. قازىرگى تاڭدا قايىقتار مەن تىكۇشاقتار ارقىلى وتقا ورانعان ايماقتاردىڭ تۇرعىندارى قاۋىپسىز جەرگە كوشىرىلىپ جاتىر.
ءتىپتى افينى قالاسىنا تاياۋ ماڭدى مەكەن ەتكەن تۇرعىندار دا ءۇيىن تاستاپ كەتكەن. ءتىلسىز جاۋ ەلدىڭ وڭتۇستىك-باتىسىنان باستالعان. BBC ارناسىنىڭ مالىمەتىنە سۇيەنسەك, مۇنداي ءىرى كولەمدەگى ءورت كەيىنگى ون جىلدا بولماعان. سوڭعى رەت 2007 جىلى پەلوپوننەس تۇبەگىندە بولعان ءتىلسىز جاۋدان ونداعان ادام قازا تاپقان ەدى. ءورتتىڭ بوي بەرمەي كەتۋىنە ۇيىتقىپ سوققان جەل دە اسەر ەتكەن. كەي جەرلەردە ونىڭ جىلدامدىعى ساعاتىنا 120 كيلومەترگە دەيىن جەتكەن ەكەن. ناتيجەسىندە اۋا تەمپەراتۋراسى 37 گرادۋسقا دەيىن كوتەرىلىپ, ىلعالدىلىق ازايىپ كەتكەن.
The Guardian باسىلىمى 1500-دەن استام تۇرعىن ءۇي زارداپ شەككەنىن حابارلادى. سونداي-اق 80-گە جۋىق اۆتوكولىك ورتەنىپ, ك ۇلى عانا قالعان.
گرەكيانىڭ پرەمەر-ءمينيسترى الەكسيس تسيپراس ءورت بولعان اتتيكا ايماعىندا توتەنشە جاعداي جاريالانعانىن مالىمدەدى. «گرەكيا اۋىر قازاعا ۇشىرادى. ءبىز قايعىعا قارسى تۇرا ءبىلۋىمىز قاجەت», دەدى ول.
ەۋروپالىق وداق كەلىسىمىنە سايكەس, ەل بيلىگى ءورت سالدارىمەن كۇرەسۋ ءۇشىن ۇيىمعا مۇشە مەملەكەتتەردەن كومەك سۇراعان. سوعان سايكەس, كيپردەن 60 ءورت سوندىرۋشىدەن قۇرالعان ارنايى كوماندا جىبەرىلسە, يسپانيا سۋعا قونا الاتىن ەكى ۇشاعىن ۇسىنعان. تۇركيا مەن يزرايل سەكىلدى مەملەكەتتەر دە كومەك قولىن سوزدى.
ەۋروپالىق كەڭەستىڭ توراعاسى دونالد تۋسك قيىن ساتتە وداققا مۇشە مەملەكەتتەردىڭ جۇدىرىقتاي جۇمىلاتىنىن جەتكىزدى. «ەۋروپا وسى ءبىر قيىن-قىستاۋ كەزەڭدە گرەكياداعى دوستارىنىڭ قاسىنان تابىلادى. ەو ەلدەرىنىڭ كومەكتەرى گرەكياعا بەت الدى», دەدى ول.
افينى وڭىرىندەگى ءورت دۇيسەنبىدە باستالدى. بىرنەشە جەردەن تۇتانعان ءتىلسىز جاۋ تەز ارادا اينالاسىنىڭ ءبارىن جالماعان. بۇگىنگە دەيىن لاپىلداعان ءورتتىڭ بىرنەشە وشاعى ءسوندىرىلدى. الايدا ءتىلسىز جاۋدىڭ ون شاقتى وشاعى ءالى اۋىزدىقتالعان جوق.
جالپى, بيىلعى جاز ەۋروپا ەلدەرىنە وڭايعا سوقپاي تۇر. بۇعان دەيىن شۆەتسيانىڭ «ارتيكالىق ءوڭىر» دەپ اتالاتىن ورماندى ايماعىن جالىن جالماعان ەدى. توسىن اپات تۇرعىندار مەكەندەيتىن جەردەن الىستاۋ ايماقتا بولعاندىقتان, قازا تاپقاندار كەزدەسكەن جوق. الايدا قاۋىپسىزدىك ءۇشىن ءتورت اۋىلدىڭ تۇرعىندارى الىس ايماققا كوشىرىلگەن.
اباي اسانكەلدى ۇلى,
«ەگەمەن قازاقستان»